ពីនេះ ពីនោះ
ត្រីឆ្ពិន ក៏ជាមុខម្ហូបប្រចាំថ្ងៃ របស់សម្តេចនាយករដ្ឋមន្ត្រី ហ៊ុន សែន ដែរ ស្ត្រីមេផ្ទះម្នាក់ នៅស្រុកកៀនស្វាយ ខេត្តកណ្តាល កំពុងលើកបង្ហាញត្រីឆ្ពិនមួយក្បាល គាត់ទិញពីអ្នកនេសាទ ដែលចាប់បានក្នុងទន្លេមេគង្គ ។ រូបភាព៖ ឈុត ឈាណា
× សម្ដេចនាយករដ្ឋមន្ដ្រី ហ៊ុន សែន បានមានប្រសាសន៍ថា ត្រីឆ្ពិន ក៏ជាអាហារប្រចាំថ្ងៃ ដែលសម្តេចចូលចិត្ត។ ពេលនៅក្នុងគេហដ្ឋាន សម្តេចតែងតែមានត្រីឆ្ពិនអាំង ជ្រលក់ជាមួយទឹកត្រីអម្ពិលទុំ ជាប្រចាំថ្ងៃ។ ថ្លែងនៅក្នុងពិធីជួបសំណេះសំណាល ជាមួយកម្មករ-កម្មការិនី ២៧,៤៤៤នាក់ មកពីរោងចក្រ សហគ្រាសចំនួន២៤ នៅ ក្នុងខេត្តកំពង់ស្ពឺ នៅព្រឹកថ្ងៃពុធ ថ្ងៃទី១៩ ខែកញ្ញា ឆ្នាំ២០១៨ កន្លងទៅនេះ សម្ដេច ហ៊ុន សែន បានមានប្រសាសន៍ថា «ថ្ងៃណាក៏ត្រូវមានត្រីឆ្ពិនមួយដែរ ហើយត្រីឆ្ពិនហ្នឹង អាសូរត្រីឆ្ពិនបឹងទៅ គឺត្រីឆ្ពិនគេចិញ្ចឹមហ្នឹង អានេះឆ្ងាញ់ណាស់ កុំសូវពេក ថ្មើរហ្នឹង ប្រសិនបើមានអ្នកអាំងត្រីហ្នឹង វាធុំក្លិនមកឈ្ងុយហ្មង អានេះ!»។
ខាងក្រោមនេះ គម្រោងអច្ឆរិយភាពនៃទន្លេ Wonders of the Mekong សូមលើកយកត្រីឆ្ពិនចំនួនបួនប្រភេទ មកបង្ហាញជួន។
ទីមួយ៖ ត្រីឆ្ពិនធំ ជាប្រភេទត្រីទឹកសាប មានឈ្មោះវិទ្យាសាស្ត្រ (Hypsibarbus lagleri) មានប្រវែងដងខ្លួនអតិបរមា ៤០ស.ម។ ត្រីប្រភេទនេះ រស់នៅតាមទន្លេធំៗ នៅរដូវប្រាំង ហើយធ្វើចរាចរផ្លាស់ទីចូលទៅទន្លេទំហំមធ្យម ក្នុងរដូវវស្សា។ វាស៊ី វារិជាតិ កូនត្រីតូចៗ ជន្លេន និងពពួកខ្ចៅ ខ្យង និងកំពឹសជាអាហារ។ ត្រីឆ្ពិនមាស ត្រូវបានគេកត់ត្រាចូលក្នុងបញ្ជីក្រហម IUCN Red List (Vulnerable) ក្នុងឆ្នាំ ២០១១ ជាប្រភេទត្រីដែលងាយរងគ្រោះ ដែលនឹងអាចឈានទៅផុតពូជ។
ទីពីរ៖ ត្រីឆ្ពិនមូល ជាប្រភេទត្រីទឹកសាប មានឈ្មោះវិទ្យាសាស្ត្រ (Hypsibarbus malcolmi) និងឈ្មោះជាភាសាអង់គ្លេស Goldfin tinfoil barb។ មានប្រវែងដងខ្លួនអតិបរមា ៥០ ស.ម។ វារស់នៅពាក់កណ្តាលជម្រៅទឹក ដល់បាតក្នុងទន្លេធំ និងមធ្យម។ ក្នុងរដូវប្រាំង វារស់នៅក្នុងទន្លេធំៗ និងចូលទៅក្នុងទន្លេទំហំមធ្យម ក្នុងរដូវវស្សា។ វាស៊ីពពួកសត្វល្អិតតូចៗ ដង្កូវ និងកាកសំណល់ផ្សេងៗ ជាអាហារ។ ត្រីឆ្ពិនមាស ត្រូវបានគេកត់ត្រាចូលក្នុងបញ្ជីក្រហម IUCN Red List (Least Concern) ក្នុងឆ្នាំ ២០១១ ជាប្រភេទត្រីដែលមានការព្រួយបារម្ភតិចតួច ដែលនឹងអាចឈានទៅផុតពូជ។
