របាយការណ៍របស់អង្គការលីកាដូក្រោមចំណងជើង«ពេលដែលត្រូវដោះលែងឲ្យនៅក្រៅឃុំ៖ បញ្ឈប់ការឃុំខ្លួនបណ្ដោះអាសន្នមិនចាំបាច់» បានរកឃើញថា ចំនួនអ្នកជាប់ឃុំក្នុងពន្ធនាគារប្រទេសកម្ពុជា បានកើនឡើងដល់កម្រិតមួយ ដែលមិនធ្លាប់មានពីមុនមក ភាគច្រើនជាអ្នកជាប់ឃុំខ្លួនបណ្តោះអាសន្នរង់ចាំសវនាការ។ តួលេខអ្នកជាប់ឃុំច្រើននេះ បង្កផលលំបាកដល់អ្នកកំពុងជាប់ឃុំឃាំង មន្ត្រីពន្ធនាគារ និងសង្គមជាតិ។
ក្នុងពន្ធនាគារចំនួន ១៨កន្លែង ដែលអង្គការលីកាដូ បានឃ្លាំមើល ក្នុងចំណោមពន្ធនាគារសរុប២៨ កន្លែង ទូទាំងប្រទេសនោះ បានរកឃើញថា អ្នកជាប់ពន្ធនាគារច្រើនជាងមួយភាគបី គឺជាអ្នកដែលត្រូវបានឃុំខ្លួនបណ្តោះអាសន្នរង់ចាំសវនាការ (៩.៥២៧ នាក់ ក្នុងចំណោម ២៥.៩២៦នាក់)។ ហើយនៅក្នុងពន្ធនាគារមួយចំនួនផ្សេងទៀត មានអ្នកជាប់ឃុំច្រើនជាងពាក់កណ្តាល មិនទាន់ត្រូវបានតុលាការបើកសវនាការជំនុំជម្រះនៅឡើយ។
របាយការណ៍អង្គការលីកាដូ បានបញ្ជាក់ដូច្នេះថា៖«មណ្ឌលអប់រំកែប្រែទី១ (ម១) គឺជាពន្ធនាគារមួយក្នុងរាជធានីភ្នំពេញដែលឃុំខ្លួនអ្នកទោសជាបុរស ហើយបានឃុំខ្លួនអ្នកជាប់ឃុំ បីដងលើស ពីចំនួនអ្នកជាប់ឃុំដែលពន្ធនាគារនេះ»។
របាយការណ៍បង្ហាញទៀតថា ស្ត្រីដែលមានកូនអាយុក្រោម ៣ឆ្នាំ រស់នៅជាមួយម្ដាយ ក្នុងពន្ធនាគារ មានចំនួនច្រើនបំផុតមិនធ្លាប់មាន។ បើតាមលីកាដូ ជនជាប់ចោទពីបទល្មើសព្រហ្មទណ្ឌ អាចត្រូវបានតុលាការដាក់ឲ្យជាប់ឃុំឃាំងមុនសវនាការ មិនឲ្យលើសពីរយៈពេល ២២ខែ ឡើយ។
«ការឃុំខ្លួនបណ្តោះអាសន្នរង់ចាំសវនាការច្រើនហួសហេតុ នឹងធ្វើឲ្យស្ថានភាពពន្ធនាគារដែលចង្អៀតណែនស្រាប់ធ្ងន់ធ្ងរឡើង និងធ្វើឲ្យធនធានសម្រាប់ប្រើប្រាស់ក្នុងពន្ធនាគារ ដែលមានតិចតួចស្រាប់ កាន់តែខ្វះខាត»។ នេះជាការបញ្ជាក់របស់អង្គការលីកាដូ។
លីកាដូ បានជំរុញឲ្យចៅក្រមស៊ើបសួរអនុវត្តសិទិ្ធ ក្នុងការសម្រេចដោះលែងជនជាប់ចោទឲ្យនៅក្រៅឃុំបណ្តោះអាសន្ន រហូតដល់ថ្ងៃសវនាការជំនុំជម្រះរឿងក្តីជននោះ។ អង្គការលីកាដូ បានបញ្ជាក់ដូច្នេះថា៖«សិទិ្ធអំណាចនេះ គួរត្រូវបានតុលាការអនុវត្ត ដើម្បីគោរពនូវសិទិ្ធរបស់ពលរដ្ឋគ្រប់រូប និងកាត់បន្ថយសំពាធទៅលើជនជាប់ឃុំរាប់ពាន់នាក់ និងមន្ត្រីពន្ធនាគារជាច្រើន ដែលកំពុងជួបប្រទះស្ថានភាពលំបាក និងយ៉ាប់យឺនជារៀងរាល់ថ្ងៃ នៅក្នុងពន្ធនាគារទាំងអស់នៅកម្ពុជា»។
លោក ខៀវ សុភ័គ អ្នកនាំពាក្យក្រសួងមហាផ្ទៃ មិនបដិសេធនឹងរបាយករាណ៍របស់លីកាដូនោះទេ។ លោក ប្រាប់សារព័ត៌មានថ្មីៗយ៉ាងដូច្នេះថា៖«យើង ទទួលស្គាល់ថា ពន្ធនាគាររបស់យើង កកស្ទះមែន»។
មន្ត្រីជាន់ខ្ពស់របស់ក្រសួងមហាផ្ទៃ បន្តថា បញ្ហានេះ រដ្ឋាភិបាលកម្ពុជា មានគោលការណ៍ច្បាស់លាស់ក្នុងការដោះស្រាយ មិនមែនប្រងើយកន្តើយនោះទេ។ លោក អះអាងថា ការពង្រីកពន្ធនាគារបន្ថែម និង ការអប់រំប្រជាពលរដ្ឋកុំឲ្យប្រព្រឹត្តអំពើខុសច្បាប់ គឺជាយន្តការដ៏សំខាន់ ដើម្បីកាត់បន្ថយការកកស្ទះនេះ។
អ្នននាំពាក្យ សង្កត់ធ្ងន់យ៉ាងដូច្នេះថា៖«មិនមែនយើង មិនពង្រីកបន្ថែមទេ តែយើងធ្វើតាមធនធាន និងលទ្ធភាពដែលមាន។ អ្វីដែលសំខាន់ជាងនេះ គឺយើងត្រូវអប់រំប្រជាពលរដ្ឋ កុំឲ្យធ្វើខុស»៕