ជាតិ
សម្តេច ហ៊ុន សែន ស្នើឲ្យក្រុមហ៊ុនអាមេរិក វិនិយោគលើវិស័យកសិកម្ម សម្តេច ហ៊ុន សែន នាយករដ្ឋមន្រ្តីកម្ពុជា ចាប់ដៃជាមួយលោក Michael Walter Michcalak ក្នុងវិមានសន្តិភាព នៅថ្ងៃទី២ ខែតុលា ឆ្នាំ២០១៨
× សម្តេចនាយករដ្ឋមន្ត្រី ហ៊ុន សែន បានស្នើឲ្យក្រុមហ៊ុនអាមេរិក ពិនិត្យមើលការវិនិយោគទៅលើការកែច្នៃ ផលិតផលកសិកម្មនៅកម្ពុជា ឲ្យទៅជាផលិតផលពាក់កណ្តាលសម្រេច ឬក៏ផលិតផលសម្រេច ដែលអាចបម្រើទៅដល់ទីផ្សារទាំងក្នុង និងក្រៅប្រទេស។ នេះបើយោងតាមទំព័រហ្វេសប៊ុកសម្ដេច ហ៊ុន សែន។
សំណើរបស់សម្តេច ហ៊ុន សែន ធ្វើឡើងក្នុងជំនួបជាមួយលោក Michael Walter Michalak នាយកគ្រប់គ្រងតំបន់ និង ក្រុមប្រឹក្សាធុរកិច្ចអាស៊ាន-អាមេរិក ដោយមានការចូលរួមពីឯកអគ្គរដ្ឋទូតសហរដ្ឋអាមេរិកប្រចាំកម្ពុជា លោក William A. Heidt នៅវិមានសន្តិភាព នាថ្ងៃទីទី២ ខែតុលា ឆ្នាំ២០១៨។ ប្រមុខរដ្ឋាភិបាលកម្ពុជា បញ្ជាក់បែបនេះថា៖«សហរដ្ឋអាមេរិក ពិតជាមានបច្ចេកទេស និងសូមឲ្យអ្នកវិនិយោគ ពិនិត្យពិចារណាយកបច្ចេកទេសទាំងនេះ មកប្រើប្រាស់នៅកម្ពុជា ក៏ដូចជានៅក្នុងតំបន់ផងដែរ»។
សម្តេច ហ៊ុន សែន បានបន្តថា ពាក់ព័ន្ធនឹងបញ្ហាប្រែប្រួលអាកាសធាតុ គឺបណ្តាលឲ្យមានទឹកជំនន់ និងមានភ្លៀងខុសរដូវ ហើយបង្កើតជាបញ្ហា មិនត្រឹមតែនៅកម្ពុជាទេ គឺនៅទូទាំងតំបន់ និងពិភពលោកទាំងមូលតែម្តង។នាយករដ្ឋមន្ត្រីកម្ពុជា បន្ថែមថា ពូជស្រូវ ពូជដំណាំ ដែលធ្លាប់តែត្រូវនឹងកម្តៅ ដែលធ្លាប់មានកន្លងមក នៅពេលនេះគឺត្រូវចាំបាច់ពិនិត្យឡើងវិញ ដោយសារការកើនឡើងនៃកម្តៅដែលបណ្តាលមកពីការប្រែប្រួលអាកាសធាតុ។
សម្តេច ហ៊ុន សែន ក៏សង្ឃឹមដែរថា សហរដ្ឋអាមេរិក នឹងចូលរួមយ៉ាងសំខាន់ ក្នុងការដោះស្រាយបញ្ហាអាកាសធាតុ។ មេដឹកនាំកម្ពុជា បានណែនាំឲ្យប្រតិភូទាំងអស់ពិភាក្សាជាមួយស្ថាប័នពាក់ព័ន្ធ ដើម្បីស្វែងរកដំណោះស្រាយ ហើយក្នុងករណីមិនអាចដោះស្រាយបាន សូមលើកបញ្ហាទាំងនោះ មកជូនប្រមុខរដ្ឋាភិបាលកម្ពុជាតែម្តង។
ក្នុងជំនួបនោះ លោក Michael បានលើកឡើងថា ដំណើរទស្សនកិច្ចរបស់លោក នៅកម្ពុជា គឺដើម្បីពិភាក្សា លើបញ្ហាសេដ្ឋកិច្ច បញ្ហាថាមពល ហេដ្ឋារចនាសម្ព័ន្ធ ការអភិវឌ្ឍធនធានមនុស្ស វប្បធម៌ ក៏ដូចជាវិស័យកសិកម្មផងដែរ។
ឯកអគ្គរដ្ឋទូតសហរដ្ឋអាមេរិកប្រចាំកម្ពុជា លោក William A. Heidt បានឲ្យដឹងថា នៅពេលនេះ មានក្រុមហ៊ុនកសិកម្មសហរដ្ឋអាមេរិកប្រមាណ៦ទៅ១០ក្រុមហ៊ុន ដែលបានមក និងកំពុងពិភាក្សាស្វែងរកឱកាសវិនិយោគ និងកិច្ចសហប្រតិបត្តិការ នៅកម្ពុជា៕
© រក្សាសិទ្ធិដោយ thmeythmey.com