កីឡាអន្តរជាតិ
អន្តរជាតិ
Barca ត្រៀមដូរ Logo ថ្មី ហើយរំពឹងបានចំណូលជាង១ពាន់លានដុល្លាររដូវកាលនេះ
× ក្លិបយក្សអេស្ប៉ាញ FC Barcelona បានអះអាងនៅថ្ងៃទី២៧ ខែកញ្ញា ថាពួកគេកំពុងរៀបចំកំណត់ត្រាថ្មីនៃប្រាក់ចំណូល ៩៦០ លានអឺរ៉ូ (១១១៥លានដុល្លារអាមេរិក) សម្រាប់រដូវកាល ២០១៨/១៩ ជាមួយនឹងប្រាក់ចំណេញសុទ្ធចំនួន ១១ លានអឺរ៉ូ (ជិត១៣លានដុល្លារ)។ នេះបើតាមការផ្សាយរបស់ទីភ្នាក់ងារ AFP។
យោងតាមការប៉ាន់ស្មានថវិកាដែលបានអនុម័តដោយក្រុមប្រឹក្សាភិបាលក្លិបកាលពីរដូវកាល មុន ក្លិបរហស្សនាមអ្នកមានបុណ្យ បានទទួលប្រាក់ចំណូល ៩១៤ លានអឺរ៉ូ (១០៦២លានដុល្លារ) លើសពីការព្យាករណ៍របស់ខ្លួនត្រឹម ៨៩៧ លានអឺរ៉ូ (១០៤២លានដុល្លារ) ដោយក្នុងចំណោមប្រាក់ចំណូនោះពួកគេចំណេញបាន ៣២ លានអឺរ៉ូ (៣៧លានដុល្លារ)។
នៅពេលបច្ចុប្បន្ននេះ ការចំណាយត្រូវបានគេរំពឹងថានឹងកើនឡើងដល់ ៩២៩ លានអឺរ៉ូ (១០៧៩លានដុល្លារ) ប៉ុន្តែក៏នឹងត្រូវបានទូទាត់ដោយកំណើនប្រាក់ចំណូលដែរ។ នេះបើតាមសេចក្តីថ្លែងការណ៍របស់ក្លិបដែលបានកំណត់គោលដៅនៃប្រាក់ចំណូលចំនួន ១ ពាន់លានអឺរ៉ូ (១១៦២លានដុល្លារ) នៅត្រឹមឆ្នាំ ២០២១។
«ក្លិបគឺមានការប្រុងប្រយ័ត្នខ្លាំងណាស់ (ក្នុងការគ្រប់គ្រងរបស់ខ្លួន) យើងមានការចំណាយបន្ថែមទៀតប៉ុន្តែយើងក៏រំពឹងថានឹងមានប្រាក់ចំណូលខ្ពស់ជាងនេះដែរ។ អ្វីដែលយើងធ្វើនឹងមិនមានគ្រោះថ្នាក់ដល់លទ្ធភាពជោគជ័យរបស់ក្លិបឡើយ»។ អ្នកនាំពាក្យក្លិបលោក Josep Vives បញ្ជាក់ដូច្នេះ។
ទន្ទឹមនឹងនេះដែរ ក្លិបដែលមានមូលដ្ឋានក្នុងតំបន់ស្វយ័តកាតាឡូនា (Catalonia) ក៏បានប្រកាសពីគម្រោងរៀបចំផ្លាស់ប្តូរស្លាកសញ្ញា (Logo) ថ្មីរបស់ពួកគេផងដែរ ដោយដកអក្សរកាត់ «FCB» ចេញហើយបំពេញដោយទង់ជាតិរបស់តំបន់នោះជាមួយនឹងរូបបាល់ដដែល។ Logo នឹងប្រើប្រាស់ចាប់ពីរដូវកាលក្រោយទៅ៕
Tag:
បាល់ទាត់
Barcelona
ប្រាក់ចំណូល
Logo
© រក្សាសិទ្ធិដោយ thmeythmey.com