កីឡាអន្តរជាតិ
អន្តរជាតិ
Neymar ចង់លេងឲ្យក្លិបធំ២នៅអង់គ្លេស តែលើកលែង Man Utd និង Man City
× Neymar ខ្សែប្រយុទ្ធឆ្នើមក្រុម Paris Saint-Germain ថានឹងមិនទៅចូលរួមក្រុមដែលមានមូលដ្ឋានក្នុងក្រុង Manchester នោះទេ ប្រសិនបើថ្ងៃណាមួយរូបគេអាចផ្លាស់ទៅលេងនៅ Premier League។
តារាឆ្នើមរបស់ក្រុមជម្រើសជាតិប្រេស៊ីលរូបនេះ ត្រូវបានក្លិប Manchester United និង Manchester City ទាក់ទងកាលពីប៉ុន្មានខែមុននេះ ប៉ុន្តែបានបដិសេធមិនទៅចូលរួមក្លិបណាមួយក្នុងចំណោមក្លិបទាំងនេះទេ ព្រោះរូបគេស្រឡាញ់ទីក្រុងឡុងដ៍។
ប្រភពដែលស្និទ្ធនឹងកីឡាកររូបនេះបានប្រាប់ Express Sport ថា Neymar មានបំណងទៅចូលរួម Chelsea ឬ Arsenal ដែលជាក្លិបស្ថិតក្នុងក្រុងឡុងដ៍ ប្រសិនបើរូបគេពិតជាផ្លាស់ទៅលេងជាមួយក្រុមកំពូលនៅអង់គ្លេសមែន។ «គាត់ពិតជាស្រឡាញ់ប្រទេសអង់គ្លេសណាស់ ប៉ុន្តែភាគច្រើនក្នុងទីក្រុងឡុងដ៍។ រាល់ពេលគាត់ធ្វើដំណើរទៅទីនោះ គឺតែងតែមានរបស់មួយចំនួនពីទីនោះត្រឡប់មកវិញ»។
សារព័ត៌មានដដែលបានចុះផ្សាយថា អតីតសមាជិក Barcelona វ័យ ២៥ឆ្នាំរូបនេះកំពុងរៀនភាសាអង់គ្លេសបន្ថែម ហើយបានធ្វើដំណើរទៅរាជធានីរបស់អង់គ្លេសនេះបានបីបួនដងឯណោះកាលពីឆ្នាំមុន។
Neymar បានផ្លាស់ពីក្លិបយក្សអេស្ប៉ាញទៅចូលរួមក្រុមយក្សបារាំងក្នុងតម្លៃកំណត់ត្រាពិភពលោក ២៥៧លានដុល្លារអាមេរិកកាលពីដើមរដូវកាលមុនដោយយល់ព្រមចុះកិច្ចសន្យារយៈពេល៤ឆ្នាំ ពោលគឺដល់ឆ្នាំ២០២២។
ក្រៅពីក្រុមធំៗនៅអង់គ្លេស ក្លិបយក្ស Real Madrid ក៏ព្យាយាមអន្ទងយកអតីតសមាជិកក្រុម Santos រូបនេះទៅរួមក្រុមផងដែរ និងដើម្បីបំពេញចន្លោះក្នុងតំបន់ប្រយុទ្ធបន្ទាប់ពី Cristiano Ronaldo ចាកចេញ៕
© រក្សាសិទ្ធិដោយ thmeythmey.com