លោក សម រង្ស៊ី ថា រដ្ឋាភិបាល នៅមានឱកាសចរចាជាមួយសហភាពអឺរ៉ុប ដើម្បីកុំឲ្យដកការអនុគ្រោះពន្ធ

ជាតិ

នយោបាយជាតិ

លោក សម រង្ស៊ី ថា រដ្ឋាភិបាល នៅមានឱកាសចរចាជាមួយសហភាពអឺរ៉ុប ដើម្បីកុំឲ្យដកការអនុគ្រោះពន្ធ

12, Oct 2018 , 12:39 pm

រូបភាព

ដោយ: ថ្មីៗ

លោក សម រង្ស៊ី អតីតប្រធានគណបក្សសង្គ្រោះជាតិ ហាក់ព្រួយបារម្ភ ដែលសហភាពអឺរ៉ុប (EU) កំពុងដំណើរការនៃការដកប្រព័ន្ធអនុគ្រោះពន្ធលើទំនិញនិងផលិត (EBA) ចេញពីកម្ពុជា។ លោក យល់ថា រដ្ឋាភិបាលកម្ពុជា ត្រូវតែចរចាជាមួយសហភាពអឺរ៉ុប ដើម្បីបញ្ចៀសពីទណ្ឌកម្មផ្នែកសេដ្ឋកិច្ចនេះ។

តាមរយៈសារលើបណ្តាញសង្គម Twitter លោក សម រង្ស៊ី ដែលបានកំពុងនិរទេស បានសរសេរយ៉ាងដូច្នេះថា៖«ការចរចាជាមួយសហភាពអឺរុប នៅតែអាចទៅរួច ហើយការចរចាជាមួយគណបក្សប្រឆាំង ក៏នៅតែអាចទៅរួចដូចគ្នា។ បើលោកនាយករដ្ឋមន្ត្រី ហ៊ុន សែន មិនដោះស្រាយបញ្ហានេះទេ អនាគតកម្ពុជា នឹងកាន់តែអាក្រក់»។

ក្រៅពីសារលើបណ្តាញសង្គម Twitter អតីតប្រធានគណបក្សប្រឆាំង នៅបានបង្ហោះសារលើបណ្តាញសង្គមហ្វេសប៊ុក និងបាននិយាយតាមសារព័ត៌មានថែមទៀត អំពីរឿងប្រព័ន្ធអនុគ្រោះពន្ធនេះ។ លើសពីនេះ សាររបស់លោក នៅលើបណ្តាញសង្គមហ្វេសប៊ុក ក៏មានន័យបំផុតប្រជាពលរដ្ឋ ឲ្យជំរុញមេដឹកនាំកម្ពុជា ឲ្យវិលត្រឡប់មកកាន់ផ្លូវប្រជាធិបតេយ្យវិញផងដែរ ដោយត្រូវដោះលែងលោក កឹម សុខា និងអនុញ្ញាតឲ្យគណបក្សសង្គ្រោះជាតិ ធ្វើសកម្មភាពដូចមុន។

យ៉ាងណាក៏ដោយ សម្តីរបស់លោក សម រង្ស៊ី ទំនងជាគ្មានឥទ្ធិពលអ្វីទៅលើរដ្ឋាភិបាលកម្ពុជា ឬគណបក្សកាន់អំណាច ឲ្យយកទៅពិចារណានោះទេ។ កន្លងមក ទាំងអ្នកនាំពាក្យគណបក្សកាន់អំណាច និងអ្នកនាំពាក្យរដ្ឋាភិបាល តែងចាត់ទុកមតិរបស់លោក សម រង្ស៊ី ថាអត់បានការ។

បច្ចុប្បន្ននេះ សហភាពអឺរ៉ុប កំពុងតែចាប់ផ្តើមនីតិវិធីនៃការដកប្រព័ន្ធអនុគ្រោះពន្ធពីកម្ពុជា។ ក្រោយទទួលដំណឹងនេះ ស្ថានទូតសហភាពអឺរ៉ុបប្រចាំកម្ពុជា បានចេញសេចក្តីប្រកាសព័ត៌មានមួយ ដើម្បីពន្យល់ពីនីតិវិធីនៃការដកប្រព័ន្ធអនុគ្រោះពន្ធ។

