ជាតិ
កម្ពុជា ស្នើឲ្យវៀតណាម ជួយចាត់វិធានការតឹងរ៉ឹងលើការគ្រប់គ្រងពាណិជ្ជកម្មព្រៃឈើ និងនេសាទឆ្លងដែនខុសច្បាប់ រូបពីហ្វេសប៊ុកក្រសួងកសិកម្ម
× ភ្នំពេញ៖ កម្ពុជា ស្នើឲ្យវៀតណាម ចាត់វិធានការតឹងរ៉ឹងលើការគ្រប់គ្រងពាណិជ្ជកម្មព្រៃឈើ និងនេសាទឆ្លងដែនខុសច្បាប់ ដែលគ្មានការអនុញ្ញាតត្រឹមត្រូវ។ សំណើរបស់រដ្ឋាភិបាលកម្ពុជានេះ ធ្វើឡើងនៅក្នុងជំនួបរវាងលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ង្វៀន សួនគឿង រដ្ឋមន្ត្រីកសិកម្ម និងអភិវឌ្ឍជនបទនៃសាធារណរដ្ឋសង្គមនិយមវៀតណាម។
បញ្ហាកសិកម្មជាច្រើន ត្រូវបានលើកយកទៅពិភាក្សាគ្នារវាងភាគីទាំងពីរ ដែលក្នុងនោះរួមមានបញ្ហាអនុវិស័យព្រៃឈើ សត្វ និងជលផលជាដើម។ តាមរយៈការពិភាក្សាគ្នានេះ ភាគីទាំងពីរស្វែងដំណោះស្រាយពីបញ្ហាពាណិជ្ជកម្មឆ្លងដែនរវាងប្រទេសទាំងពីរ។ ជាពិសេសអនាម័យ និងភូតគាមអនាម័យ រួមទាំងវិធានការទប់ស្កាត់ និងកំចាត់សមាសភាពចង្រៃលើដំណាំ។
ចំពោះចលនាសត្វឆ្លងដែន លោក វេង សាខុន បានស្នើឲ្យភាគីវៀតណាមជួយពង្រឹងការបង្ការ និងទប់ស្កាត់ជំងឺឆ្លងរាតត្បាត ដើម្បីបញ្ចៀសនូវហានិភ័យរវាងប្រទេសទាំងពីរ។ ជាមួយគ្នានេះ រដ្ឋមន្ត្រីកសិកម្មកម្ពុជា ក៏ស្នើដល់ភាគីវៀតណាម ឲ្យជួយចាត់វិធានការតឹងរឹងបន្ថែមទៀត ពាក់ព័ន្ធដល់ការគ្រប់គ្រងពាណិជ្ជកម្មអនុផលព្រៃឈើខុសច្បាប់ និងការនេសាទឆ្លងដែនខុសច្បាប់ ដោយពុំមានការអនុញ្ញាត ហើយមិនមានរបាយការណ៍ច្បាស់លាស់ ខណៈដែលកម្ពុជាកំពុងស្ថិតក្នុងដំណាក់កាល រៀបចំលិខិតបទដ្ឋាននានា ដែលសមស្របទៅនឹងលក្ខខណ្ឌតម្រូវរបស់សហភាពអ៊ឺរ៉ុប។
ទាក់ទងនឹងចំណុចនេះ ភាគីវៀតណាម អះអាងថា ខ្លួនបានយកចិត្តទុកដាក់គ្រប់គ្រង ការនេសាទឆ្លងដែន និងការដឹកជញ្ជូនផល អនុព្រៃឈើឆ្លងដែនខុសច្បាប់នេះ។រដ្ឋមន្ត្រីក្រសួងកសិកម្មវៀតណាម លោក ង្វៀន សួនគឿង បាននិយាយថា រដ្ឋាភិបាលវៀតណាម បានជំរុញឲ្យមានការដាំព្រៃឈើឡើងវិញ ជាលក្ខណៈពាណិជ្ជកម្ម និងដើម្បីជួយដល់បរិស្ថានផងដែរ។
ក្រៅពីកិច្ចការដទៃទៀត ភាគីទាំងពីរគ្រោងរៀបចំក្រុមការងារកម្រិតជំនាញ ដើម្បីបន្តធ្វើការពិភាក្សា និងដោះស្រាយនូវបញ្ហានានា ដើម្បីជំរុញកិច្ចសហប្រតិបត្តិការទ្វេភាគី អាចពង្រីកនូវទំហំពាណិជ្ជកម្មកសិកម្មរវាងប្រទេសទាំងពីរផង៕
Tag:
វេង សាខុន
កសិកម្ម
នេសាទ
ព្រៃឈើ
© រក្សាសិទ្ធិដោយ thmeythmey.com