លោក ស សុខា ជឿជាក់ថា ការប្រកួតកីឡាសិស្សទូទាំងប្រទេសដំណើរការទៅរលូន

កីឡាជាតិ

ជាតិ

លោក ស សុខា ជឿជាក់ថា ការប្រកួតកីឡាសិស្សទូទាំងប្រទេសដំណើរការទៅរលូន

21, Sep 2018 , 9:59 pm

រូបភាព

លោក ស សុខា (មុខគេ)ចូលរួមបើកការប្រកួតកីឡាសិស្សឧត្តមសិក្សា និងមធ្យមសិក្សាបច្ចេកទេសជ្រើសរើសជើងឯកឆ្នាំ២០១៨, រូបភាពទាំងអស់ពីហ្វេសប៊ុកអគ្គនាយកដ្ឋានកីឡា

ដោយ:

លោក ស សុខា រដ្ឋលេខាធិការក្រសួងអប់រំ យុវជន និងកីឡា ប្រាប់អាជ្ញាកណ្តាលចៅក្រម កាត់ក្តីឲ្យបានត្រឹមត្រូវ និងឈរលើភាពយុត្តិធម៌។ ព្រោះលោកយល់ថា ការសម្រេចចិត្តរបស់ពួកគាត់ ជាការកំណត់ជោគវាសនារបស់កីឡាករ។ ការជំរុញបែបនេះ ធ្វើឡើងពេល លោក ចូលរួមបើកការប្រកួតកីឡាសិស្សឧត្តមសិក្សា និងមធ្យមសិក្សាបច្ចេកទេស ជ្រើសជើងឯកទូទាំងប្រទេសប្រចាំឆ្នាំ២០១៨។ បើតាមរបាយការណ៍ ការប្រកួតឆ្នាំនេះ មានគ្រឹះស្ថានសិក្សាចំនួន២១ចូលរួម ដោយប្រកួតលើ៦ប្រភេទកីឡា។

ក្រោយទទួលបានការតែងតាំងជារដ្ឋលេខាធិការក្រសួងអប់រំ យុវជន និងកីឡាប្រមាណ១សប្តាហ៍ លោក ស សុខា បានធ្វើជាតំណាងលោក ហង់ ជួន ណារ៉ុន រដ្ឋមន្ត្រីក្រសួងអប់រំលើកដំបូង ក្នុងពិធីបើកការប្រកួតកីឡាសិស្សឧត្តមសិក្សា និងមធ្យមសិក្សាបច្ចេកទេសជ្រើសរើសជើងឯកទូទាំងប្រទេសប្រចាំឆ្នាំ២០១៨ កាលពីថ្ងៃទី២០ ខែកញ្ញា ឆ្នាំ២០១៨ នៅវិមានពហុកីឡដ្ឋានជាតិ។

ក្នុងពិធីបើកនោះដែរ លោក ស សុខា ដែលទទួលបន្ទុកផ្នែកយុវជននិងកីឡា បានក្រើនរំលឹកដល់អាជ្ញាកណ្តាលចៅក្រមត្រូវកាត់ក្តីឲ្យបានត្រឹមត្រូវនិងយុត្តិធម៌ ហើយចៀសវាងការប្រកាន់បក្សពួកនិយមថា កីឡាករនេះ កូនសិស្សគ្រូនេះ ឬគ្រូនោះឲ្យសោះ ព្រោះលោកយល់ថា ការសម្រេចចិត្តរបស់អាជ្ញាកណ្តាលចៅក្រម ជាការកំណត់ជោគវាសនារបស់កីឡាករក្នុងដំណើរឆ្ពោះទៅរកភាពជោគជ័យនៅថ្ងៃអនាគត។

ជាមួយគ្នានេះ លោក ស សុខា ស្នើឲ្យកីឡាករកីឡាការិនី ត្រូវមានការយោគយល់ និងទទួលយករាល់ការសម្រេចរបស់អាជ្ញាកណ្តាលចៅក្រម។ ការស្នើបែបនេះ ព្រោះលោកយល់ថា ការកាត់ក្តីដោយភ្នែកទទេមិនអាចសុក្រឹត្យ១០០ភាគរយនោះទេ។ ហើយបើមានករណីមិនប្រក្រតីកើតឡើង កីឡាករ ក៏មិនត្រូវទាមទារភ្លាមៗនៅលើទីលានដែរ គឺត្រូវទាមទារក្រោយចប់ការប្រកួត ដើម្បីបង្ហាញពីការចេះដឹង និងទំនួលខុសត្រូវក្នុងនាមជាអ្នកកីឡា។

សម្រាប់លោក ស សុខា ការឈ្នះចាញ់ជារឿងធម្មតាក្នុងកីឡា តែអ្វីដែលសំខាន់កីឡាករកុំបោះបង់ការតស៊ូព្យាយាម ហើយត្រូវចេះសិក្សាពីចំណុចខ្វះខាត ដែលនាំឲ្យខ្លួនបរាជ័យ ដើម្បីអភិវឌ្ឍន៍សមត្ថភាពទៅថ្ងៃអនាគត។ កីឡាករគ្រប់រូបត្រូវចាប់យកកីឡាមួយប្រភេទឲ្យច្បាស់លាស់ ជាជាងចាប់យកកីឡាច្រើនប្រភេទក្នុងពេលតែមួយ។ ជាការជំរុញរបស់រដ្ឋលេខាធិការក្រសួងអប់រំ យុវជននិងកីឡាខាងលើ ដែលបានលើជាទស្សនថា «ចេះច្រើនមិនស្មើប្រសប់មួយ»។

បើតាមរបាយការណ៍ ដែលអានដោយលោក ដួង មាសចំរើន ប្រធានសហព័ន្ធកីឡាសិស្សនិស្សិតកម្ពុជា ការប្រកួតកីឡាសិស្សឧត្តមសិក្សានិងមធ្យមសិក្សាបច្ចេកទេសជ្រើសរើសជើងឯកទូទាំងប្រទេសឆ្នាំនេះ មានគ្រឹះស្ថានសិក្សាចំនួន២១ចូលរួម និងមានប្រតិភូគ្រូបង្វឹក និងកីឡាករសរុបចំនួន៦៨១នាក់(ស្រី៩៤)។ កីឡាករទាំងនេះ ប្រកួតប្រជែងលើ៦ប្រភេទកីឡារួមមាន បាល់ទាត់, បាល់ទះ, បាល់បោះ, អត្តពលកម្ម, វាយកូនឃ្លីលើតុ និងប៉េតង់៕