ជាតិ
ជប៉ុនផ្តល់ជំនួយជាង១លានដុល្លារដល់កម្ពុជា សម្រាប់គម្រោងកសិកម្ម និងដោះមីន រូបពីហ្វេសប៊ុកស្ថានទូតជប៉ុន
× រដ្ឋាភិបាលជប៉ុនបានផ្ដល់ថវិកាសរុបចំនួន១,៨៩៤,២២៨ដុល្លារអាមេរិកសម្រាប់គម្រោងកសិកម្មចំនួន២ និង គម្រោងដោះមីនចំនួន១។ នេះបើយោងតាមទំព័រហ្វេសប៊ុករបស់ស្ថានទូតជប៉ុននៅកម្ពុជា ។
ស្ថានទូតជប៉ុននៅកម្ពុជា បានបញ្ជាក់ថា ទឹកប្រាក់ទាំងនេះ នឹងផ្ដលដល់អង្គការចំនួនបី ក្រោមជំនួយឧបត្ថម្ភឥតសំណង សម្រាប់គម្រោងរបស់អង្គការក្រៅរដ្ឋាភិបាលជប៉ុន។
ស្ថានទូតជប៉ុនសរសេរថា៖ «ផ្តល់ថវិកាចំនួន ៤០២,៣៥៨ដុល្លារអាមេរិកដល់អង្គការ IVY ដើម្បីអនុវត្តលើ ការគាំទ្រដល់កសិករខ្នាតតូចតាមរយៈធ្វើកិច្ចសន្យាកសិកម្មគ្រាប់ស្វាយចន្ទីសរីរាង្គតាមរយៈសហគមន៍កសិកម្ម (ឆ្នាំទី១)។ ផ្តល់ថវិកាចំនួន ៦៦៧,១១៧ ដុល្លារអាមេរិក ដល់វិទ្យាស្ថានកែលំអ និងអភិរក្សបរិស្ថាន(ERECON) ដើម្បីអនុវត្តលើ គម្រោងលើកកម្ពស់លក្ខខណ្ឌកសិកម្មដោយមាននិរន្តរភាពដើម្បីកាត់បន្ថយភាពក្រីក្រ ក្នុងខេត្តកំពង់ចាម និងដល់អង្គការសកម្មភាពកំចាត់មីនជប៉ុន (JMAS)ចំនួនថវិកា ៨២៤,៧៥៣ ដុល្លារអាមេរិក ដើម្បីអនុវត្តគម្រោង “ការលើកកម្ពស់ការអភិវឌ្ឍន៍សហគមន៍ជាមួយនឹងការដោះមីន ក្នុងខេត្តបន្ទាយមានជ័យ»។
យោងតាមរបាយការណ៍របស់ទីភ្នាក់ងារសហប្រតិបត្តិការអន្តរជាតិជប៉ុនបង្ហាញថា ចាប់ពីឆ្នាំ២០១២ ដល់ ២០១៦ ប្រទេសជប៉ុនបានផ្ដល់ជំនួយឥតសំណងចំនួន ១,៩៧២រយលានយ៉េន (ប្រហែល១,៧ពាន់លានដុល្លារអាមេរិក) ប្រាក់កម្ចី ១,១៦៨រយលានយ៉េន (ជាង១ពាន់លានដុល្លារអាមេរិក) និងជំនួយបច្ចេកទេសចំនួន ៨៧០រយលានយ៉េន (ជាង៧៦៤លានដុល្លារ)ដល់ប្រទេសកម្ពុជា៕
Tag:
ជប៉ុន
ជំនួយ
កម្ពុជា
© រក្សាសិទ្ធិដោយ thmeythmey.com