បទ ព្រហ្មគីតិ
-ប្រមឹកផឹកប្រមាទ រកស៊ីខាតខកខានញឹក
បើកភ្នែកឡើងពេលព្រឹក ការមិននឹកផឹកស្រាសិន។
-ផឹកខ្លាំងស្លាំងសេ្លកស្លក់ ដេកដង្ហក់មាត់ជះក្លិន
ពូកែតែបង្ហិន រកមិនប៉ិនដូចផឹកស្រា។
-ឆ្ងាយសីលខិលខូចខាត ផឹកប្រមាទភ្លេចសង្ខារ
បានផឹកថ្នឹកហិង្សា ស្រែកឡូឡាក្លាសម្តី។
-ប្រពន្ធកូនទៅស្រែ មិនដែលក្បែរជួយភ្ជួរដី
ត្រីសាច់ឬអ្វីៗ ខាងលោកប្តីធ្វើមិនដឹង។
-ស្រវឹងជេរបញ្ចោរ ដេកស្រាតខោភ្នែកស្លក់ស្លឹង
ចាយធូរទៅរកតឹង ពូកែខឹងជាងខិតខំ។
-គេស្តីមិនខ្ចីស្តាប់ អាងកាប់ចាក់ហាក់ហានហំ
ហងមេជេរចំៗ ចេះសន្សំតែជម្លោះ។
-ស្រែកផ្អើលអ្នកជិតខាង កាចកោងកាងអសោចឈ្មោះ
ពេលបានស្រាចូលពោះ ក្លាយជាងោះលែងដឹងអី។
-ត្រប៉ែឆ្កែលិឍមាត់ ភ្លើភ្លេចភ្លាត់ដួលដេកដី
ផឹកជ្រុលម៉ោងពីរបី ពេលខ្លះប្តីថែមដាច់យប់។
-ប្រពន្ធមានកូនខ្ចី អង្គុយបីងងុយជ្រប់
កូនយំលួងមិនឈប់ ស្ត្រីណាទប់ទឹកភ្នែកបាន?