បើតាមសេចក្តីប្រកាសព័ត៌មានខាងលើ ដែលធ្វើឡើងកាលពីយប់ថ្ងៃទី៧ ខែតុលា ឆ្នាំ២០១៨ ស្ថានទូតសហភាពអឺរ៉ុប បានពន្យល់ថា នីតិវិធីនៃការដកប្រព័ន្ធអនុគ្រោះពន្ធពីកម្ពុជា មានរយៈពេល៦ខែពីរដង។ ស្ថានទូតសហភាពអឺរ៉ុប បញ្ជាក់ថា ក្នុងអំឡុងពេលនេះ សហភាពអឺរ៉ុប ផ្តល់ឱកាសឲ្យរដ្ឋាភិបាលកម្ពុជា ដើម្បីចរចា។

កាលពីចុងខែមិថុនា ឆ្នាំ២០១៨ រដ្ឋាភិបាលកម្ពុជា បានបញ្ជូនបេសកកម្មពិសេស ដែលដឹកនាំដោយលោក សុក ស៊ីផាណា ទៅកាន់សហភាពអឺរ៉ុប ដើម្បីពន្យល់និងបញ្ចុះបញ្ចូលសហភាពអឺរ៉ុប កុំឲ្យដកប្រព័ន្ធអនុគ្រោះពន្ធចេញពីកម្ពុជា។ មកដល់ពេលនេះ គេ ដូចជាមិនទាន់ទទួលបានដំណឹងឬលទ្ធផលពីបេសកកម្មនេះទេ។

ថ្មីៗនេះ ពោលគឺក្រោយពីសហភាពអឺរ៉ុប សម្រេចចាប់ផ្តើមដំណើរការនៃការដកប្រព័ន្ធអនុគ្រោះពន្ធ រដ្ឋាភិបាលកម្ពុជា តាមរយៈក្រសួងការបរទេស ក៏ចេញសេចក្តីថ្លែងការណ៍មួយ ដើម្បីឆ្លើយតប។ ក្នុងសេចក្តីថ្លែងការណ៍ ដែលធ្វើឡើងនៅថ្ងៃទី១០ ខែតុលា ឆ្នាំ២០១៨ ក្រសួងការបរទេស បានចាត់ទុកការសម្រេចចាប់ផ្តើមនីតិវិធីរបស់សហភាពអឺរ៉ុប ថាជារឿងអយុត្តិធម៌ចំពោះកម្ពុជា។

បន្ថែមពីលើសេចក្តីថ្លែងការណ៍របស់ក្រសួងការបរទេស សម្តេចនាយករដ្ឋមន្ត្រី ហ៊ុន សែន ក៏បានប្រតិកម្មនឹងការសម្រេចរបស់សហភាពអឺរ៉ុបដែរ នៅពេលទៅប្រជុំនៅប្រទេសជប៉ុន ពីថ្ងៃទី៦ ដល់ថ្ងៃទី១០ ខែតុលា ឆ្នាំ២០១៨ កន្លងទៅ។ ក្នុងពិធីជួបសំណេះសំណាលជាមួយប្រជាពលរដ្ឋកម្ពុជានៅជប៉ុន មេដឹកនាំកម្ពុជារូបនេះ បាននិយាយខ្លាំងៗថា៖«ឥឡូវ កុំមកចង់គំរាមអី ប្រកាសអី ប្រកាសទៅ ធ្វើទៅ។ នីតិវិធីប៉ុន្មានខែ ទម្រាំចេញនីតិវិធីនុ៎ង ហើយបន្តទៅប៉ុន្មានខែទៀត រួចហើយទៅរកកុងស៊ុងស៊ិសអីណា....។ យើង សព្វថ្ងៃនេះ បើនិយាយពីលក្ខខណ្ឌទទួលការអនុគ្រោះ គឺបានបាត់បង់បណ្តើរៗហើយ»។

EBA (Everything but Arms) គឺជាប្រព័ន្ធអនុគ្រោះពន្ធលើគ្រប់មុខទំនិញនិងផលិតផល ដោយលើកលែងតែអាវុធប៉ុណ្ណោះ។ ប្រទេសណា ដែលបានចុះកិច្ចព្រមព្រៀងជាមួយសហភាពអឺរ៉ុបស្តីពី ប្រព័ន្ធ EBA ប្រទេសនោះ ត្រូវទទួលបានការអនុគ្រោះពន្ធ ចំពោះការនាំចូលទំនិញនិងផលិតផល ទៅកាន់ទីផ្សារអឺរ៉ុប។ កម្ពុជា ក៏ជាប្រទេសមួយ ដែលបានចុះកិច្ចព្រមព្រៀងជាមួយសហភាពអឺរ៉ុបស្តីពី ប្រព័ន្ធ EBA ដែរ៕