FIFA Ranking៖ បែលហ្ស៊ិកឡើងឈរលេខ១ស្ទួនជាមួយបារាំង ខណៈកម្ពុជាធ្លាក់៣លេខ

កីឡាអន្តរជាតិ

អន្តរជាតិ

FIFA Ranking៖ បែលហ្ស៊ិកឡើងឈរលេខ១ស្ទួនជាមួយបារាំង ខណៈកម្ពុជាធ្លាក់៣លេខ

21, Sep 2018 , 7:39 pm

រូបភាព

ដោយ: ទេព ពិទូរ្យ

ក្រុមកីឡាបាល់ទាត់ជម្រើសជាតិបែលហ្ស៊ិក និងបារាំងស្ថិតនៅលេខរៀងទី១ពិភពលោកនៃតារាងចំណាត់ថ្នាក់ FIFA Ranking ដែលនេះជាលើកដំបូងហើយក្នុងប្រវត្តិសាស្ត្រកីឡាបាល់ទាត់ក្នុងរយៈពេល២៥ឆ្នាំដែលមានប្រទេស២ឈរនៅកំពូលតារាងស្ទួនដូច្នេះ។ នេះបើតាមការចេញផ្សាយពីគេហទំព័រផ្លូវការរបស់សហព័ន្ធកីឡាបាល់ទាត់អន្តរជាតិ FIFA នៅថ្ងៃទី២០ ខែកញ្ញា ឆ្នាំ២០១៨។

អត្ថបទទាក់ទង

FIFA Ranking៖ បារាំងឡើងឈរលេខ១ ខណៈកម្ពុជារក្សាលេខ១៦៦ដដែល

បែលហ្ស៊ិកបានទទួលជ័យជម្នះ២លើកចុងក្រោយដែលរួមទាំងការឈ្នះអ៊ីស្លង់ក្នុងការប្រកួតបើកឆាកពានរង្វាន់ UEFA Nations League ដើម្បីនាំពួកគេទៅចូលរួមជាមួយបារាំងនៅកំពូលតារាងចំណាត់ថ្នាក់ពិភពលោកជាក្រុមដែលបានផ្តួលខ្លួននៅក្នុងការប្រកួតវគ្គពាក់កណ្តាលផ្តាច់ព្រ័ត្រ World Cup នៅរុស្ស៊ី ឆ្នាំ២០១៨ កន្លងទៅ។

ក្រុមរហស្សនាមបិសាចក្រហមដែលមានគ្រូបង្វឹកលោក Roberto Matinez បានកើន១ពិន្ទុទៀតដើម្បីស្មើនឹងក្រុមមាន់គកបារាំងដែលមានពិន្ទុសរុប ១៧២៩។

ការផ្លាស់ប្តូរចំណាត់ថ្នាក់ផ្សេងទៀតសម្រាប់ក្រុមកំពូលទាំង១០ (Top 10) មើលឃើញថាដាណឺម៉ាកបានធ្លាក់ទៅលេខ១០ ក្រោយនៅលេខ៩ស្ទួនជាមួយអេស្ប៉ាញ។ ប្រេស៊ីលនៅរក្សាចំណាត់ថ្នាក់ទី៣ដដែល ហើយក្រូអាស៊ី អ៊ុយរ៉ូហ្គាយ អង់គ្លេស ព័រទុយហ្គាល់ និងស្វីសនៅលេខរៀងបន្តបន្ទាប់។

ដោយឡែកក្រុមម្រើសជាតិកម្ពុជាក្រោយបរាជ័យក្នុងដីខ្លួនឯងក្រោមថ្វីជើងម៉ាឡេស៊ីក្នុងលទ្ធផល ៣-១ នាជំនួបមិត្តភាពអន្តរជាតិកន្លងទៅបានធ្លាក់ចំនួន៣លេខក្នុងតារាងចំណាត់ថ្នាក់ FIFA Ranking ដោយឈរនៅលេខរៀងទី១៦៩ពិភពលោកវិញ។ យ៉ាងណា ម៉ាឡេស៊ីនៅតែស្ថិតក្រោមកម្ពុជាដដែលដោយឈរនៅចំណាត់ថ្នាក់ទី១៧១ ខណៈសិង្ហបុរីហក់ឡើងទៅលេខរៀងទី១៦៦ពិភពលោកវិញ។