ជាតិ
បទយកការណ៍ / បទសម្ភាសន៍
បុណ្យភ្ជុំបិណ្ឌ
សង្គមជាតិ
ភ្ជុំបិណ្ឌ៖និស្សិតអន្ទះសាវិលទៅស្រុកកំណើតជួបជុំគ្រួសារ
× ភ្នំពេញ៖ បុណ្យភ្ជុំបិណ្ឌ នឹងឈានមកដល់ឆាប់ៗ ដែលបានធ្វើឲ្យនិស្សិតមកពីតាមបណ្តាខេត្តមករៀននៅភ្នំពេញខ្លះ អន្ទះសារ និងបន់ឲ្យដល់ថ្ងៃភ្ជុំ ន្អាលទៅ ជួបជុំក្រុមគ្រួសារ ញាតិមិត្ត បងប្អូន។ ដោយជាប់រវល់សិក្សា ពួកគេត្រូវរង់ចាំដល់កៀកថ្ងៃភ្ជុំធំ ទើបអាចធ្វើដំណើរទៅស្រុកកំណើតបាន។
កញ្ញា វុត ចាន់ទី និស្សិតផ្នែកគណិតវិទ្យា នៅសាកលវិទ្យាល័យភូមិន្ទភ្នំពេញ បានប្រាប់សារព័ត៌មានថ្មីៗថា ខ្លួននឹករលឹកអ្នកផ្ទះជាខ្លាំង ជាពិសេសនៅក្នុងអំឡុងបុណ្យភ្ជុំបិណ្ឌនេះ។ ចាន់ទី ដែលមកពីខេត្តសៀមរាប បន្តថារូបនាងចង់ទៅស្រុកណាស់ ដោយសារតែឃើញអ្នកនៅភ្នំពេញ បានបបួលគ្នាទៅវត្តបណ្តើរៗ ដូច្នេះនាងបន់ឲ្យតែដល់ថ្ងៃភ្ជុំបិណ្ឌឆាប់ៗ ន្អាលបានទៅជួបជុំក្រុមគ្រួសារ។ ជានិស្សិតឆ្នាំទី២ ចាន់ទី ចង់តែទៅឆាប់ៗនេះ ប៉ុន្តែសកលវិទ្យាល័យ មិនទាន់អនុញ្ញាតឲ្យនិស្សិតឈប់សម្រាកនៅឡើយ ពោលគឺទាល់តែជិតដល់ថ្ងៃភ្ជុំបិណ្ឌ។
«ខ្ញុំចង់ទៅស្រុកឆាប់ៗ លឿនកាលណាល្អកាលហ្នឹង។ ចិត្តខ្ញុំមិនសូវជាមានអារម្មណ៍ចង់រៀនប៉ុន្មានទេ ចង់តែទៅផ្ទះ ជួបឪពុកម្តាយ ប៉ុន្តែចិត្តមួយស្តាយមេរៀន។ បើខ្ញុំទៅមុន សាលាអនុញ្ញាតឲ្យឈប់នោះអាចនឹងបាត់បង់មេរៀន ដោយសារនេះជាការបើកបវេសនកាលថ្មីផង»។ នេះជាការរៀបរាប់របស់កញ្ញា ចាន់ទី។
ជានិស្សិតផ្នែកគណិតវិទ្យា។ ទោះបីចាន់ទី មិនទាន់អាចទៅធ្វើបុណ្យជាមួយអ្នកផ្ទះបានក្តី ប៉ុន្តែចាន់ទី នឹងបបួលមិត្តភក្តិទៅវត្តប្រគេនចង្ហាន់បន្តិចបន្តួចជាមួយគ្នា មុននឹងបែកគ្នាពេលភ្ជុំ។
