ដោយ៖
គី ចំណារ
មហន្តរាយវិទ្យុសកម្មដែលកើតឡើងតាំងពីឆ្នាំ១៩៨៦នៅប្រទេសអ៊ុយក្រែនបានបន្សល់ទុកនូវទីក្រុងខ្មោចមួយដែលមានឈ្មោះថា Chernobyl ដែលគ្មានប្រជាជនណាមួយទៅរស់នៅទៀតឡើយ។ ប៉ុន្តែ រឿងដែលគួរឲ្យចាប់អារម្មណ៍បច្ចុប្បន្ន ប្រជាជនមួយចំនួនបានសម្រេចចិត្តទៅរស់នៅតំបន់ដែលមានគ្រោះថ្នាក់មួយនេះទៅវិញ។
នាពេលល្ងាចនៅរដូវក្តៅមួយ អ្នកស្រី Maryna Kovalenko កំពុងលេងជាមួយកូនស្រីទាំងពីរនិងឆ្កែរបស់គាត់នៅដីតូចមួយក្រោយផ្ទះ។ ប៉ុន្តែបើសិនជាគេដើរទៅក្រោយផ្ទះមួយនេះឲកាន់តែជ្រៅនោះ គេនឹងឃើញថា វាជាកន្លែងមួយស្ងាត់ជ្រងំគ្មានសកម្មភាពអ្វីទាំងអស់។
ដោយសារតែការរស់នៅពោរពេញទៅដោយការប្រកួតប្រជែងច្រើនពេកក្នុងទីក្រុង អ្នកស្រី Maryna បាននាំកូនស្រីទាំងពីររបស់គាត់ធ្វើចំណាកស្រុកអស់រាប់រយគីឡូម៉ែតមកកាន់តំបន់ដាច់ស្រយាលមួយនេះ មានចំងាយជាង៣០គីឡូម៉ែតប៉ុណ្ណោះពីរោងចក្រសម្បូរដោយជាតិវិទ្យុសកម្មឈ្មោះថា Chernobyl ។
និយាយជារួមជាតិវិទ្យុសកម្មឬភាសាអង់គ្លេសហៅថា “Radioactive element” គឺជាសារធាតុម្យ៉ាងដែលសម្បូរទៅដោយថាមពល សម្រាប់ការផលិតអគ្គីសនី ប៉ុន្តែវាក៏មានគ្រោះថ្នាក់ធ្ងន់ធ្ងរផងដែរបើវាមានវត្តមានក្នុងបរិស្ថានធម្មជាតិ។
នៅថ្ងៃទី២៦ ខែមេសា ឆ្នាំ១៩៨៦ រោងចក្រផលិតថាមពលនុយក្លេអ៊ែរ Chernobyl នេះបានជួបប្រទះគ្រោះមហន្តរាយមួយដែលមិនធ្លាប់មាន។ នោះគឺការធ្វើតេស្តសាកល្បងសុវត្តិភាពនៃរោងចក្រមួយនេះបានទទួលបរាជ័យ ហើយរោងចក្រនេះឆាបឆេះ និងសាយភាយធាតុវិទ្យុសកម្មគ្រោះថ្នាក់ទាំងនេះចូលទៅក្នុងបរិយាកាស។
សារព័ត៌មានប្រទេសអង់គ្លេស BBC ផ្សាយថាសារធាតុទាំងនេះត្រូវបានបក់នាំតាមខ្យល់ និងជាប់ទៅពពកកម្ពស់ជាច្រើនគីឡូម៉ែតទៅកាន់ទូទាំងទ្វីបអឺរ៉ុប។ ប្រជាជនប្រមាណ១១៦០០០នាក់ត្រូវគេជម្លៀសចេញភ្លាមៗបន្ទាប់ពីហេតុការណ៍នេះកើតឡើង។ ចាប់តាំងពីពេលនេះមកគ្មានអ្នកណាម្នាក់ត្រឡប់មករស់នៅកន្លែងដដែលនេះទេ។ ទោះបីយ៉ាងក៏ដោយ មានមនុស្សមួយចំនួនតូចមិនព្រមជម្លៀសចេញនោះឡើយ ព្រោះនេះជាទឹកដីដូនតារបស់ពួកគាត់។
អ្នកស្រី Maryna មានផ្ទះមួយតូចដែលមិនទាន់បានជួសជុលឡើយ។ ប៉ុន្តែផ្ទះគាត់ក៏មានភ្លើងអគ្គីសនី និងទឹកប្រើប្រាស់រួមទាំងសេវាទូរសព្ទផងដែរ។ ព្រោះអ្នកស្រីមានជីវភាពក្រីក្រខ្លាំងពេក ទើបរដ្ឋាភិបាលសម្រេចចិត្តផ្តល់ផ្ទះតូចមួយនេះដល់គាត់។ ជាសំណង គ្រួសាររបស់គាត់ត្រូវធ្វើការងារសហគមន៍បន្តិចម្តងៗ ដើម្បីទទួលបានផ្ទះនេះមក។ នៅខាងក្រោយផ្ទះ កូនស្រីរបស់គាត់ចិញ្ចឹមសត្វមាន់ ទន្សាយ និងពពែ សម្រាប់ហូប និងលក់ដូរ។
គ្រួសារដ៏តូចមួយនេះបានចេញពីទីក្រុង Toshkivka ដែលជាតំបន់មួយនៅខាងកើតប្រទេសអ៊ុយក្រែនដែលជាតំបន់មានជម្លោះប្រដាប់អាវុធដែលបានសម្លាប់ជីវិតប្រជាជនអស់ប្រមាណ១០០០០នាក់ទៅហើយនោះ។
តាំងពីមានការផ្ទុះរោងចក្រផលិតថាមពល Chernobyl នេះមក អ្នកជំនាញវិទ្យាសាស្ត្រជុំវិញពិភពលោកបានស្រាវជ្រាវ និងតាមដានតំបន់នេះជានិច្ច។ អ្នកជំនាញនៅទីនោះបាននិយាយថា កម្រិតសារធាតុវិទ្យុសកម្មនៅក្នុងបរិយាកាសបានថយចុះយ៉ាងច្រើន ប៉ុន្តែយ៉ាងណាមិញសារធាតុទាំងនេះនៅតែបន្តលាក់ខ្លួននៅក្នុងដី បឹង និងទន្លេមួយចំនួនដដែល។ មិនត្រឹមតែប៉ុណ្ណោះ វានៅអាចបន្តបង្កគ្រោះថ្នាក់ដល់ជីវិតមនុស្សផងដែរ។ សារធាតុនេះមានឈ្មោះថា Cesium-137 ហើយវាអាចមានវត្តមានក្នុងសាច់សត្វនិងបន្លែមួយចំនួន។
គ្រួសារលោកស្រី Maryna បាននិយាយថា ទោះបីពួកគេមានឧកាសទៅរស់នៅតំបន់ផ្សេងប្រសើរជាងនេះក៏ដោយ ក៏ពួកគេជ្រើសរើសនៅទីនេះដែរ។ «ខ្ញុំមិនខ្វល់ពីសារធាតុវិទ្យុសកម្មអ្វីនោះទេ ខ្ញុំគ្រាន់តែចង់បានជីវិតមួយប្រកបដោយភាពស្ងាត់ស្ងៀមតែប៉ុណ្ណោះ»។ នេះជាការលើកឡើងរបស់អ្នកស្រី Maryna ។
លោកស្រីក៏បានបន្តថា៖«ពួកគាត់គ្រាន់តែត្រូវការជីវិតមួយដែលចៀសឆ្ងាយពីភាពអាសន្នតែប៉ុណ្តោះ»។