លោក ពៅ បញ្ញា រកប្រាក់ចំណេញពីដូងក្រអូបបានជាង៤ម៉ឺនដុល្លារ ក្នុងមួយឆ្នាំ

ជាតិ

សេដ្ឋកិច្ច

លោក ពៅ បញ្ញា រកប្រាក់ចំណេញពីដូងក្រអូបបានជាង៤ម៉ឺនដុល្លារ ក្នុងមួយឆ្នាំ

28, Oct 2018 , 8:59 am

រូបភាព

លោក ពៅ បញ្ញា

ដោយ: អ៊ូ សុខមាន (OU Sokmean)

ព្រះសីហនុ៖ ម្ចាស់ចម្ការដូងក្រអូប៤០ហិកតា នៅវាលរិញ ស្រុកព្រៃនប់ ខេត្តព្រះសីហនុ លោក ពៅ បញ្ញា អាចទទួលប្រាក់ចំណេញបានពី ៤ ទៅ៥ម៉ឺនដុល្លារ ក្នុងមួយឆ្នាំ ពីការហុចផលនៃដូងក្រអូបនេះ។ លោក បានទទួលផលពីដូងក្រអូបជាង១០ឆ្នាំមកហើយ។

ក្នុងបទសម្ភាសជាមួយសារព័ត៌មានថ្មីៗ បុរសវ័យជិត៣០រូបនេះ បាននិយាយថា ដូងក្រអូបនៅលើទីផ្សារកម្ពុជាបច្ចុប្បន្ន កំពុងបានក្លាយជាការពេញនិយមសម្រាប់អតិថិជនគ្រប់វ័យទិញពិសា និងមានតម្រូវការខ្ពស់ ជាងផ្លែដូងផ្សេងៗ។ ដូងក្រអូបមកពី វាលរិញរបស់លោក បញ្ញា មានតម្លៃ២៥០០រៀល ក្នុងមួយផ្លែ។ នេះជាតម្លៃចែកចាយឲ្យគេលក់បន្ត។ ដោយឡែកតម្លៃលក់រាយធម្មតាវិញ គឺ៤០០០រៀល ក្នុងមួយផ្លែ។ តម្លៃទាំងនេះ គឺលក់អស់ៗ ពុំដែលសល់ឡើយ មានន័យថាមានដូងប៉ុន្មាន គឺលក់អស់ប៉ុណ្នឹង។

លោកបានឲ្យដឹងថា ដំណាំដូងក្រអូបនេះ មិនពិបាកដាំ និងថែទាំ ដូចដំណាំផ្សេងៗនោះទេ ពោលគឺវាត្រូវការតែទឹក និងជីបំប៉នគល់តែប៉ុណ្ណោះ។

ជាទូទៅដូងប្រភេទនេះ ឲ្យផលបានពេញមួយឆ្នាំ។ ប៉ុន្តែការទទួលបានផលពីដូងនេះ បានច្រើន ឬតិច វាក៏អាស្រ័យទៅលើការថែទាំ និងនៅតាមរដូវកាលផងដែរ។ រដូវវស្សាដូងឲ្យផលបានច្រើន និងល្អ និងថយចុះ ក្នុងរដូវប្រាំង ដោយសារអាកាសធាតុក្តៅ និងទឹកផ្តល់មិនបានគ្រប់គ្រាន់។ «ដូងមួយដើម យ៉ាងហោចណាស់ឲ្យផល ក្រោយរយៈពេលថែទាំយ៉ាងយូរ៤ឆ្នាំ បានពី១៨០ ទៅ២០០គ្រាប់ ឬលើសពីនេះ ក្នុងមួយឆ្នាំ»។ នេះជាការអះអាងរបស់ លោក បញ្ញា។

បើតាមលោក បញ្ញា លោកអាចរកចំណូលបានជាង១២ម៉ឺនដុល្លារក្នុងមួយឆ្នាំ ប៉ុន្តែចំណូលទាំងនេះ ត្រូវចំណាយវិញទៅលើបុគ្គលិក កម្មករ និងការថែទាំជាដើម។ ដូច្នេះសរុបមកលោក បញ្ញា អាចទទួលបានផលចំណេញពី៤ ទៅ៥ម៉ឺនដុល្លារ ក្នុងមួយឆ្នាំ។

បច្ចុប្បន្ន លោក ពៅ បញ្ញា មានដំណាំដូងក្រអូបជាង២០,០០០ដើម នៅលើផ្ទៃដី៤០ហិកតា។ ក្នុងនោះដូងដែលអាចទទួលផលបាន មានជាង៥០ភាគរយនៃចំនួនដើមដូងសរុប។ ក្រៅពីលក់ផ្លែដូងក្រអូប លោក បញ្ញា នៅមានលក់ពូជដូង ដូងរលីង និងចាហួយដូងក្រអូបផងដែរ៕