ជាតិ
សង្គមជាតិ
រដ្ឋមន្ត្រីអប់រំ អំពាវនាវឲ្យអ្នកគ្រប់គ្រងសាលារៀនសម្អាតបរិស្ថានឲ្យបានល្អ
× ភ្នំពេញ៖ ក្រសួងអប់រំ យុវជន និងកីឡា នឹងរៀបចំកម្មវិធី«សម្អាតបរិស្ថាន» ដែលអបអរទិវា «សម្អាតពិភពលោក» នៅថ្ងៃទី១៥ ខែកញ្ញា។ ទិវានេះ ដើម្បីធានានូវសោភ័ណភាពទីក្រុង និងសុខភាពសាធារណៈ។ ក្រសួងអប់រំ អំពាវនាវឲ្យគ្រប់គ្រឹះស្ថានទាំងអស់ រួមចំណែកការពារបរិស្ថាន ដោយរៀបចំការវេចខ្ចប់សំរាមឲ្យបានត្រឹមត្រូវ។
ថ្លែងនៅក្នុងវីដេអូឃ្លីបលោក ហង់ ជួន ណារ៉ុន រដ្ឋមន្ត្រីក្រសួងអប់រំ បានអំពាវនាវដល់អ្នកគ្រប់គ្រងគ្រឹះស្ថានសិក្សា ស្ថាប័ន សាលារៀន និងពលរដ្ឋឲ្យយកចិត្តទុកដាក់ថែរក្សាបរិស្ថាន ដោយមិនត្រូវបោះចោលសំរាមផ្តេសផ្តាសឡើយ។ ជាពិសេសនាយកសាលា ត្រូវរៀបចំឲ្យសិស្សគាំពាបរិស្ថាន ដោយត្រូវសម្អាតថា្នក់រៀន និងទីសាធារណៈឲ្យបានត្រឹមត្រូវ។
រដ្ឋមន្ត្រីក្រសួងអប់រំ បានបញ្ជាក់ដូច្នេះថា៖«គ្រប់គ្រឹះស្ថាន ស្ថាប័ន សាលារៀន ក្រសួងពាក់ព័ន្ធ ទាំងអស់ចូលរួមទិវា «សំអាតពិភពលោក» នៅថ្ងៃទី១៥ ខែកញ្ញា ដើម្បីបំផុសឲ្យសាធារណជន កាត់បន្ថយការប្រើប្រាស់ថង់ផ្លាស្ទិក ការរៀបចំទុកដាក់សំរាម ការវេចខ្ចប់ និងការបែងចែកសំរាមទៅតាមប្រភេទផ្សេងគ្នាឲ្យបានត្រឹមត្រូវ សម្រាប់លម្អសោភ័ណភាពទីក្រុងឲ្យមានភាពស្រស់ស្អាត ទាក់ទាញភ្ញៀវទេសចរអន្តរជាតិកាន់តែច្រើន ប្រកបដោយផ្លែផ្កាផងដែរ»។
ទិវានេះមិនមែនមានតែកម្ពុជា ដែលប្រារព្ធនោះទេ មានបណ្តាប្រទេសប្រមាណ១៥០ប្រទេសទៀត ដែលប្រារព្ធជារៀងរាល់ឆ្នាំ នាថ្ងៃទី១៥ ខែកញ្ញា។ ជារៀងរាល់ឆ្នាំ ក្រសួងអប់រំ តែងតែរៀបចំការប្រកួតប្រជែងជ្រើសរើសសាលាស្អាត នៅតាមរាជធានីភ្នំពេញចំនួន៣ ដែលជាសាលាមានបរិស្ថានស្អាត គ្មានសំរាម និងមានសណ្តាប់ធ្នាប់ល្អ។ ការប្រឡងប្រណាំងសាលាស្អាត ដើម្បីឲ្យសិក្សានុសិស្ស លោកគ្រូអ្នកគ្រូ ធានាបានគុណភាពបិរស្ថាន និងសុខភាពអនាម័យ។
សូមបញ្ជាក់ថា សំរាមនៅទូទាំងពិភពលោកកើនឡើងដល់ ៤ពាន់លានតោន សំរាមថង់ប្លាស្ទិក ដែលចាក់ចូលក្នុងសមុទ្រ មានជាង ៨លានតោន៕
Tag:
ក្រសួងអប់រំ យុវជន និងកីឡា
ហង់ ជួន ណារ៉ុន
បរិស្ថាន
© រក្សាសិទ្ធិដោយ thmeythmey.com