ភ្នំពេញ៖ ស្ថានឯកអគ្គរាជទូត/ស្ថានបេសកកម្មកម្ពុជាប្រចាំសហភាពអឺរ៉ុប ថ្ងៃទី ១៣ ខែកញ្ញា ឆ្នាំ២០១៨បានចេញសេចក្ដីថ្លែងការណ៍ឆ្លើយតប នឹងការសម្រេចរបស់សភាអឺរ៉ុប ដែលបានអនុម័តកាលពីថ្ងៃទី១៣ ខែកញ្ញា។ សេចក្ដីសម្រេចដែលតម្រូវឲ្យរដ្ឋាភិបាលកម្ពុជាដោះលែងលោក កឹម សុខា ឲ្យមានសេរីភាព និងទម្លាក់រាល់បទចោទ ដោយគ្មានលក្ខខណ្ឌ ព្រមទាំងតម្រូវឲ្យមានការចរចា ប្រគល់នូវអ្វីដែលសភាអឺរ៉ុបថារដ្ឋាភិបាលកម្ពុជាបានដណ្ដើមយកពីគណបក្សសង្គ្រោះជាតិ។ សេចក្ដីសម្រេចនេះ ត្រូវបានស្ថានបេសកកម្មកម្ពុជាថា ការសម្រេចនេះត្រូវបានតាក់តែងឡើងតាមសម្តីបុគ្គលបក្សប្រឆាំងម្នាក់ ដែលទំនងជាសំដៅទៅកាន់លោក សម រង្ស៊ី។
សភាអឺរ៉ុប កាលពីថ្ងៃទី១៣ កញ្ញា បានអនុម័តសេចក្តីសម្រេចចុងក្រោយរបស់ខ្លួន ដែលទាមទារឲ្យអាជ្ញាធរកម្ពុជា ទម្លាក់ចោលរាល់បទចោទប្រឆាំងនឹងមេដឹកនាំគណបក្សសង្គ្រោះជាតិ លោក កឹម សុខា និងអំពាវនាវឲ្យមានការដោះលែងរូបលោកឲ្យមានសេរីភាពដោយគ្មានលក្ខខណ្ឌ។ សេចក្ដីសម្រេចដដែលក៏អំពាវនាវដូចគ្នា ចំពោះករណីអ្នកនយោបាយដទៃទៀត រួមទាំងលោក សម រង្ស៊ី ផងដែរ។
មិនតែប៉ុណ្ណោះភាអឺរ៉ុប បានស្នើឲ្យនាយកដ្ឋានសេវាកិច្ចការបរទេសរបស់អឺរ៉ុប ( EEAS ) និងគណៈកម្មាការអឺរ៉ុប ( European Commission ) រៀបចំបញ្ជីឈ្មោះបុគ្គល ដែលទទួលខុសត្រូវក្នុងការរំលាយគណបក្សប្រឆាំង និងអំពើរំលោភសិទ្ធិមនុស្សដែលសភាEU ថាធ្ងន់ធ្ងរនៅកម្ពុជា ក្នុងគោលដៅដើម្បីឈានទៅរកការដាក់ចេញនូវវិធានការរឹតត្បិតទិដ្ឋាការ និងបង្កកទ្រព្យសម្បត្តិរបស់បុគ្គលទាំងនោះ។
ឆ្លើយតបនិងការអនុម័តនេះ ស្ថានបេសកកម្មកម្ពុជា នៅថ្ងៃទី១៥ ខែកញ្ញានេះ បានចេញសេចក្ដីថ្លែងការណ៍ និងបានហៅការសម្រេចរបស់សភា EU ថាជាការសម្រេច ដែលធ្វើទៅតាមតែមនុស្សមួយក្រុមតូច ដែល EU គាំទ្រ តែប៉ុណ្ណោះ។ សេចក្ដីថ្លែងការណ៍ដែលមាន៣ទំព័រ នេះ បានបញ្ជាក់ថា៖ «ការសម្រេចរបស់សភាEU បានផ្អែកទៅលើការអះអាងមិនពិត និងមិនស្មោះត្រង់ ពីក្រុមជ្រុលនិយមកម្ពុជា ដែលការពារដោយសភាEU។ ដោយផ្អែកទៅលើរបាយការណ៍លម្អៀងទាំងឡាយរបស់គណបក្សប្រឆាំង និងអង្គការមិនមែនរដ្ឋាភិបាល ដែលមានរបៀវារៈនយោបាយ។ ហើយពាក្យពេចន៍ក្នុងរបាយការណ៍ទាំងនោះ ពិតជាត្រូវបានចម្លងពីប្រភពតែមួយ ហើយអ្វីដែលគួរឲ្យសោកស្ដាយបំភុតគឺ ពាក្យពេចន៍ទាំងនោះ ត្រូវបានគេបញ្ចូលក្នុងសេចក្ដីសម្រេចចិត្តរបស់សភាEUនេះ។
