អន្តរជាតិ
អាមេរិក ត្រៀមចរចាភ្លាមៗជាមួយកូរ៉េខាងជើង ដើម្បីរំសាយនុយក្លេអ៊ែរត្រឹមដើមឆ្នាំ២០២១ រដ្ឋមន្រ្តីការបរទេសអាមេរិក ម៉ៃ ប៉ុមប៉េអូ (រូបភាព AFP)
× រដ្ឋមន្ត្រីការបរទេសអាមេរិក ម៉ៃ ប៉ុមប៉េអូ នៅថ្ងៃទី១៩ ខែកញ្ញា បានស្វាគមន៍ប្រកាសការប្ដេជ្ញាចិត្តរបស់មេដឹកនាំកូរ៉េខាងជើងក្នុងការឈានទៅរំសាយនុយក្លេអ៊ែរ។ លោក ប៉ុមប៉េអូ អះអាងថា ក្រុងវ៉ាស៊ីនតោនត្រៀមខ្លួនស្រេចដើម្បីចរចាជាមួយក្រុងព្យុងយ៉ាងភ្លាមៗ សំដៅលុបបំបាត់នុយក្លេអ៊ែរពីឧបទ្វីបកូរ៉េនៅក្នុងត្រឹមចុងអាណត្តិរបស់ប្រធានាធិបតី ដូណាល់ ត្រាំ ។ នេះជាសញ្ញានៃការវិលត្រឡប់រកការចរចាឡើងវិញរវាងភាគីទាំងពីរ ក្រោយជាប់គាំងច្រើនសប្ដាហ៍មកនោះ។
ទាំងប្រធាធិបតី ទាំងរដ្ឋមន្ត្រីការបរទេសរបស់អាមេរិក បានសាទរលទ្ធផលជំនួបមេដឹកនាំកូរ៉េនៅទីក្រុងព្យុងយ៉ាង ដែលមេដឹកនាំកូរ៉េខាងជើងបានសន្យាចាត់វិធានការថែមទៀតក្នុងការរំសាយនុយក្លេអ៊ែរ។ ក្រោយជំនួបពីរថ្ងៃ មេដឹកនាំកូរ៉េខាងជើង គីម ជុងអ៊ុន បានបង្ហាញជាថ្មីការប្ដេជ្ញាចិត្តរបស់ខ្លួនក្នុងការប្រែក្លាយឧបទ្វីបកូរ៉េទៅជាតំបន់គ្មាននុយក្លេអ៊ែរ និងត្រៀមខ្លួនបិទទីតាំងនុយក្លេអ៊ែរមួយទៀត បើអាមេរិកចាត់វិធានការតបវិញដែរ។
ភ្លាមៗក្រោយការប្រកាសរបស់មេដឹកនាំកូរ៉េខាងជើង ប្រធានាធិបតី ដូណាល់ ត្រាំ បានបង្ហោះសារតាម Twitter របស់លោក និងចាត់ទុកវាជារឿងដ៏ល្អ និងគួរឲ្យរីករាយ។ ចំណែកឯរដ្ឋមន្ត្រីការបរទេស ម៉ៃ ប៉ុមប៉េអូ ក៏ប្រកាសត្រៀមចរចាជាមួយកូរ៉េខាងជើងភ្លាមដែរ។ បើតាមទីភ្នាក់ងារព័ត៌មាន AFP លោក ប៉ុមប៉េអូ ចាត់ទុកការប្ដេជ្ញាចិត្តខាងលើ គឺរឿងដ៏សំខាន់ ហើយអាមេរិកត្រៀមរួចហើយដើម្បីចាប់ផ្ដើមការចរចាជាមួយកូរ៉េខាងជើងដើម្បីឈានដល់ការរំសាយនុយក្លេអ៊ែរនៅបីឆ្នាំទៀត។
ស្របពេលស្ថានភាពល្អបន្តិចនោះ លោក ប៉ុមប៉េអូ ក៏បានជជែកតាមទូរសព្ទជាមួយសមភាគីកូរ៉េខាងជើង រី យ៉ុងហូ និងត្រៀមជួបគ្នាទល់មុខនៅទឹកដីអាមេរិក ក្រៅជំនួបប្រចាំឆ្នាំមហាសន្និបាតអង្គការសហប្រជាជាតិនៅសប្ដាហ៍ក្រោយ។ ប្រមុខការទូតអាមេរិករូបនេះក៏អញ្ជើញមន្ត្រីកូរ៉េខាងជើងឲ្យជួបជាមួយតំណាងពិសេសទទួលបន្ទុកកូរ៉េខាងជើង Stephen Biegun នៅឯអូទ្រីសឲ្យបានឆាប់តាមតែអាចធ្វើបានផង។
សម្រាប់លោក ប៉ុមប៉េអូ គម្រោងជំនួបនៅទីក្រុងវីយែន គឺជាឱកាសចាប់ផ្ដើមការចរចាដើម្បីផ្លាស់ប្ដូរទំនាក់ទំនងអាមេរិក និងកូរ៉េខាងជើងតាមរយៈការលុបបំបាត់នុយក្លេអ៊ែរឲ្យបានឆាប់ គឺនៅខែមករា ឆ្នាំ២០២១ ដែលលោក គីម ក៏សម្រេចចិត្តតាមកាលបរិច្ឆេទនេះដែរ។ លើសពីនោះ ការចរចានៅអូទ្រីសក៏នឹងជួយបង្កើតសន្តិភាពយូរអង្វែង និងស្ថិរភាពនៅឧបទ្វីបកូរ៉េដែរ។ ការពង្រឹងទំនាក់ទំនងភាគី គឺអ្វីដែលលោក ត្រាំ និងលោក គីម សន្យាគ្នាកាលពីជំនួបនៅសិង្ហបុរី។
កូរ៉េខាងជើងយល់ព្រមបិទទីតាំងបាញ់មីស៊ីល Dongchang-ri និងជើងទម្រសម្រាប់បាញ់មីស៊ីល ហើយកូរ៉េខាងជើងនឹងអញ្ជើញអ្នកជំនាញពីប្រទេសពាក់ព័ន្ធឲ្យធ្វើជាសាក្សីផង។ ការបិទទីតាំងនេះ ធ្វើឡើងបន្ទាប់ពីកូរ៉េខាងជើងបានកម្ទេចទីតាំងសាកល្បងនុយក្លេអ៊ែរដ៏ធំរបស់ខ្លួននៅ Punggye-ri រួចមក។ ក្រៅពីសុខចិត្តបិទកន្លែងបាញ់មីស៊ីលនេះ កូរ៉េខាងជើងក៏ចង់បន្តអនុវត្តជំហានផ្សេងដើម្បីសម្រេចឲ្យបានការរំសាយនុយក្លេអ៊ែរ ប៉ុន្តែអាមេរិកក៏ត្រូវឆ្លើយតបនឹងទង្វើរបស់ខ្លួនសិនដែរ៕
Tag:
អាមេរិក
កូរ៉េខាងជើង
កូរ៉េខាងត្បូង
ម៉ៃ ប៉ុមប៉េអូ
© រក្សាសិទ្ធិដោយ thmeythmey.com