ស្ថាប័នកំពូលនៃបក្សកុម្មយនីស្តចិន នៅថ្ងៃទី៣១ ខែតុលា បានដាក់ចេញផែនការថ្មីមួយសម្រាប់សេដ្ឋកិច្ចឯកជន និងទីផ្សារហ៊ុន។ ការដាក់ចេញគម្រោងថ្មីនេះធ្វើឡើង ខណៈសេដ្ឋកិច្ចនៃមហាអំណាចទី២នេះកំពុងរងគ្រោះ ដោយសារសង្គ្រាមពាណិជ្ជកម្ម ដែលបញ្ឆេះដោយសហរដ្ឋអាមេរិក។
ការិយាល័យនយោបាយគណៈកម្មាធិការមជ្ឈឹមបក្សកុម្មយនីស្តចិនដឹកនាំដោយលោក ស៊ី ជិនភីង បានលើកឡើងនៅក្នុងសេចក្តីថ្លែងការណ៍មួយ នៅថ្ងៃទីពុធថា សហគ្រាសនានាក្នុងប្រទេសចិនបានប្រឈមមុខនឹងការលំបាកជាច្រើន ហើយហានិភ័យដែលកំពុងកើតឡើងនោះ អាចនឹងមានរយៈពេលវែងថែមទៀតផង។ ត្រង់នេះ ស្ថាប័នកំពូលបក្សកាន់អំណាចចិន បានសង្កត់ធ្ងន់បែបនេះថា៖ «យើងត្រូវតែពង្រឹងការធ្វើកំណែទម្រង់ និងផ្តោតសំខាន់លើបញ្ហាស្នូលនានា ដោយអមជាមួយនឹងដំណោះស្រាយចំគោលដៅ»។
ក្នុងសេចក្តីថ្លែងការណ៍ដដែលនេះ ការិយាល័យនយោបាយ ក៏បានផ្ញើសារដ៏ច្បាស់លាស់មួយថា ក្រុងប៉េកាំងនឹងបេ្តជ្ញាជួយគាំទ្រដោយឥតរុញរា ទៅលើសហគ្រាសឯកជននានាក្នុងប្រទេសចិន។ តាមពិតទៅការប្រកាសបែបនេះគឺហាក់បីដូចជាផ្ទុយស្រឡះទៅនឹង ជំហររបស់ក្រុងប៉េកាំងដែលកាលពីបីខែមុន ដោយខ្លួនបានប្តេជ្ញាផ្តោតសំខាន់លើការចំណាយសម្រាប់វិស័យហេដ្ឋារចនាសម្ព័ន្ធ ដើម្បីពន្លឿនសកម្មភាពសេដ្ឋកិច្ច ដោយពុំបានលើកឡើងនោះឡើយពី «សេដ្ឋកិច្ចឯកជន» ឬគេស្គាល់ផ្សេងទៀតថា វិស័យឯកជននោះ។
បន្ថែមពីការជម្រុញខាងវិស័យឯកជន ស្ថាប័នកំពូលដែលមានសមាជិកចំនួន២៥រូបនេះ បានអះអាងថា ចិននឹងប្រឹងប្រែងជួយគាំទ្រលើទីផ្សារហ៊ុនរបស់ខ្លួន ដើម្បីលើកកម្ពស់ការអភិវឌ្ឍរបស់ទីផ្សារចិន ឲ្យបានល្អប្រសើរ និងមានភាពយូរអង្វែង។ លើសពីនេះ ចិនត្រូវតែបើកចំហទីផ្សាររបស់ខ្លួនទៅដល់អ្នកវិនិយោគិនបរទេស ព្រមទាំងប្តេជ្ញារក្សាផលប្រយោជន៍ស្របច្បាប់នៃជំនួញបរទេសទាំងនោះ ក្នុងប្រទេសចិនឲ្យបានស្ថិតស្ថិេរថែមទៀងផង។
ក្រៅពីការប្តេជ្ញាការធ្វើកំណែទម្រង់ថ្មីដើម្បីទប់ទល់នឹងផលវិបាក ដែលកើតចេញពីសង្គ្រាមពាណិជ្ជកម្មនេះ ក្រុងប៉េកាំង នៅក្នុងសេចក្តីថ្លែងការណ៍ដដែល ក៏បានទទួលស្គាល់ផងដែរថា ចិនកំពុងរងនូវការកើនឡើងនៃសម្ពោធ ដែលធ្វើឲ្យសេដ្ឋកិច្ចធ្លាក់ចុះ។ ជាក់ស្តែង រដ្ឋាភិបាលបានកត់សម្គាល់ពី ការផ្លាស់ប្តូរយ៉ាងគំហុកបានកើតឡើង នៅក្នុងមជ្ឈដ្ឋានខាងក្រៅតែម្តង។ នេះបើតាមទីភ្នាក់ងារព័ត៌មានរដ្ឋចិន Xinhua។
តាមពិតទៅ នេះជាលើកទីមួយហើយដែលស្ថាប័នកំពូលរបស់ចិននេះ បានចេញសេចក្តីថ្លែងការណ៍ បង្ហាញក្តីព្រួយបារម្ភទាក់ទងនឹង កំណើនសេដ្ឋកិច្ចរបស់ខ្លួន ដែលមានសន្ទុះយឺតៗ ចាប់តាំងពីសង្គ្រាមពាណិជ្ជកម្មជាមួយអាមេរិកបានផ្ទុះឡើងមក។
យោងតាមសន្ទស្សន៍គ្រប់គ្រងការបញ្ជាទិញ(PMI) ការធ្លាក់ចុះយ៉ាងគំហុកនៃតម្រូវការនាំចេញ បានបណ្តាលឲ្យការដោះស្រាយក្នុងវិស័យជំនួញគ្មានប្រសិទ្ធភាពជាងគេរំពឹងទុក ជាពិសេសក្នុងវិស័យឧស្សាហកម្មផលិត និងសេវាកម្ម កាលពីខែតុលា។ ទិន្នន័យដដែលនេះក៏បានចង្អុលបង្ហាញបន្ថែមទៀតអំពីការដាំក្បាលចុះនៃសេដ្ឋកិច្ចចិន ក្រោយកំណើនសេដ្ឋកិច្ចនៃយក្សអាស៊ីមួយនេះក្នុងត្រីមាសទីបី បានធ្លាក់ចុះដល់កម្រិតទាបបំផុតមួយ ក្នុងរយៈពេល១០ឆ្នាំចុងក្រោយនេះ។
សារព័ត៌មានហុងកុង South China Morning Post បានដកស្រង់សម្តីរបស់អ្នកជំនាញសេដ្ឋកិច្ចប្រចាំស្ថាប័នហិរញ្ញវត្ថុ JD ក្នុងទីក្រុងហុងកុងថា ប្រមុខដឹកនាំចិនត្រូវបានគេសង្កេតឃើញថា បានផ្លាស់ប្តូរផ្នត់គំនិតរបស់ខ្លួនចំពោះទស្សនៈវិស័យសេដ្ឋកិច្ចរបស់ប្រទេស និងកំពុងត្រៀមខ្លួនសម្រាប់ផលប៉ះពាល់ដែលកើតចេញពីសង្គ្រាមពាណិជ្ជកម្ម។ អ្នកជំនាញរូបនេះ បានបកស្រាយទៀតថា នាពេលនេះរដ្ឋាភិបាលចិន ពុំអាចព្រងើយកន្តើយ ហើយនៅតែចាត់ទុកសេដ្ឋកិច្ចរបស់ខ្លួនថា មានស្ថិរភាព និងសន្ទុះល្អនោះឡើយ៕