ដើម្បីប្រយោជន៍ជាតិ អតីតនាយករដ្ឋមន្ត្រី ថាក់ស៊ីន ចង់ចាប់ផើ្តមកិច្ចសន្ទនាផ្សះផ្សារជាតិ

អន្តរជាតិ

ដើម្បីប្រយោជន៍ជាតិ អតីតនាយករដ្ឋមន្ត្រី ថាក់ស៊ីន ចង់ចាប់ផើ្តមកិច្ចសន្ទនាផ្សះផ្សារជាតិ

22, Sep 2018 , 3:59 pm

រូបភាព

ដោយ:

អតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត់ (Thaksin Shinawatra) បានបង្ហាញការខកចិត្តចំពោះអ្វីដែលបានកើតឡើងនៅក្នុងរាជាណាចក្រថៃ នារយៈពេលជាងមួយទសវត្សរ៍មកនេះ។ លោក អះអាងថា ស្ថានភាពរបស់ប្រទេសកាន់តែអាក្រក់ ក្រោយពីយោធាដឹកនាំ ហើយលោក ក៏ចង់ឲ្យអ្នកពាក់ព័ន្ធនយោបាយផ្តើមកិច្ចសន្ទនាជាមួយនឹងគ្នាដើម្បីប្រយោជន៍ជាតិ។

នៅថ្ងៃ១៨ កញ្ញា ពោលគឺមុនមួយថ្ងៃ នៃខួបលើកទី១២ នៃរដ្ឋប្រហារយោធាទម្លាក់រូបលោកចេញពីតំណែង លោកអតីតនាយករដ្ឋមន្ត្រី ថាក់ស៊ីន ស៊ីណាវ៉ាត់ តាមរយៈទំព័រហ្វេសប៊ុកផ្លូវការរបស់ខ្លួន បានចោទប្រកាន់លើការធ្វើរដ្ឋប្រហារយោធាកន្លងមក ថាជាឬសគល់ ដែលធ្វើឲ្យប្រទេសជាតិ ស្ថិតនៅក្នុងស្ថានភាពមិនល្អ និងត្រូវបានអ្នកខាងក្រៅវាយតម្លៃមិនល្អលើប្រជាជាតិថៃ។

លោកនាយករដ្ឋមន្ត្រី បានរម្លឹកពីការព្យាយាមបំបាត់អ្នកនយោបាយត្រកូល ស៊ីណាវ៉ាត់ ក្នុងរយៈពេល ១២ឆ្នាំមកនេះ តាមរយៈរដ្ឋប្រហារយោធា ខណៈដែល អ្នកនយោបាយវង្សត្រកូលមួយនេះ មានការគាំទ្រភាគច្រើនពីប្រជាជនថៃក៏ដោយ។ លោក បន្តថា មានក្រុមមួយក្តាប់តូចបានក្លាយជាអ្នកមានបាន ខណៈស្ថានភាពសេដ្ឋកិច្ចរបស់ប្រជាជនជារួម កាន់តែអាក្រក់ ដោយសារតែរដ្ឋប្រហារយោធាទាំងពីរលើកនេះ។

ជាមួយនឹងការបន្ទោសនេះផងដែរ លោកអតីតនាយករដ្ឋមន្ត្រី ក៏បានស្នើត្រង់ៗឲ្យអ្នកពាក់ព័ន្ធនយោបាយថៃផ្តើមកិច្ចសន្ទនានយោបាយដើម្បីផលប្រយោជន៍ជាតិវិញ។ « វា គួរតែដល់ពេលហើយ ដែលយើង ត្រូវតទល់មុខគ្នា ហើយចាប់ផ្តើម ជជែកគ្នាដើម្បីផលប្រយោជន៍? ឬមួយ យើងត្រូវបន្តវាយប្រហារគ្នាបែបនេះតទៅទៀត?» នេះ គឺជាការលើកឡើងរបស់លោក ថាក់ស៊ីន នៅក្នុងសំណេរហ្វេសប៊ុកនោះ។

សូមរម្លឹកផងដែរថា លោកថាក់ស៊ីន ស៊ីនណាវ៉ាត់ បានឡើងកាន់តំណែងជានាយករដ្ឋមន្ត្រីថៃនៅឆ្នាំ២០០១ ក៏ប៉ុន្តែ លោក ត្រូវបានរងនូវរដ្ឋប្រហារទម្លាក់ដោយយោធាក្នុងឆ្នាំ២០០៦ ខណៈពេលដែលកំពុងតែដឹកនាំប្រតិភូប្រជុំនៅអង្គការសហប្រជាជាតិ។ រដ្ឋប្រហារយោធាទម្លាក់រូបលោក ដោយក្រោមបទចោទថា លោក បានប្រព្រឹត្តអំពើពុករលួយ និង ប្រើប្រាស់អំណាចខុសច្បាប់។

វាសនាមិនខុសគ្នាផងដែរ នៅឆ្នាំ២០១៤ ប្អូនស្រីបង្កើតរបស់លោក គឺលោកស្រី យីងឡាក់ ស៊ីណាវ៉ាត់ ក៏ត្រូវបានទម្លាក់ចេញពីតំណែងនាយករដ្ឋមន្ត្រី ដោយរដ្ឋប្រហារយោធាដូចគ្នា ក្រោមការចោទប្រកាន់ថា លោកស្រី បានដឹកនាំប្រទេសឲ្យវឹកវរ ខូចសណ្តាប់ធ្នាប់ និងមានបែងចែកនិន្នាការនយោបាយ។ អ្នកនយោបាយទាំងពីរ កំពុងតែក្រោមការចោទប្រកាន់ពីតុលាការថៃ និងដីកាចាប់ខ្លួនផងដែរ៕