ចំពោះការព្រមានលើកិច្ចព្រមព្រៀងអនុគ្រោះពន្ធលើការនាំចេញគ្រប់មុខទំនិញទាំងអស់លើកលែងតែអាវុធ (EBA) ត្រូវបានសេចក្ដីថ្លែងការណ៍របស់ក្រសួងការបរទេសថា ជាការសម្រេចចិត្តដែលមិនអើពើដោយចេតនា និងមិនយកចិត្តទុកដាក់ ចំពោះកិច្ចខិតខំប្រឹងប្រែង របស់រដ្ឋាភិបាលកម្ពុជា។ កិច្ចខិតខំប្រឹងប្រែងលើការដោះស្រាយបញ្ហាស្មុគស្មាញដូចជាបញ្ហាដីធ្លី ឬការដាក់បទបញ្ញតិ្តសង្គម និងទំនាក់ទំនងរវាងនិយោជក និងនិយោជិត នៅក្នុងសង្គមមួយដែលមិនធ្លាប់បានជួបប្រទះ។ តំណាងរដ្ឋាភិបាលកម្ពុជា បានហៅការអនុម័តរបស់សភាEU ថាជាការសម្រេចដែលលំអៀង និងមានស្តង់ដារពី។
ស្ថានបេសកកម្មកម្ពុជា បានហៅមនុស្សដែលសភាEU ស្ដាប់ និងជឿនោះ ជាមនុស្សដែលធ្វើឲ្យមានការបែកបាក់សង្គម ហើយអំពាវនាវឲ្យមានការស្អប់ខ្ពើមជាតិសាសន៍ និងញុះញង់ ឲ្យមានការរើសអើងជនបរទេស។ សកម្មភាពរបស់បុគ្គលទាំងនោះត្រូវបានបញ្ឈប់ព្រោះជាទង្វើដែលបង្កឲ្យមានហានិភ័យដល់សន្តិភាព និងសុន្តិសុខសាធារណៈ។ ហើយអ្នកបង្ករឿង ដែលប្រទេសអឺរ៉ុបមួយចំនួន បានចាត់ទុកថាជាអ្នករងគ្រោះប្រជាធិបតេយ្យនោះ បានបង្កើតឲ្យមានភាពតានតឹងជាអចិន្ត្រៃយ៍រវាងកម្ពុជា ជាមួយប្រទេសជិតខាងដ៏ធំមួយ និងបានរារាំងដល់ការដោះស្រាយបញ្ហាព្រំដែន។
តាមរយៈសេចក្ដីថ្លែងការណ៍បានឲ្យដឹងថា រដ្ឋាភិបាលកម្ពុជាបានផ្ដល់តម្លៃចំពោះកិច្ចពិភាក្សាដេញដោលបែបប្រជាធិបតេយ្យ ថាជាកិច្ចសន្ទនាដែលកំពុងដំណើរការរវាងតួអង្គជាតិទាំងឡាយ ដោយឈរលើគោលការណ៍គោរពគ្នា ទៅវិញទៅមក ការឯកភាពជាតិ និងគោរពយ៉ាងខ្ជាប់ខ្ជួនចំពោះកិច្ចសហប្រតិបត្តិការអន្តរជាតិ។ តែកម្ពុជាសោកស្ដាយដែលគំនិតប្រជាធបិតេយ្យលក្ខណៈកម្ពុជា ត្រូវបានប្រទេសលោកខាងលិចមិនផ្ដល់តម្លៃ និងមិនទទួលយក។
ជាការកត់សម្គាល់នៅចុងខែសីហា ពោលគឺមុនពេលមានការអនុម័តរបស់សភាEU សម្ដេចនាយករដ្ឋមន្ត្រី ហ៊ុន សែន បានស្នើឲ្យមនាការដោះលែងសកម្មជនគណបក្សសង្គ្រោះជាតិទាំងអស់ឲ្យមានសេរីភាពឡើងវិញ។ ហើយក៏មានការដោះលែងអតីតអ្នកសារព័ត៌មានវិទ្យុអាស៊ីសេរី២នាក់ ឲ្យនៅក្រៅឃុំបណ្ដោះអាសន្នផងដែរ និងចុងក្រោយនៅយប់ថ្ងៃទី៩ ឈានចូលថ្ងៃទី១០ ខែកញ្ញា តុលាការបានសម្រេចដោះលែងលោក កឹម សុខា ឲ្យនៅក្រៅឃុំដូចគ្នា តែលោកត្រូវបានហាមឃាត់មិនឲ្យជួបជាមួយសកម្មជនគណបក្សសង្គ្រោះជាតិ និងចេញក្រៅផ្ទះនោះទេ ៕