ជាវីរបុរសរបស់កុមារ និងជាតិកម្ពុជា ហើយ លោក បេអាត រីចឈ្នឺរ (Beat Richner) ក៏ជាបុគ្គលម្នាក់ដែលលើកកិត្តិយសប្រជាជាតិស្វីសផងដែរ។ នៅឆ្នាំ២០០២ លោកជាបុគ្គលដំបូងបំផុតរបស់ស្វីសដែលទទួលបានពាន «ជនជាតិស្វីសឆ្នើមប្រចាំឆ្នាំ» (Swiss of the Year) ហើយអ្នកដែលទទួលបានជាបន្តបន្ទាប់រួមមាន Roger Federer, Kobi Kuhn និង Stanislas Wawrinka ជាដើម។
បង្កើតឡើងនៅឆ្នាំ២០០២ ដោយទូរទស្សន៍ និងវិទ្យុស្វីស (SRF) ពាន Swiss of the Year បង្ហាញពីការគោរព និងទទួលស្គាល់ជនជាតិស្វីសដែលដើរតួនាទីជាគំរូក្នុងសង្គម និងមានស្នាដៃនានា ដែលលើកតម្កើងកិត្តិយសជាតិ។
ជាង១០ឆ្នាំដំបូងនៅកម្ពុជា លោកវេជ្ជបណ្ឌិត បេអាត រីចឈ្នឺរ
(Beat Richner) បានបង្កើតស្នាដៃដ៏ធំធេងតាមរយៈការបង្កើតមូលនិធិមន្ទីរពេទ្យគន្ធបុប្ផា និងពង្រីកសេវាកម្មមន្ទីរពេទ្យគន្ធបុប្ផា ដើម្បីព្យាបាលជំងឺកុមារ និងសេវាសម្ភពជូនពលរដ្ឋកម្ពុជាដោយឥតគិតថ្លៃ។
ការចេញស្វែងរកប្រភពថវិកាដោយខ្លួនឯង ជាពិសេសតាមរយៈការប្រគំតន្ត្រីសេឡូ របស់លោក បេអាត រីចឈ្នឺរ ក្នុងបេសកកម្មសង្គ្រោះកុមារខ្មែរ បាននាំឲ្យលោកក្លាយជាគំរូនៃប្រជាជាតិស្វីសទាំងមូល និងជាហេតុដែលនាំឲ្យលោកឈ្នះពាន Swiss of the Year មុនគេបំផុត។
បន្ទាប់ពីលោក បេអាត រីចឈ្នឺរ អ្នកឈ្នះពាននៅឆ្នាំជាបន្តបន្ទាប់ រួមមាន កីឡាករវាយកូនបាល់ឆ្នើម Roger Feder, លោកស្រី Lotti Latrous ដែលជាអ្នកជំនាញផ្នែកអភិវឌ្ឍន៍, លោក Peter Sauber ម្ចាស់ក្រុមយន្តប្រណាំង Formula 1, លោក Jorg Abderhalden ជើងឯកចំបាប់, លោកស្រី Eveline Widmer-Schlumpf ទីប្រឹក្សាសហព័ន្ធស្វីស, លោក Rene Pretre ពេទ្យជំនាញវះកាត់បេះដូង, គិលានុបដ្ឋាយិកា Marianne Kaufmann និងវេជ្ជបណ្ឌិត Rolf Maibach, កីឡាករប្រណាំងស្គី Didier Cuche, កីឡករជិះស្គី Dario Cologna, កីឡាការិនីវាយកូនបាល់ Stanislas Wawrinka, លោក Didier Burkhalter ទីប្រឹក្សាសហព័ន្ធស្វីស និងលោក Polo Hofer អ្នកចម្រៀងរ៉ុក។
ឈ្មោះជ័យលាភី ត្រូវបានចារលើស្លាកដោយបិទភ្ជាប់លើផ្ទាំងថ្មនៅមជ្ឈមណ្ឌលភូមិសាស្ត្រស្វីសដែលស្ថិតនៅ Alggi-Alp ក្រុង Sachseiln, Obwalden។ ក្នុងមួយជីវិត ម្នាក់ទទួលបានតែម្តងប៉ុណ្ណោះ៕