កីឡាជាតិ
ជាតិ
ស្រួង ភាវី ប៉ះជប៉ុននៅវគ្គ១/២ផ្តាច់ព្រ័ត្រជើងឯកស្នូកឃ័រពិភពលោក
× កីឡាការិនីស្នូកឃ័រ និងប៊ីយ៉ាឆ្នើមកម្ពុជា ស្រួង ភាវី បានឡើងទៅវគ្គពាក់កណ្តាលផ្តាច់ព្រ័ត្រក្នុងព្រឹត្តិការណ៍ 3-Cushion - World Championship Ladies នៅប្រទេសទួកគី ក្រោយទម្លាក់កីឡាការិនីកូឡុំប៊ីនៅវគ្គ៨នាក់ចុងក្រោយ។ នៅក្នុងវគ្គនេះ ភាវី ត្រូវប្រជែងជាមួយកីឡាការិនី Orie Hida ដែលនាងបានយកឈ្នះយ៉ាងតានតឹងនៅវគ្គជម្រុះតាមពូល។
មុនឡើងមកជួបគ្នានៅវគ្គពាក់កណ្តាលផ្តាច់ព្រ័ត្រ កីឡាការិនីឆ្នើមកម្ពុជា ស្រួង ភាវី បានទម្លាក់កីឡាការិនីកូឡុំប៊ី Claudia Lalinde ជាមួយលទ្ធផល ៣០-១៦ នៅវគ្គ៨នាក់ចុងក្រោយ ខណៈកីឡាការិនីជប៉ុន Orie Hida ទម្លាក់កីឡាការិនីកូរ៉េខាងត្បូង Bo-Mi 2 Kim ក្នុងលទ្ធផល ៣០-២៨។
កីឡាការិនីទាំងពីរបានជួបគ្នាម្តងរួចមកហើយ នាជំនួបវគ្គជម្រុះពូល A ដោយកីឡាការិនី ស្រួង ភាវី យកឈ្នះកីឡាការិនីជប៉ុនក្នុងលទ្ធផលយ៉ាងប្រផិតប្រផើយ ២៥-២៤។ តើ ភាវី អាចយកឈ្នះកីឡាការិនីជប៉ុនរូបនេះ ដើម្បីឡើងទៅវគ្គផ្តាច់ព្រ័ត្រពានរង្វាន់ 3-Cushion - World Championship Ladies នៅរសៀលថ្ងៃទី២០ ខែកញ្ញា នេះបានឬយ៉ាងណា?
នៅវគ្គជម្រុះពូល A ស្រួង ភាវី បានយកឈ្នះកីឡាការិនីដាណឺម៉ាក Steffi Daske ក្នុងលទ្ធផល ២៥-១១, ឈ្នះកីឡាការិនីដាណឺម៉ាក Jeanette Jensen ២៥-៧ និងឈ្នះកីឡាការិនីជប៉ុន Orie Hida ក្នុងលទ្ធផល ២៥-២៤។
នេះជាលើកទី១ សម្រាប់កីឡាការិនីមានស្រុកកំណើតនៅខេត្តត្បូងឃ្មុំរូបនេះ ដែលប្រកួតក្នុងនាមជាកីឡាការិនីកម្ពុជា បន្ទាប់ពីបង្កើតឲ្យមានសហព័ន្ធកីឡាស្នូកឃ័រ និងប៊ីយ៉ាកម្ពុជាក្នុងអំឡុងឆ្នាំ២០១៨ កន្លងទៅ។ ប៉ុន្តែ ស្រួង ភាវី ធ្លាប់ចូលរួមព្រឹត្តិការណ៍នេះជាច្រើនរួចមកហើយ និងធ្លាប់ឈ្នះពានជាច្រើនលើកផងដែរ។
ស្រួង ភាវី បានទៅរួមរស់ជាមួយស្វាមីជនជាតិកូរ៉េ នៅប្រទេសកូរ៉េអស់រយៈពេល៧ឆ្នាំហើយ។ អ្វីដែលជាមោទកភាពបំផុតនោះ គឺ ស្រួង ភាវី មិនព្រមចូលសញ្ជាតិកូរ៉េនោះទេ ដោយសារនាងចង់លើកកិត្តិយសនិងកេរ្តិ៍ឈ្មោះឲ្យកម្ពុជាតាមរយៈកីឡាមួយនេះ។ កាលពីពេលថ្មីៗកន្លងទៅ កីឡាការិនីរូបនេះ ត្រូវបានប្រធានសហព័ន្ធកីឡាស្នូកឃ័រ និងប៊ីយ៉ាកម្ពុជា ជ្រើសតាំងឲ្យរូបនាង ឲ្យធ្វើជាសមាជិកសហព័ន្ធ៕
Tag:
ប៊ីយ៉ា និងស្នូកឃ័រ
ស្រួង ភារី
© រក្សាសិទ្ធិដោយ thmeythmey.com