ជាតិ
សេដ្ឋកិច្ច
×![]()
ដោយ: ភួង វ៉ាន់ថា
ភ្នំពេញ៖ សហគ្រាសធុនតូច និងមធ្យមក្នុងប្រទេសកម្ពុជា ត្រូវពង្រឹងលើចំណុចចំនួន ៤សំខាន់ៗ ដើម្បីពង្រីកលទ្ធភាពចូលរួមប្រកួតប្រជែងលើទីផ្សារក្នុង និងក្រៅប្រទេស។ កត្តាទាំង៤នោះ រួមមាន ការពង្រឹងសមត្ថភាព គុណភាព ការផ្ដល់ប្រភពទុន និងមានទីផ្សារច្បាស់លាស់។ នេះបើយោងតាមការលើកឡើងរបស់នាយកប្រតិបត្តិមជ្ឈមណ្ឌលពាណិជ្ជកម្មអន្តរជាតិ ក្នុងជំនួបពិភាក្សាការងារជាមួយសម្ដេចនាយករដ្ឋមន្ត្រី ហ៊ុន សែន នៅថ្ងៃទី២២ខែតុលានៅប្រទេសស្វីស។ 
អ្នកស្រី អារ៉ាន់ឆា ហ្គ្យុងហ្សាឡែស (Arancha Gongalez) នាយកប្រតិបត្តិមជ្ឈមណ្ឌលពាណិជ្ជកម្មអន្តរជាតិបានលើកឡើងថា ដើម្បីជំរុញសហគ្រាសធុនតូច និងមធ្យម (SME) ឲ្យកាន់តែរឹងមាំ កម្ពុជាត្រូវគិតដល់កត្តាចំនួន៤ចម្បង។ អ្នកស្រីថ្លែងថា កម្ពុជាត្រូវធ្វើយ៉ាងណាឲ្យ SME មានសមត្ថភាពអាចឆ្លើយតបទៅនឹងតម្រូវការទីផ្សារបាន ផលិតទំនិញមានគុណភាពដើម្បីនាំចេញ និងទទួលបានប្រភពទុន ព្រមទាំងត្រូវមានទីផ្សារពិតប្រាកដសម្រាប់ SME ។
កម្ពុជាពិតជាមានសមត្ថភាពច្រើន ក្នុងការកសាង និងពង្រីកនូវសក្តានុពលរបស់ខ្លួន ដើម្បីពង្រីងសមត្ថភាពឲ្យកាន់តែមានភាពប្រកួតប្រជែងប្រកបដោយភាពរឹងមាំ ពិសេសការជួយដល់ SME ដែលជាចលករជំរុញឲ្យវិស័យពាណិជ្ជកម្មកាន់តែខ្លាំងក្លា។ នេះបើតាមការលើកឡើងរបស់អ្នកស្រីអារ៉ាន់ឆា ហ្គ្យុងហ្សាឡែស។ អ្នកស្រីបន្ថែមថា នៅខែវិច្ឆិកាខាងមុខនេះ អ្នកស្រីនឹងធ្វើអង្កេតពីកាប្រឈមរបស់ SME ក្នុងប្រទេសកម្ពុជា ដើម្បីរិះរកវិធីសាស្ត្រក្នុងការជួយដល់ប្រទេសកម្ពុជា។
ជាមួយគ្នានេះ សម្ដេចនាយករដ្ឋមន្ត្រី អះអាងថា រដ្ឋាភិបាលកំពុងតែធ្វើគ្រប់វិធីក្នុងការជំរុញដំណើរការរបស់សហគ្រាសធុនតូច និងមធ្យមឲ្យកាន់តែរីកចម្រើន និងមានលទ្ធភាពច្រើនជាងមុន ពិសេសលើផ្នែកទីផ្សារ និងប្រភពទុន។ សម្ដេច ហ៊ុន សែន លើកឡើងដូចនេះថា៖«កន្លងមកសម្តេចបានចូលរួមដល់ការលើកកម្ពស់ដល់សហគ្រាសធុនតូច និងមធ្យមនេះ ទាំងនៅក្នុងប្រទេស និងក្រៅប្រទេស ធ្វើយ៉ាងណាជំរុញកំណើនក្នុងវិស័យនោះឲ្យកាន់តែរឹងមាំ»។
លោក តែ តាំងប៉ ប្រធានសម្ព័ន្ធសហគ្រាសធុនតូច និងមធ្យមកម្ពុជា ធ្លាប់លើកឡើងថា SME របស់កម្ពុជា អាចផ្គត់ផ្គង់ទីផ្សារក្នុងស្រុកគ្រប់គ្រាន់ ខណៈសហគ្រាសមួយចំនួន កំពុងចុះបញ្ជីទទួលស្គាល់កម្រិតស្ដង់ដារ ដើម្បីប្រកួតប្រជែងទីផ្សារក្នុងតំបន់អាស៊ាន។ លោកក៏បានស្នើឲ្យរដ្ឋាភិបាលកាត់បន្ថយការនាំចូលផលិតផលសម្រេចពីបរទេសហូរចូលមកទីផ្សារកម្ពុជា និងជួយរកទីផ្សារបន្ថែមទៀតដើម្បីជួយឲ្យសហគ្រាសធុនតូច និងមធ្យមមានការរីកចម្រើន៕
Tag:
SME
© រក្សាសិទ្ធិដោយ thmeythmey.com