លោក ចិន គឹមហួ និស្សិតម្នាក់ទៀតមកពីខេត្តកំពង់ធំដែលកំពុងសិក្សានៅសកលវិទ្យាល័យអាស៊ីអឺរ៉ុប ក៏នឹករលឹកសាច់ញាតិនៅស្រុកកំណើតខ្លាំងដែរ ពិសេសពេលឮទំនួញប្រេត ដែលគេបង្ហោះតាមបណ្តាញសង្គមហ្វេសប៊ុក និងមិត្តភក្តិដែលគេទៅវត្តជុំគ្នានៅថ្ងៃកាន់បិណ្ឌ។ ថ្លែងប្រាប់សារព័ត៌មានថ្មីៗ គឹមហួ ដែលមានរាងស្គម និងខ្ពស់ស្រឡះ បញ្ជាក់ថា៖«គ្រាន់តែគិតដល់ថ្ងៃដែលខ្ញុំនឹងទៅស្រុក ក៏សប្បាយចិត្តដែរ។ ពេលខ្ញុំទៅដល់ ខ្ញុំនឹងរៀបចំធ្វើម្ហូប បាយ សម្ល ជូនអ្នកមានគុណ និមន្តព្រះសង្ឃបង្សុកូល សម្រាប់ដូនតាដែលបានចែកឋានទៅ»។
មិនខុសគ្នាទេ លោក លៀវ ពន្លក និស្សិតផ្នែកព័ត៌មានវិទ្យា ថារូបគេនឹកស្រុក និងចង់ទៅភ្លាមៗ នៅពេលស្តាប់បទ ចម្រៀងប្រពៃណីបុណ្យភ្ជុំបិណ្ឌ ពីដើមៗ។ ប៉ុន្តែដោយសាររវល់នឹងការសិក្សា និងការងារមួយចំនួន ពន្លក អាចទៅស្រុកកំណើតបាននៅមុនថ្ងៃភ្ជុំ។ ដ្បិតតែបង្ហើបប្រាប់ពីគម្រោងទៅស្រុកកំណើតនៅមុនភ្ជុំមែន ប៉ុន្តែ ពន្លក បែរជាមិនប្រាប់អ្នកផ្ទះរបស់គាត់មុនទៅវិញ ថាខ្លួននឹងទៅស្រុកកំណើតពេលនោះ។ លោក លៀវ ពន្លកពន្យល់ដូច្នេះ៖«ខ្ញុំមិនដែលប្រាប់គាត់មុនទេ នៅពេលខ្ញុំចង់ទៅលេងគាត់ សូម្បីតែភ្ជុំនេះអីចឹង ព្រោះមិនចង់ឲ្យគាត់ពិបាកត្រៀមធ្វើម្ហូបឆ្ងាញ់ៗសម្រាប់ខ្ញុំ។ ជាទូទៅ ខ្ញុំតែងតែទៅចំពេលគាត់អស់ម្ហូប អស់បាយ តែខ្ញុំនៅតែរីករាយនៅពេលដែលបានជួបពូកគាត់»។
មិនមែនមានតែនិស្សិតដែលមកពីតាមខេត្តនោះទេ ដែលនឹងត្រឡប់ទៅជួបជុំក្រុមគ្រួសារ និងសាច់ញាតិនៅស្រុកកំណើតនៅក្នុងថ្ងៃបុណ្យភ្ជុំបិណ្ឌ កញ្ញា តាំង ស្រីនុច ដែលរស់នៅទីក្រុងភ្នំពេញស្រាប់ ក៏នឹករឮកជាខ្លាំង ដល់សាច់ញាតិខាងឪពុកម្តាយដែលនៅខេត្តព្រៃវែងដែរ។ ស្រីនុច ថា រូបគេ និងក្រុមគ្រួសារ នឹងទៅលេង សួរសុខទុក្ខ តាយាយ ពូ មីង នៅខេត្តព្រៃវែង ព្រមទាងធ្វើបុណ្យសន្សំកុសល និងឧទ្ទិសដល់ដូនតាដែលបានចែកឋានផងដែរ៕
Tag:
និស្សិត
ភ្ជុំបិណ្ឌ
កាន់បិណ្ឌ
ដាក់បិណ្ឌ
សៀមរាប
កំពង់ធំ
ព្រៃវែង
កំពត
តាកែវ
© រក្សាសិទ្ធិដោយ thmeythmey.com