ជាតិ
សង្គមជាតិ
លោក អាគីរ៉ា និង គ្នីគ្នាពីរនាក់ទៀត ត្រូវបានដោះលែង លោក អាគីរ៉ា និងគ្នីគ្នា ពេលត្រូវបានឃាត់ខ្លួន
× លោក អាគីរ៉ា ដែលគេឲ្យតម្លៃថាជាវីរបុរសខាងដោះមីននៅកម្ពុជា រួមទាំងគ្នីគ្នាពីរនាក់ទៀត ត្រូវបានចៅក្រមស៊ើបសួរនៃតុលាការខេត្តសៀមរាប ចេញដីកាដោះលែងឲ្យនៅក្រៅឃុំជាបណ្តោះអាសន្ន កាលពីថ្ងៃទី២០ ខែកញ្ញា ឆ្នាំ២០១៨។ នេះបើតាមលោក យិន ស្រាង ប្រធានលេខាធិការដ្ឋានរដ្ឋបាលនៃតុលាការខេត្តសៀមរាប។
ប្រធានលេខាធិការផ្នែករដ្ឋបាលរូបនេះ បានប្រាប់សារព័ត៌មានថ្មីៗតាមទូរសព្ទ យ៉ាងដូច្នេះថា៖«គេ ដោះលែងពួកគាត់ហើយ តាមសំណើរបស់មេធាវីរបស់ពួកគាត់»។ លោកបន្តថា ចៅក្រមស៊ើបសួរ គ្រាន់តែឲ្យអ្នកទាំងបី នៅក្រៅឃុំជាបណ្តោះអាសន្នប៉ុណ្ណោះ ប៉ុន្តែ មិនទាន់ទម្លាក់បទចោទនោះទេ។
ដរាបណាបទចោទ មិនទាន់ត្រូវបានទម្លាក់ចោល អ្នកទាំងនោះ នៅតែមានឈ្មោះជាជនត្រូវចោទ ហើយស្ថិតនៅក្រោមការឃ្លាំមើលរបស់ចៅក្រមស៊ើបសួរនិងសមត្ថកិច្ចដដែល។ ក្នុងន័យនេះ ចៅក្រមស៊ើបសួរ អាចហៅពួកគេ ទៅសួរ បានគ្រប់ពេល បើយល់ថាចាំបាច់។
ម្យ៉ាងទៀត អង្គការសារមន្ទីរគ្រាប់មីន ដែលមានលោក អាគីរ៉ាជាប្រធាន មិនទាន់ទទួលបានការអនុញ្ញាត ឲ្យដំណើរការឡើងវិញ នៅឡើយទេ។ លោក យិន ស្រាង បញ្ជាប់បែបនេះថា៖«អង្គការនេះ មិនទាន់ឲ្យបើកទ្វារទេ ព្រោះគេ នៅបន្តស៊ើបអង្កេត»។
លោក អាគីរ៉ា និងមនុស្សពីរនាក់ទៀត ដែលម្នាក់ជាអនុប្រធាន និងម្នាក់ជាបុគ្គលិករបស់អង្គការសារមន្ទីរមីន ត្រូវបានចាប់ខ្លួនកាលពីថ្ងៃទី២៨ ខែសីហា ឆ្នាំ២០១៨ ក្រោយពីសមត្ថកិច្ច សង្ស័យថា «លាក់អាវុធ គ្រឿងផ្ទុះ និងគ្រាប់រំសេវ ដោយខុសច្បាប់» ។ រហូតដល់ថ្ងៃទី៣១ ខែសីហា ចៅក្រមស៊ើបសួរ ក៏សម្រេចឃុំពួកគេ។ ក្រោយមក អង្គការរបស់ពួក ក៏ត្រូវបិទ។
សូមរម្លឹក លោក អាគីរ៉ា មានភាពល្បីល្បាញយ៉ាងខ្លាំង ដោយធ្លាប់ជាប់ឈ្មោះក្នុងបញ្ជីវីរបុរសឆ្នើមរបស់ទូរទស្សន៍ CNN នៅឆ្នាំ២០១០ តាមរយៈសកម្មភាពដាក់និងដោះមីន យ៉ាងស្ទាត់ជំនាញរបស់លោក។ តាមរយៈជំនាញនេះ លោក អាគីរ៉ា ក៏ធ្លាប់ទទួលបានពានរង្វាន់កិត្តិយសពីប្រទេសកូរ៉េខាងត្បូង កាលឆ្នាំ២០១២ ផងដែរ៕
© រក្សាសិទ្ធិដោយ thmeythmey.com