សម្តេច៖ ការរស់រាននិងការរីកចម្រើនរបស់កម្ពុជា មិនអាចគ្មានការចូលរួមពីវៀតណាមឡើយ

ជាតិ

នយោបាយជាតិ

សម្តេច៖ ការរស់រាននិងការរីកចម្រើនរបស់កម្ពុជា មិនអាចគ្មានការចូលរួមពីវៀតណាមឡើយ

22, Sep 2018 , 2:07 pm

រូបភាព

សម្តេច ហ៊ុន សែន ជួបលោក Luong នៅវិមានសន្តិភាព កាលពីថ្ងៃទី២១ ខែកញ្ញា ឆ្នាំ២០១៨

ដោយ: ថ្មីៗ

ភ្នំពេញ៖ «ភាពរស់រានមានជីវិត និងភាពរុងរឿងរបស់កម្ពុជា មិនអាចកាត់ផ្ដាច់បានពីការចូលរួមចំណែករបស់វៀតណាមបានឡើយ»។ នេះជាប្រសាសន៍របស់សម្តេចនាយករដ្ឋមន្ត្រី ហ៊ុន សែន ដែលលើកឡើងនៅចំពោះមុខលោក Luong Cuong ប្រធានអគ្គស្នងការនយោបាយនៃកងទ័ពវៀតណាម។

ជំនួបរវាងអ្នកទាំងពីរ បានធ្វើឡើងកាលថ្ងៃទី២១ ខែកញ្ញា ឆ្នាំ២០១៨ នៅវិមានសន្តិភាព។ ព័ត៌មាននិងលទ្ធផលស្តីពីជំនួបនេះ ត្រូវបានបង្ហោះលើទំព័រហ្វេសប៊ុករបស់សម្តេច ហ៊ុន សែន។

សារលើទំព័រហ្វេសប៊ុកនោះ បានសរសេរបែបនេះថា៖«សម្ដេច ហ៊ុន សែន បានថ្លែងអំណរគុណចំពោះប្រជាពលរដ្ឋ និងរដ្ឋាភិបាលវៀតណាម ដែលកន្លងមកបានជួយដល់កម្ពុជា»។

ក្រៅពីនេះ ប្រមុខរដ្ឋាភិបាលកម្ពុជា បានសម្តែងការសោកស្ដាយ ចំពោះមរណភាពរបស់លោក Tran Dai Quang ប្រធានាធិបតីវៀតណាម។

អត្ថបទទាក់ទង

ប្រធានាធិបតីវៀតណាម Tran Dai Quang ទទួលមរណភាពក្នុងអាយុ ៦២ឆ្នាំ

ក្នុងជំនួបខាងលើ លោក Luong បានសាទរសម្ដេច ហ៊ុន សែន ក្នុងនាមជាប្រធានគណបក្សកាន់អំណាច ដែលទទួលជោគជ័យសាជាថ្មីក្នុងការបោះឆ្នោត។ បន្ទាប់មក ប្រធានអគ្គស្នងការនយោបាយនៃកងទ័ពវៀតណាមរូបនេះ ក៏បានលើកឡើងពីលទ្ធផលវិជ្ជមាន ដែលទទួលបានពីជំនួបរវាងលោកជាមួយនឹងសម្តេច ទៀបាញ់ រដ្ឋមន្ត្រីក្រសួងការពារជាតិកម្ពុជា។

«លោក Luong បានរាយការណ៍ជូនសម្ដេចតេជោផងដែរថា លោកបានជួបពិភាក្សាជាមួយសម្ដេច ទៀ បាញ់ ដើម្បីវាយតម្លៃពីស្ថានភាពនយោបាយលើពិភពលោក និងក្នុងតំបន់ រួមទាំងការពង្រឹងមិត្តភាព ដើម្បីរក្សាសុខសន្តិភាព ស្ថិរភាព និងការអភិវឌ្ឍសម្រាប់ប្រទេសទាំងពីរ»។ នេះបើតាមព័ត៌មានដែលសរសេរលើទំព័រហ្វេសប៊ុករបស់សម្តេច ហ៊ុន សែន ដដែល៕