អន្តរជាតិ
មេដឹកនាំកូរ៉េទាំងពីរក្នុងសន្និសីទសារព័ត៌មានថ្ងៃទី១៩ ខែកញ្ញា (រូបភាព AP)
×![]()
កូរ៉េខាងត្បូង និងកូរ៉េខាងជើង នៅថ្ងៃទី ១៩ កញ្ញា បានយល់ព្រមចាប់ផ្ដើមគម្រោងហេដ្ឋារចនាសម្ព័ន្ធរួមគ្នា ដែលនឹងភ្ជាប់ផ្លូវថ្នល់ និងផ្លូវដែកកាត់ព្រំដែនរបស់ពួកគេនាឆ្នាំ២០១៨នេះ។
«កូរ៉េទាំង២ នឹងចាប់ផ្ដើមគម្រោងហេដ្ឋារចនាសម្ពន្ធសម្រាប់ភ្ជាប់ផ្លូវថ្នល់ និងផ្លូវដែក ដែលរត់កាត់តាមឆ្នេរភាគខាងលិច និងឆ្នេរភាគខាងកើតនៃប្រទេសទាំង២»។ នេះបើតាមសេចក្ដីប្រកាសរួមគ្នារវាងកូរ៉េទាំង២នេះ។
ជាមួយគ្នានេះ កូរ៉េទាំង ២ ក៏បានយល់ព្រមពង្រឹងការផ្លាស់ប្តូរ និងកិច្ចសហប្រតិបត្តិការតាមព្រំដែន ព្រមទាំងធ្វើការរួមគ្នាដើម្បីការអភិវឌ្ឍសេដ្ឋកិច្ច ដែលមានលំនឹងក្នុងឧបទ្វីបកូរ៉េផងដែរ។
យោងតាមទីភ្នាក់ងារព័ត៌មាន Yonhaps កិច្ចព្រមព្រៀងនេះ ត្រូវបានបង្កើតឡើងអំឡុងជំនួបកំពូលរវាងប្រធានាធិបតីកូរ៉េខាងត្បូង លោកមូន ចេអ៊ីន និងមេដឹកនាំកូរ៉េខាងជើង លោក គីម ជុងអ៊ុន នៅក្រុងព្យុងយ៉ាង កូរ៉េខាងជើង។
គួរបញ្ជាក់ថា ការសម្រេចចិត្តនេះគឺធ្វើឡើង បន្ទាប់ពីមេដឹកនាំនៃកូរ៉េទាំង២ បានសម្រេចកិច្ចព្រមព្រៀងមួយអំឡុងជំនួបអន្តរកូរ៉េលើកទី១កាលពីខែមេសាកន្លងទៅ។ ក្នុងកិច្ចព្រមព្រៀងនេះ រដ្ឋទាំង២នេះ បានយល់ព្រមធ្វើទំនើបកម្ម និងភ្ជាប់ប្រព័ន្ធផ្លូវថ្នល់ និងផ្លូវដែក ឆ្លងកាត់ព្រំដែនរបស់ប្រទេសពួកគេ។ ទាក់ទិននឹងរឿងនេះដែរ រដ្ឋាភិបាលសេអ៊ូល បានបង្កើតកញ្ចប់ថវិកាជាង២៦៧,៣៨ លានដុល្លារសម្រាប់ឆ្នាំ២០១៩ ក្នុងគោលបំណងដំណើរការគម្រោងទាំងនេះ៕
Tag:
កូរ៉េខាងជើង
កូរ៉េខាងត្បូង
កិច្ចព្រមព្រៀងហេដ្ឋារចនាសម្ព័ន្ធ
© រក្សាសិទ្ធិដោយ thmeythmey.com
