កីឡាអន្តរជាតិ
អន្តរជាតិ
លីគកំពូលឥណ្ឌូណេស៊ីផ្អាក២សប្តាហ៍ ក្រោយករណីឃាតកម្មលើអ្នកគាំទ្រម្នាក់
× លីគកីឡាបាល់ទាត់កំពូលរបស់ឥណ្ឌូណេស៊ី Liga 1 ត្រូវបានផ្អាក បន្ទាប់ពីអ្នកគាំទ្រម្នាក់របស់ក្លិប Persija Jakarta ត្រូវបានសម្លាប់ដោយក្រុមអ្នកគាំទ្រក្លិបជាគូប្រជែង Persib Bandung កាលពីចុងសប្តាហ៍មុន។ នេះបើតាមការប្រកាសរបស់សមាគមកីឡាបាល់ទាត់ឥណ្ឌូណេស៊ី (PSSI)។
លោក Edy Rahmayadi ប្រធាន (PSSI) បានប្រាប់កាសែត Jakarta Post នៅថ្ងៃទី ២៥ ខែកញ្ញាថា ការស៊ើបអង្កេតទៅលើការស្លាប់របស់អ្នកគាំទ្រក្រុម Persija ម្នាក់ឈ្មោះ Haringga Sirila គឺកំពុងតែដំណើរការហើយ។
«យើងត្រូវប្រាកដថាការធ្វើរោគវិនិច្ឆ័យគឺត្រឹមត្រូវមុនពេលយើងចាត់វិធានការ។ យើងមានច្បាប់ ហើយយើងនឹងមានការដាក់ទណ្ឌកម្មចាប់ពីកំរិតស្រាលដោយការផាកពិន័យ ឬក៏ដកហូតសិទ្ធិមិនឲ្យចូលទស្សនាផ្ទាល់»។ នេះជាការលើកឡើងរបស់លោក Rahmayadi។
Haringga អាយុ ២៣ឆ្នាំត្រូវបានហ្វូងមនុស្សមួយក្រុមវាយឲ្យស្លាប់នៅក្បែកីឡដ្ឋាន Gelora Bandung Lautan Api មុនការប្រកួតចាប់ផ្តើមបន្តិតប៉ុណ្ណោះរវាងម្ចាស់ផ្ទះ Persib Bandung និង Persija Jakarta កាលពីថ្ងៃទី២៣ ខែកញ្ញា។ វីដេអូនៃការសម្លាប់នោះត្រូវបានផ្សព្វផ្សាយតាមអ៊ិនធឺណិតដែលបង្កឲ្យប្រជាពលរដ្ឋមានកំហឹងយ៉ាងខ្លាំង។
រដ្ឋមន្ត្រីក្រសួងយុវជន និងកីឡាឥណ្ឌូនេស៊ីលោក Imam Nahrawi ក៏បានគាំទ្រការឈប់សម្រាករយៈពេលពីរសប្តាហ៍សម្រាប់ការប្រកួតក្របខណ្ឌ Liga 1 ដើម្បីអនុញ្ញាតឲ្យមានការស៊ើបអង្កេតហ្មត់ចត់ផងដែរ។
លោក Nahrawi បានប្រាប់ទីភ្នាក់ងារព័ត៌មាន Antara News ទៀតថា ការធ្វើបែបក៏ដើម្បីជាការគោរពចំពោះជនរងគ្រោះ និងគ្រួសារសព ហើយនេះគឺជារបៀបនៃការចូលរួមរំលែកទុក្ខដល់ជនរួមជាតិរបស់លោកដែរ៕
Tag:
បាល់ទាត់
ឥណ្ឌូណេស៊ី
Liga 1
Haringga Sirila
© រក្សាសិទ្ធិដោយ thmeythmey.com