បវរកញ្ញាកម្ពុជា ឌី លីកា អាយុ២១ឆ្នាំ ដែលមានកំណើតនៅខេត្តកំពង់ចាម ស្ថិតក្នុងចំណោមបវរកញ្ញា១០រូបដែលត្រូវប្រជែងយកពានឈុតតំណាងជាតិ (Best National Costumes) និងពានប្រជាប្រិយភាព (Miss Popular Vote) ក្នុងការប្រកួតបវរកញ្ញាអន្តរជាតិ Miss Grand International ដែលរៀបចំនៅក្រុង Kawthaung ប្រទេសមីយ៉ាន់ម៉ា។
ឌី លីកា ស្ថិតក្នុងសម្លៀកបំពាក់ «ទេពីស្រីសួគ៌បវរឦសានបុរៈ» ស្ថិតក្នុងចំណោមបេក្ខនារី១០នាក់ដែលជ្រើសរើសចេញពីការបោះឆ្នោត។ បេក្ខនារីផ្សេងទៀតរួមមាន Nga Phuong Bui (វៀតណាម), Valierie Alcide (ហៃទី), Nadia Purwoko (ឥណ្ឌូណេស៊ី), Lezly Díaz (ម៉ិកស៊ិក), Clara Sosa (ប៉ារ៉ាហ្គាយ), Andrea Moberg (ប៉េរូ), Eva Patalinjug (ហ្វីលីពីន), Meenakshi Chaudhary (ឥណ្ឌា) និង Sumyat Phoo (មីយ៉ាន់ម៉ា)។
បេក្ខនារី១០រូបទៀតដែលត្រូវបានជ្រើសរើសដោយចៅក្រមសម្រាប់ពានរង្វាន់ Best National Costumes នេះ រួមមានបវរកញ្ញាពីកូស្តារីកា ជប៉ុន ឡាវ លីទុយអានី ណេប៉ាល់ ប៉ាណាម៉ា ស្រីលង្កា តង់ហ្សានី ថៃ និងសំប៊ី។
បេក្ខនារី៥រូបពីការបោះឆ្នោត និង៥រូបពីការជ្រើសរើសដោយចៅក្រម នឹងជ្រើសរើសសម្រាប់វគ្គផ្តាច់ព្រ័ត្រនាថ្ងៃទី២៥ ខែតុលា ខាងមុខ។
ជាមួយគ្នានេះផងដែរ កញ្ញា វី លីកា ស្ថិតក្នុងចំណោមបេក្ខនារី១០រូបសម្រាប់ពានរង្វាន់ប្រជាប្រិយភាព (Miss Popular Vote)។ បេក្ខនារី៩រូបទៀតដែលត្រូវប្រជែងពាននេះ រួមមាន Teau McKenzie (កោះ Cook Islands), Andrea Moberg (ប៉េរូ), Debra Jeanne Poh (ម៉ាឡេស៊ី), Nicole M.Colón (ព័រតូរីកូ), Lezly Díaz (ម៉ិកស៊ិក), Sheyla Quizena (កូឡុំប៊ី), Annis Alvarez (វេណេស៊ុយអេឡា) និង Blanca Arambulo (អេក្វាឌ័រ)។
កម្ពុជាបានចូលរួមក្នុងព្រឹត្តិការណ៍នេះ ចំនួន៣លើកហើយ ដែលក្នុងនោះមាន ទឹម ស្រីនាថ (២០១៤), សេង ប៉ូលវិថាវី (២០១៥), ខ្លឹម ស្រីគា (២០១៧)។ កាលពីឆ្នាំ២០១៦ កញ្ញា ហេង ចន្ថា ក៏មានឈ្មោះតំណាងឲ្យកម្ពុជា ផងដែរ ប៉ុន្តែបវរកញ្ញារូបនេះ រួមជាមួយបវរកញ្ញា Rose Paul របស់ហៃទី និង Zeenus Lama របស់ណេប៉ាល់ ដែលមិនទទួលបានទិដ្ឋាការទៅកាន់ទឹកដីសហរដ្ឋអាមេរិក។
សម្រាប់ពានរង្វាន់ផ្នែកសម្លៀកបំពាក់ជាតិ (Best National Costume Award) បវរកញ្ញាវៀតណាម Cao Linh ឈ្នះដំបូងគេនៅឆ្នាំ២០១៤ បន្ទាប់មកបវរកញ្ញាហ្វីលីពីន Parul Shah (២០១៥) ហើយពីរឆ្នាំចុងក្រោយបានទៅលើបវរកញ្ញាឥណ្ឌូណេស៊ី Ariska Putri Pertiwi និង Dea Goesti Rizkita។
រីឯពាន Miss Popular Vote វិញ បវរកញ្ញាស្រីលង្កា Ornella Mariam Gunesekere ទទួលបាននៅឆ្នាំ២០១៥ បវរកញ្ញាកូរ៉េខាងត្បូង Yeseul Cho (២០១៦) និងបវរកញ្ញាឥណ្ឌូណេស៊ី Dea Goesti Rizkita (២០១៧)។
គិតចាប់តាំងពីឆ្នាំ២០១៣មក កញ្ញាឯកដែលគ្រប់គ្រងមកុដ Miss Grand International រួមមាន Janelee Chaparro (ព័រតូរីកូ), Lees Garcia (គុយបា), ClaIre Elizabeth Parker (អូស្ត្រាលី), Ariska Putri Pertiwi (ឥណ្ឌូណេស៊ី) និង Maria Jose Lora (ប៉េរូ)៕