ទីបី៖ ត្រីឆ្ពិនក្រហម ជាប្រភេទត្រីទឹកសាប មានឈ្មោះវិទ្យាសាស្ត្រ (Hypsibarbus vernayi) មានប្រវែងដងខ្លួនអតិបរមា ២១.៦ ស.ម និងទម្ងន់អតិបរមា ២៥០.០០ក្រាម។ វារស់នៅតាមទន្លេធំ ៗ ជាពិសេសនៅតាមតំបន់ដែលមានរុក្ខជាតិដុះច្រើននៅតាមមាត់ទន្លេ។ វាមិនរស់នៅក្នុងទឹកនឹងទេ។ វាស៊ីកំពឹស និងខ្ចៅ ខ្យង និងរុក្ខជាតិក្នុងព្រៃលិចទឹកជាច្រើនប្រភេទ។ ត្រីឆ្ពិនក្រហម ត្រូវបានគេកត់ត្រាចូលក្នុងបញ្ជីក្រហម IUCN Red List (Least Concern) ក្នុងឆ្នាំ ២០១១ ជាប្រភេទត្រីដែលមានការព្រួយបារម្ភតិចតួច ដែលនឹងអាចឈានទៅផុតពូជ។។
ទីបួន៖ ត្រីឆ្ពិនមាស ជាប្រភេទត្រីទឹកសាប មានឈ្មោះវិទ្យាសាស្ត្រ (Hypsibarbus wetmorei) មានប្រវែងដងខ្លួនអតិបរមា ៤៦ ស.ម និងទម្ងន់អតិរមា ១.៤គីឡូក្រាម។ វារស់នៅពីពាក់កណ្តាលជម្រៅទឹក ទៅដល់បាតទន្លេមធ្យម នៅក្នុងព្រៃលិចទឹក។ ត្រីប្រភេទនេះ មិនត្រូវបានគេដឹងថា វាធ្វើចរាចរផ្លាស់ទីទេ ប៉ុន្តែ វាអាចធ្វើចរាចផ្លាស់ទីទៅខ្សែទឹកខាងលើ នៅកំឡុងពេលកម្រិតទឹកទន្លឡើងខ្ពស់។ វាស៊ីវារិជាតិ កូនត្រីតូចៗ ជន្លេន និងពពួកខ្ចៅខ្យង និងកំពឹសជាអាហារ។ ត្រីឆ្ពិនមាស ត្រូវបានគេកត់ត្រាចូលក្នុងបញ្ជីក្រហម IUCN Red List (Least Concern) ក្នុងឆ្នាំ ២០១១ ជាប្រភេទត្រីដែលមានការព្រួយបារម្ភតិចតួច ដែលនឹងអាចឈានទៅផុតពូជ។
ក្នុងរយៈពេលប៉ុន្មានឆ្នាំចុងក្រោយនេះ ការប្រែប្រួលអាកាសធាតុ ការនេសាទហួសកម្រិត ការប្រើប្រាស់ឧបករណ៍ខុសច្បាប់ដោយប្រើចរន្តអគ្គិសនីឆក់ ដែលគេនិយមហៅថា ឆក់ក្តៅ ឆក់ត្រជាក់ ដែលជាឧបករណ៍នេសាទដ៏គ្រោះថ្នាក់បំផុតសម្រាប់មច្ឆជាតិ និងការសាងសង់ទំនប់វារិអគ្គីសនី សុទ្ធតែជាបញ្ហាប្រឈមដល់កំណើតពួកវា។ ទៅថ្ងៃអនាគត ប្រភេទត្រីចំនួននៅក្នុងប្រទេសកម្ពុជា អាចនឹងឈានទៅផុតពូជ បើពុំមានការចូលរួមពីមជ្ឈដ្ឋានទូទៅ ដើម្បីថែរក្សាការពារធនធានមច្ឆជាតិស្រុកយើងទាំងអស់គ្នាទេនោះ។
© រក្សាសិទ្ធិដោយ thmeythmey.com