កីឡាអន្តរជាតិ
អន្តរជាតិ
Southgate ត្រៀមបន្តដឹកនាំអង់គ្លេសដល់ World Cup 2022 ដោយមិនទារប្រាក់ឈ្នួលច្រើនឡើយ
× លោក Gareth Southgate ត្រៀមបន្តកិច្ចសន្យាធ្វើជាគ្រូបង្វឹកក្រុមកីឡាបាល់ទាត់ជម្រើសជាតិអង់គ្លេសរយៈពេល២ឆ្នាំទៀតបន្ទាប់ពីដឹកនាំទទួលបានផ្លែផ្កា ដោយបានថ្លៃនឿយហត់ ៣លានផោន (ជិត៤លានដុល្លារអាមេរិក)។
លោក Southgate ដែលជាអតីតសមាជិកជម្រើសជាតិអង់គ្លេសដែរនោះបានដឹកនាំក្រុមរហស្សនាមតោកំណាចឈានទៅកាន់វគ្គពាក់កណ្តាលផ្តាច់ព្រ័ត្រ World Cup នៅរុស្ស៊ីកន្លងទៅនេះ។ បុរសវ័យ៤៨ឆ្នាំរូបនេះ នឹងផុតកំណត់កិច្ចសន្យានៅឆ្នាំ២០២០ ហើយត្រៀមគម្រោងបន្តឲ្យគ្រប់៤ឆ្នាំ ដើម្បីនាំអង់គ្លេសឆ្ពោះទៅ World Cup ឆ្នាំ២០២២ នៅកាតា នៅក្រោយពេល Euro ឆ្នាំ២០២០។
កិច្ចព្រមព្រៀងថ្មីរបស់ Southgate នឹងត្រូវសម្រេចនៅឯកិច្ចប្រជុំក្រុមប្រឹក្សាភិបាលរបស់សហព័ន្ធកីឡាបាល់ទាត់អង់គ្លេស (FA) នៅថ្ងៃទី២៧ ខែកញ្ញានេះ។
លោក Southgate និង FA បាននិងកំពុងពិភាក្សាអំពីការកែលម្អលក្ខខណ្ឌនៃកិច្ចសន្យានេះក្រោយពីបាននាំអង់គ្លេសទៅកាន់វគ្គពាក់កណ្តាលផ្តាច់ព្រ័ត្រ World Cup ជាលើកដំបូងរបស់ពួកគេចាប់តាំងពីឆ្នាំ ១៩៩០ មក។
បើតាមការផ្សាយរបស់ទីភ្នាក់ងារព័ត៌មាន AFP អតីតអ្នកចាត់ការទូទៅ Middlesbrough រូបនេះមិនបានទាមទារឲ្យមានការដំឡើងប្រាក់ឈ្នួលច្រើននោះទេ ពោលគឺមិនដូចអតីតគ្រូចាស់ Fabio Capello, Sven-Goran Eriksson និង Sam Allardyce ដែលបានប្រាក់ខែលើសលប់តែមិនសូវជោគជ័យ៕
© រក្សាសិទ្ធិដោយ thmeythmey.com