ជាតិ
សេដ្ឋកិច្ច
កម្ពុជា ស្ថិតក្នុងចំណោមប្រទេសអាស៊ាន៨ ដែលមានសន្ទុះសេដ្ឋកិច្ចខ្លាំងលើពិភពលោក
រូបភាព AFP
×![]()
ដោយសារតែគោលនយោបាយជំរុញកំណើនសេដ្ឋកិច្ច និងវត្តមានរបស់បណ្ដាក្រុមហ៊ុនដែលមានភាពជឿនលឿន សមាជិកអាស៊ានចំនួន៨ ស្ថិតក្នុងចំណោមប្រទេសដែលមានសន្ទុះសេដ្ឋកិច្ចល្អបំផុតក្នុងពិភពលោក ។ យោងតាមរបាយការណ៍មួយ ដែលចេញផ្សាយដោយវិទ្យាស្ថានសកល McKinsey នៅថ្ងៃទី១៤ កញ្ញា។
ក្នុងរបាយការណ៍នេះ វិទ្យាស្ថានខាងលើ បានវិភាគប្រទេសចំនួន ៧១សំខាន់ៗជុំវិញពិភពលោក ហើយជាលទ្ធផល ពួកគេបានរកឃើញប្រទេសចំនួន១៨ ដែលមានកំណើនសេដ្ឋកិច្ចខ្លាំងក្លា។ ក្នុងចំណោមប្រទេសទាំង ១៨នេះ ក៏មានរដ្ឋសមាជិកអាស៊ានចំនួន៨។
ប្រទេសទាំង ៨នេះ ត្រូវបានរបាយការណ៍ខាងលើចាត់ថ្នាក់ជា ២ប្រភេទ។ ថ្នាក់ទី១គឺ ប្រទេសដែលមានកំណើនសេដ្ឋកិច្ចខ្លាំងក្លារយៈពេលវែង ក្នុងនោះរួមមាន ឥណ្ឌូណេស៊ី ម៉ាឡេស៊ី សិង្ហបុរី និងថៃ ដែលមានកំណើនសេដ្ឋកិច្ចជាមធ្យមប្រចាំឆ្នាំក្នុងរង្វង់ ៣,៥% នារយៈពេល ៥០ឆ្នាំ។ រីឯទី២ គឺ ប្រទេសដែលមានកំណើនសេដ្ឋកិច្ចខ្លាំងក្លានាពេលថ្មីៗនេះ ក្នុងនោះរួមមាន កម្ពុជា ឡាវ មីយ៉ាន់ម៉ា និងវៀតណាម ដែលមានមានកំណើនសេដ្ឋកិច្ចជាមធ្យមប្រចាំឆ្នាំក្នុងរង្វង់ ៥% នារយៈពេល ២០ឆ្នាំ។
យ៉ាងណាមិញ ហ្វីលីពីន មិនមានឈ្មោះនៅក្នុងរបាយការណ៍នេះទេ ប៉ុន្តែកំណើនសេដ្ឋកិច្ចដ៏លឿនរហ័សរបស់ប្រទេសនេះ នាពេលថ្មីៗនេះ អាចធ្វើឲ្យរដ្ឋអាស៊ានមួយនេះជាប់ឈ្មោះនាពេលអនាគត។ ចំណែកឯព្រុយណេវិញ មិនត្រូវបានចាត់ទុកក្នុងរបាយការណ៍នេះឡើយ ក៏ព្រោះតែផ្ទៃដីដ៏តូចរបស់ប្រទេសនេះ។ នេះបើតាមរបាយការណ៍ខាងលើដដែលនេះ។
ទោះជាមានសេដ្ឋកិច្ចរីកចម្រើនខ្លាំងក្ដី រដ្ឋអាស៊ានមិនត្រូវពឹងផ្អែកលើស្ថានភាពបច្ចុប្បន្នរបស់ខ្លួនឡើយ តែត្រូវបន្តគិតគូរបន្ថែមទៀត តាមរយៈការដោះស្រាយបញ្ហានានាដែលអាចបង្កការរាំងស្ទះដល់ការលូតលាស់របស់ខ្លួន។ ការផ្លាស់ប្ដូរគម្រូពាណិជ្ជកម្ម ការប្រែប្រួលប្រជាសាស្ត្រ ការរីកចម្រើនផ្នែកគ្រឿងម៉ាស៊ីន និងបច្ចេកវិទ្យា ព្រមទាំងកំណើនវិសមភាពចំណូល សុទ្ធសឹងជាប្រធានបទដែលប្រទេសក្នុងតំបន់ត្រូវចាប់អារម្មណ៍ខ្ពស់។
លោក Oliver Tonby ប្រធានការិយាល័យ McKinsey ប្រចាំតំបន់បានលើកជាយោបល់ថា ខណៈដែលកំណើនសេដ្ឋកិច្ចរបស់ប្រទេសអាស៊ានមិនមែនជារឿងភ្ញាក់ផ្អើលនោះ បញ្ហាប្រឈមរបស់ប្រទេសនេះមានដួចជា ការរក្សាកំណើនសេដ្ឋកិច្ច និងការបន្តរក្សាគម្លាតផលិតផលក្នុងស្រុកសម្រាប់មនុស្សក្នុងសម័យកាលរីកចម្រើនផ្នែកបច្ចេកវិទ្យា។ លើសពីនោះ អ្វីដែលតំបន់ទាំងមូលត្រូវយកចិត្តទុកដែរនោះ គឺការជំរុញផលិតភាពតាមបែបឌីជីថល និងហេដ្ឋរចនាសម្ព័ន្ធ៕
Tag:
អាស៊ាន សេដ្ឋកិច្ចអាស៊ាន វិទ្យាស្ថានសកល McKinsey
© រក្សាសិទ្ធិដោយ thmeythmey.com
