កម្មករជិត១០០ នៅកំពង់ស្ពឺ ដួលសន្លប់ ព្រោះភ័យនឹងកម្មករមានជំងឺម្នាក់ ស្រែកឡូឡា

ជាតិ

សង្គមជាតិ

កម្មករជិត១០០ នៅកំពង់ស្ពឺ ដួលសន្លប់ ព្រោះភ័យនឹងកម្មករមានជំងឺម្នាក់ ស្រែកឡូឡា

19, Oct 2018 , 2:18 pm

រូបភាព

រូបពីទំព័រហ្វេសប៊ុករបស់ស្នងការនគរបាលខេត្តកំពង់ស្ពឺ

ដោយ: ថ្មីៗ

កម្មករ-កម្មការិនីដល់ទៅជិត១០០នាក់ ដែលបម្រើការងារនៅរោងចក្រផលិតស្បែកជើងមួយឈ្មោះ វីងស្តារស៊ូរ ក្នុងខេត្តកំពង់ស្ពឺ បានដួលសន្លប់តៗគ្នា នៅថ្ងៃទី១៩ ខែតុលា ឆ្នាំ២០១៨នេះ។ នេះបើតាមព័ត៌មានដែលបង្ហោះនៅលើទំព័រហ្វេសប៊ុករបស់ស្នងការនគរបាលខេត្តកំពង់ស្ពឺ។

ស្នងការខេត្តកំពង់ស្ពឺ បានបញ្ជាក់លើទំព័រហ្វេសប៊ុកថា មូលហេតុ ដែលបណ្តាលឲ្យកម្មករ-កម្មការិនីទាំងនោះ ដួលសន្លប់ គឺដោយសារតែពួកគេ មានអារម្មណ៍ភិតភ័យយ៉ាងខ្លាំង ក្រោយពីឮកម្មការិនីម្នាក់ ដែលទើបនឹងចូលធ្វើការ និងមានជំងឺប្រចាំកាយ បានស្រែកឡូឡាក្នុងរោងច្រក។ ស្នងការខេត្តកំពង់ស្ពឺ បានអះអាងបែបនេះថា៖«ពេលកម្មការិនីនោះ ស្រែកឡូឡា អ្នកខ្លះក៏បានរត់ចេញមកក្រៅរោងចក្រ ហើយអ្នកខ្លះ មានអាការៈស្ទើរខ្យល់ ស្ទើរវិលមុខ ក៏បានទន់ដៃ ទន់ជើង ដួលសន្លប់ងងឹតមុខ»។

ព័ត៌មានលើទំព័រហ្វេសប៊ុកនោះ បានឲ្យដឹងទៀតថា កម្មករ-កម្មការិនីខាងលើ ត្រូវបានជួយសង្គ្រោះបឋមពីក្រុមការងារសន្ដិសុខដែលយាមនៅក្រុមហ៊ុន កងកម្លាំងនគរបាល និងមន្ដ្រីអាជ្ញាធរពាក់ព័ន្ធជាច្រើន។ បន្ទាប់មក ពួកគេ ក៏ត្រូវបានបញ្ជូនទៅកាន់គ្លីនិកឯកជន ដោយអ្នកខ្លះទៀត ត្រូវបានបញ្ជូនទៅមន្ទីរពេទ្យបង្អែកស្រុកគងពិសី។

ប្រភពដដែល បានបញ្ជាក់ចុងក្រោយយ៉ាងដូច្នេះថា៖«បច្ចុប្បន្នកម្មករ-កម្មការិនីទាំងអស់ មានអាការៈធូស្រាលវិញហើយ មិនបង្កឲ្យមានគ្រោះថ្នាក់ដល់អាយុជីវិតនោះទេ»៕