ជាតិ
រូបភាពពីរដ្ឋបាលខេត្តព្រះសីហនុ
×![]()
ព្រះសីហនុ៖ គិតត្រឹមថ្ងៃទី២៦ ខែតុលានេះ មនុស្សយ៉ាងយោចណាស់មា្នក់ស្លាប់ និង៩នាក់ទៀតក្អួតចង្អោរដោយសារតែពុលត្រីក្រពត។ បើតាមលោក ឱ សារឿន អ្នកនាំពាក្យរដ្ឋបាលខេត្តព្រះសីហនុ មូលហេតុដែលនាំឲ្យមានការពុលត្រីក្រពត ដោយសារតែពលរដ្ឋបរិភោគត្រីដែលគេបានហាមឃាត់។ 
លោក ឱ សារឿន បានប្រាប់ដល់សារព័ត៌មានថ្មីៗថា ត្រីក្រពតដែលបណ្ដាលឲ្យពលរដ្ឋបរិភោគពុលនេះ គឺជាប្រភេទត្រីពុល ដែលគេបានហាមឃាត់មិនឲ្យពលរដ្ឋ ជាពិសេសអ្នកនេសាទ នេសាទ លក់ ឬបរិភោគនោះទេ។ លោក សារឿន បញ្ជាក់ថា៖ «មូលហេតុដែលបណ្តាលឲ្យមនុស្ស៩ នាក់ក្អួតចង្អោរ និងម្នាក់ស្លាប់ ដោយសារពួកគេចេះតែហូបតាមគ្នាដោយមិនបានដឹងច្បាស់ពីប្រភេទត្រីនេះ»។
អ្នកនាំពាក្យរដ្ឋបាលខេត្តព្រះសីហនុ បានបន្តថា ស្ថានភាពអាការរបស់មនុស្ស៩នាក់នោះ គឺបានធូរស្បើយអស់ហើយ និងមានអ្នកខ្លះបានវិលត្រឡប់ទៅផ្ទះវិញហើយ។
លោក ឈិន សេងងួន អភិបាលខេត្តរងខេត្តព្រះសីហនុ បានផ្តែផ្តាំឲ្យពលរដ្ឋកុំបរិភោគត្រីក្រពត ដើម្បីជៀសវាងគ្រោះថា្នក់ដល់ជីវិតក្នុងរយៈពេល២៤ ម៉ោង បើសិនជាមិនបញ្ជូនទៅពេទ្យឲ្យទាន់ពេលវេលានោះទេ។
កន្លងមកនៅខេត្តកោះកុង ក៏មានមនុស្សម្នាក់ស្លាប់ និង៩នាក់ទៀតមានសភាពក្អួតចង្អោរ ក្រោយពីពួកគេបានបរិភោគត្រីកំពត។ មនុស្សទាំង៩នាក់នោះ បានធូរស្បើយហើយ បន្ទាប់ពីព្យាបាលនៅមន្ទីរពេទ្យ។ នេះបើតាមរបាយការណ៍របស់ក្រសួងសុខាភិបាល៕
Tag:
ត្រីក្រពត
© រក្សាសិទ្ធិដោយ thmeythmey.com
