ជាតិ
×![]()
ដោយ: ភួង វ៉ាន់ថា
ក្រសួងពាណិជ្ជកម្មកម្ពុជា បានជំរុញឲ្យអ្នកវិនិយោគិនថៃ វិនិយោគលើសហគ្រាសធុនតូច និងមធ្យម នៅតាមតំបន់សេដ្ឋកិច្ចពិសេសក្នុងប្រទេសកម្ពុជា។
លោកប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានឲ្យដឹងថា ការជំរុញក្រុមប្រឹក្សាធុរកិច្ចថៃ ឲ្យមកវិនិយោគនេះ គឺដើម្បីធ្វើពិពិធកម្មខ្សែសង្វាក់តម្លៃវិស័យឧស្សាហកម្ម និងបង្កើតឱកាសការងារជូនប្រជាពលរដ្ឋ ជាពិសេសលើកស្ទួយប្រសិទ្ធភាពការអនុវត្តយុទ្ធសាស្ត្រចតុកោណ ដំណាក់កាលទី៤ របស់រាជរដ្ឋាភិបាល។
លោករដ្ឋមន្ត្រី បានលើកសំណើនេះឡើង នាឱកាសជួបពិភាក្សាការងារជាមួយ លោក ចាន់នីត ចាន់ឆៃណារ៉ុង (Chanitr Charnchainarong) ប្រធានក្រុមប្រឹក្សាធុរកិច្ចថៃ ដែលបានដឹកនាំគណៈប្រតិភូ ស្វែងរកយន្តការពង្រឹង និងពង្រីកទំនាក់ទំនងពាណិជ្ជកម្មទ្វេភាគីរវាងកម្ពុជា-ថៃ កាលពីព្រឹកថ្ងៃច័ន្ទ ទី១ ខែតុលា ឆ្នាំ២០១៨ នៅទីស្តីការក្រសួងពាណិជ្ជកម្ម។
លោក ចាន់នីត ចាន់ឆៃណារ៉ុង បានសន្យាជួយផ្សព្វផ្សាយព័ត៌មានទាំងអស់នេះ ដល់សមាគមធុរជននៅក្នុងប្រទេសថៃ និងរដ្ឋាភិបាល ដើម្បីពន្លឿនកិច្ចការនេះ ដើម្បីចូលមកវិនិយោគនៅក្នុងតំបន់សេដ្ឋកិច្ចពិសេសកម្ពុជា។
នៅថ្ងៃទី១ ខែតុលា ឆ្នាំ២០១៨ មជ្ឈមណ្ឌលសិទ្ធិមនុស្សកម្ពុជា (CCHR) បានចេញសលាកបត្រព័ត៌មានអំពីតំបន់សេដ្ឋកិច្ចពិសេសនិងសិទ្ធិមនុស្សនៅកម្ពុជា ដោយលើកឡើងថា តំបន់សេដ្ឋកិច្ចពិសេស បាននាំមកនូវលក្ខខណ្ឌក្នុងការអភិវឌ្ឍសេដ្ឋកិច្ច និងការធ្វើពាណិជ្ជកម្មក៏ពិតមែន ប៉ុន្តែការអភិវឌ្ឍ និងប្រតិបត្តិការរបស់តំបន់សេដ្ឋកិច្ចពិសេសទាំងនោះ ក៏បណ្តាលឲ្យមានពាក់ព័ន្ធនឹងការរំលោភសិទ្ធិមនុស្ស ដូចជាការដកហូតយកដីធ្លី បញ្ហាលក្ខខណ្ឌការងារ ឬការប៉ះពាល់ដល់បរិស្ថានជាដើម។
កាលពីខែមីនា ឆ្នាំ២០១៨ ប្រទេសកម្ពុជា និងថៃ បានរៀបចំកិច្ចប្រជុំគណៈកម្មការចម្រុះផ្នែកពាណិជ្ជកម្ម លើកទី៦ បានពិភាក្សា និងផ្លាស់ប្តូរយោបល់លើបញ្ហាប្រឈមផ្សេងៗ សំដៅបង្កើនទំហំពាណិជ្ជកម្មទ្វេភាគីឲ្យបាន ១៥ពាន់លានដុល្លារ នៅឆ្នាំ២០២០៕
Tag:
ឧស្សាហកម្ម
ប៉ាន សូរស័ក្តិ
© រក្សាសិទ្ធិដោយ thmeythmey.com
