ជាតិ
លោក ជា សុផារ៉ា៖ សំណង់ដែលមិនព្រមធ្វើប្រព័ន្ធលូឲ្យត្រឹមត្រូវនៅព្រះសីហនុ ត្រូវផ្អាកបណ្ដោះអាសន្ន
×![]()
ភ្នំពេញ៖ សំណង់អគារលំនៅឋាន និងពាណិជ្ជកម្មទាំងអស់នៅខេត្តព្រះសីហនុ ត្រូវរៀបចំប្រព័ន្ធលូ និងអាងប្រព្រឹត្តកម្មទឹកកខ្វក់ឲ្យបានត្រឹមត្រូវ បើមិនដូច្នោះទេសំណង់ទាំងនោះនឹងត្រូវផ្អាកការសាងសង់ ឬផ្អាកដំណើរការអាជីវកម្មបណ្ដោះអាសន្ន។ នេះបើតាមលិខិតរបស់លោក ជា សុផារ៉ា ប្រធានគណៈកម្មាធិការគ្រប់គ្រង និងអភិវឌ្ឍន៍តំបន់ឆ្នេរសមុទ្រកម្ពុជា និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ នៅថ្ងៃទី១៨ខែកញ្ញានេះ ដែលបញ្ជូនមកអភិបាលខេត្តព្រះសីហនុ។
បើតាមលិខិតដដែលនេះ រាល់សំណង់អគារលំនៅឋាន ពាណិជ្ជកម្ម សេវាកម្ម សណ្ឋាគារ ភោជនីយដ្ឋាន និងរោងចក្រ ដែលមានស្រាប់ ឬគម្រោងសាងសង់ថ្មី ត្រូវរៀបចំឲ្យមានអាងប្រព្រឹត្តកម្មទឹកកខ្វក់ អាងបង្គន់អនាម័យ និងប្រព័ន្ធលូ ក្នុងទីតាំងដីឡូត៍រៀងៗខ្លួនជាមុន ស្របតាមមុខងារប្រើប្រាស់អគារ និងបទដ្ឋានបច្ចេកទេសសំណង់ និងបរិស្ថានល្អ។ រួចហើយសំណង់ទាំងនោះត្រូវរៀបចំប្រព័ន្ធលូតភ្ជាប់ទឹកកខ្វក់ដែលចម្រោះរួចនេះ ចូលទៅប្រព័ន្ធលូសាធារណៈរបស់ខេត្ត ដែលហូរតភ្ជាប់ទៅស្ថានីយប្រព្រឹត្តកម្មទឹកកខ្វក់របស់ខេត្តព្រះសីហនុ។
លិខិតដែលបញ្ជូនមកអភិបាលខេត្តព្រះសីហនុ និងជាប្រធានគណៈកម្មាធិការគ្រប់គ្រង និងអភិវឌ្ឍន៍តំបន់ឆ្នេរសមុទ្រកម្ពុជាខេត្តព្រះសីហនុនេះ បានបញ្ជាក់ថា ការអនុវត្តវិធានការខាងលើនេះ គឺដើម្បីធានាការអភិវឌ្ឍប្រកបដោយចីរភាព ផាសុកភាព សោភ័ណភាព គុណភាពទឹកសមុទ្រ និងឆ្នេរខ្សាច់កម្សាន្ត ឲ្យស្របតាមកិត្តិនាមជាសមាជិកក្លិបឆ្នេរសមុទ្រដែលស្អាតបំផុតលើសកលលោក។
ក្នុងករណីសំណង់ណាដែលមិនបានអនុវត្តតាមសេចក្ដីណែនាំនេះ អភិបាលខេត្តព្រះសីហនុ ត្រូវចាត់វិធានការផ្អាកការសាងសង់ និងផ្អាកការធ្វើអាជីវកម្មជាបណ្ដោះអាសន្ន រហូតដល់មានការរៀបចំអាងប្រព្រឹត្តកម្មទឹកកខ្វក់ អាងបង្គន់អនាម័យ និងប្រព័ន្ធលូសមស្របតាមការណែនាំខាងលើ។ លិខិតដដែលនេះបញ្ជាក់ដូច្នេះ។
ការណែនាំខាងលើនេះ ជាវិធានការមួយក្នុងការបញ្ចៀសការបង្ហូរទឹកកខ្វក់ចូលក្នុងទឹកសមុទ្រ ឬតំបន់ឆ្នេរ។ គួរបញ្ជាក់ផងដែរថា ឆ្នេរសមុទ្រនៅខេត្តព្រះសីហនុ ក្នុងពេលថ្មីៗនេះ បានរងការប៉ះពាល់ពីករណីធំៗចំនួនពីរ គឺករណីទី១ ក្រុមហ៊ុនឯកជនបានចាក់ដីលុបឆ្នេរព្រែកត្រែង។ និងករណីទី២ ទឹកសមុទ្រមួយផ្នែកបានប្រែជាល្អក់ ដោយអ្នកនាំពាក្យក្រសួងបរិស្ថានប្រាប់ថាព្រោះទឹកភ្លៀវបានហូរយកអាចម៍ដីរបស់ការដ្ឋានសំណង់ចូលសមុទ្រ៕
Tag:
សំណង់
ព្រះសីហនុ
ឆ្នេរសមុទ្រ
© រក្សាសិទ្ធិដោយ thmeythmey.com
