កីឡាអន្តរជាតិ
អន្តរជាតិ
Aguero បន្ថែម១ឆ្នាំទៀតនៅ Man City ដោយបានបៀវត្សជិត៣០ម៉ឺនដុល្លារក្នុង១សប្តាហ៍
× Sergio Aguero បានយល់ព្រមបន្តកិច្ចសន្យាជាមួយ Manchester City ១ឆ្នាំទៀតលើកិច្ចសន្យាចាស់ពោលគឺរហូតដល់ឆ្នាំ២០២១ ដោយទទួលបានបៀវត្ស ២២០០០០ផោន (២៩០០០០ដុល្លារអាមេរិក) ក្នុង១សប្តាហ៍។
ខ្សែប្រយុទ្ធសញ្ជាតិអាហ្សង់ទីន វ័យ៣០ឆ្នាំរូនេះបានចូលរួមជាមួយក្រុមមេឃខៀវ ពីក្លិបអេស្ប៉ាញ Atletico Madrid កាលពីឆ្នាំ ២០១១ ក្នុងតម្លៃ ៣៨លានផោន (៥០លានដុល្លារអាមេរិក)។
Aguero បានដើរតួយ៉ាងសំខាន់ក្នុងការជួយក្រុមទទួលបានជ័យជម្នះដ៏ធំធេងចាប់តាំងពីចូលរួមជាមួយក្លិបដែលកាន់កាប់ដោយមហាសេដ្ឋីសញ្ញាតិអារ៉ាប់រួមអេមីរ៉ាតលោក Al Mubarak រយៈពេល៧ឆ្នាំមកនេះ ដោយក្នុងនោះបានឈ្នះពាន Premier League ៣ដង និងពានរង្វាន់ EFL ៣លើក។
អតីតយុវជនក្លិប Independiente រូបនេះជាប់ក្នុងកំណត់ត្រាអ្នកស៊ុតបញ្ចូលទីច្រើនជាងគេនៅ Man City ចំនួន ២០៤គ្រាប់។ រូបគេក៏ជាអ្នកស៊ុត១គ្រាប់យកឈ្នះ QPR ទាំងរបួសកាលពីឆ្នាំ ២០១២ និងជាគ្រាប់បាល់ដើម្បីជួយក្រុមមានមូលដ្ឋានក្នុងក្រុង Manchester នេះលើកពាន Premier League ជាលើកដំបូងផងដែរ។
«ខ្ញុំពិតជាសប្បាយចិត្តណាស់ព្រោះពួកគេបានប្រព្រឹត្តល្អចំពោះខ្ញុំចាប់តាំងពីថ្ងៃដំបូងដែលខ្ញុំបានមកដល់ទីនេះ»។ Aguero និយាយបែបនេះ និងបន្ថែមថារូបគេនឹងស្នាក់នៅទីនេះមួយទសវត្សរ៍រហូតដល់កិច្ចព្រមព្រៀងថ្មីរបស់ខ្លួនអស់សុពលភាព ហើយនេះជាមូលហេតុចម្បងដែលគេយល់ព្រមបន្តកិច្ចសន្យាបន្ថែម៕
Tag:
បាល់ទាត់
Sergio Aguero
Manchester City
© រក្សាសិទ្ធិដោយ thmeythmey.com