ជាតិ
×![]()
ដោយ: ភួង វ៉ាន់ថា
ភ្នំពេញ៖ ក្រសួងទេសចរណ៍ កំពុងរៀបចំសេចក្តីព្រាងផែនការមេ សម្រាប់អភិវឌ្ឍន៍រមណីយដ្ឋានឆ្នេរអូរត្រេះ ខេត្តព្រះសីហនុ និងឆ្នេរប៉ាក់ខ្លង ខេត្តកោះកុង ដើម្បីក្លាយជាឆ្នេរគំរូ។
លោក ប៉ាក់ សុខុម រដ្ឋលេខាធិការក្រសួងទេសចរណ៍ បានបញ្ជាក់ថា ក្រសួងបានរៀបចំលិខិតបទដ្ឋានគតិយុត្តនានា បទដ្ឋានឆ្នេរស្អាត ដើម្បីជាមូលដ្ឋាននិងជាត្រីវិស័យ សម្រាប់គម្រោងវិយោគនៅតាមបណ្ដោយឆ្នេរសមុទ្រ ដែលត្រូវគោរពតាមគោលការណ៍ចីរភាព។
ទីភ្នាក់ងារសារព័ត៌មានកម្ពុជា (AKP) បានស្រង់សម្តីលោក ប៉ាក់ សុខុម ដូច្នេះថា៖« ឆ្នេរសមុទ្រកម្ពុជាបាននិងកំពុងដើរតួនាទីយ៉ាងសំខាន់ ជាប៉ូលសេដ្ឋកិច្ចទី២ ក្នុងការទាក់ទាញវិនិយោគ ជំរុញកំណើនសេដ្ឋកិច្ចជាតិ បន្ទាប់ពីរាជធានីភ្នំពេញ ត្រូវបានចាត់ទុកជាគោលដៅទេសចរណ៍ធម្មជាតិដ៏មានភាពទាក់ទាញ និងប្រកបដោយភាពប្រកួតប្រជែងខ្ពស់នៅកម្ពុជា និងក្នុងតំបន់ ព្រមទាំងជាគោលដៅទេសចរណ៍ដ៏ធំ បន្ទាប់ពីតំបន់បេតិកភណ្ឌវប្បធម៌ប្រវត្តិសាស្ត្រសៀមរាប អង្គរ និងរាជធានីភ្នំពេញ»។
កាលពីថ្ងៃទី០៤ ខែតុលា ឆ្នាំ២០១៨ គណៈកម្មាធិការជាតិគ្រប់គ្រង និងអភិវឌ្ឍន៍តំបន់ឆ្នេរសមុទ្រកម្ពុជា បានបើកសិក្ខាសាលាពិគ្រោះយោបល់លើសេចក្តីព្រាងផែនការអភិវឌ្ឍន៍រមណីយដ្ឋានឆ្នេរអូរត្រេះ ខេត្តព្រះសីហនុ និងឆ្នេរប៉ាក់ខ្លង ខេត្តកោះកុង និងការត្រួតពិនិត្យលទ្ធផលបឋមនៃការវាយតម្លៃឆ្នេរ សម្រាប់ការប្រឡងប្រណាំងឆ្នេរខ្សាច់កម្សាន្តស្អាត។
ទីភ្នាក់ងារសារព័ត៌មានកម្ពុជា បានបន្ថែមថា គណៈកម្មាធិការជាតិគ្រប់គ្រង និងអភិវឌ្ឍន៍តំបន់ឆ្នេរសមុទ្រកម្ពុជា បានបង្កើតក្រុមការងារទទួលបន្ទុកតាមដាន និងវាយតម្លៃឆ្នេរខ្សាច់កម្សាន្ត តាមបទដ្ឋានបច្ចេកទេស និងស្តង់ដានៃគោលការណ៍ណែនាំ ស្ដីពីការគ្រប់គ្រងឆ្នេរខ្សាច់កម្សាន្ត ដោយផ្តល់ការគាំទ្របច្ចេកទេសលើការគ្រប់គ្រង និងការកែលម្អឆ្នេរខ្សាច់កម្សាន្តឱ្យស្របតាមស្តង់ដារលក្ខណៈបច្ចេកទេស និងបទដ្ឋានគតិយុត្តនានា ក្នុងការងារគ្រប់គ្រងឆ្នេរខ្សាច់ក្នុងខេត្តតំបន់ឆ្នេរកម្ពុជា ៕
Tag:
ការអភិវឌ្ឍ
តំបនឆ្នេរ
ទេសចរណ៍
ប៉ាក់ សុខុម
© រក្សាសិទ្ធិដោយ thmeythmey.com
