ភ្នំពេញ៖ អភិបាលខេត្តព្រះសីហនុ បញ្ជាឲ្យអាជ្ញាធរពាក់ព័ន្ធទាំងអស់ ចាត់វិធានការតាមផ្លូវច្បាប់ ចំពោះអ្នកដែលបំពានច្បាប់ ហើយបង្កបញ្ហាប៉ះពាល់ដល់សណ្ដាប់ធ្នាប់សាធារណៈខេត្ត។
ខណៈខេត្តព្រះសីហនុ កំពុងទទួលបានការអភិវឌ្ឍខ្លាំងនោះ បញ្ហាអសន្តិសុខ និងអនាធិបតេយ្យក៏កើតមានច្រើនដែរ តាមរយៈលំហូរជនបរទេស និងបញ្ហាទំនាស់ដីធ្លី។ បញ្ហាទាំងនេះ បានធ្វើឲ្យកើតមានការរិះគន់ខ្លាំងពីសំណាកប្រជាពលរដ្ឋ ទៅលើការដឹកនាំរបស់អាជ្ញាធរខេត្ត។ អភិបាលខេត្តព្រះសីហនុ ក៏បានដឹងពីបញ្ហាទាំងនេះ។
លោក យន្ត មីន ក្រើនរំឭកមន្ត្រីនៅតាមមន្ទីរអង្គភាពទាំងអស់ ឲ្យខិតខំពង្រឹងការងារតាមតួនាទីភារកិច្ចរបស់ខ្លួន ឲ្យបានល្អប្រសើរ។ តាមរយៈការពង្រឹងសកម្មភាពការងារនេះ លោក យន្ត មីន ដាក់ចេញវិធានការ៣ចំណុច ឲ្យមន្ត្រីខ្លួនអនុវត្តឲ្យបានត្រឹមត្រូវនោះ គឺទី១ ពង្រឹងការអនុវត្តច្បាប់ ទី២ ដោះស្រាយទំនាស់ដីធ្លី និងទី៣ ពង្រឹងការងារបរិស្ថាន សណ្តាប់ធ្នាប់សន្តិសុខ ។
ក្រៅពីនេះអភិបាលខេត្តព្រះសីហនុ បានបញ្ជាឲ្យអាជ្ញាធរចាត់វិធានការតាមផ្លូវច្បាប់ ចំពោះជនណាដែលប្រព្រឹត្តខុសច្បាប់ ទាំងអ្នកមានអំណាច ឬអ្នកតូចក្ដី។ ហ្វេសប៊ុករដ្ឋបាលខេត្តព្រះសីហនុ បានស្រង់សម្ដីលោក យន្ត មីន ដូច្នេះថា៖«ទន្ទឹមនឹងការខិតខំប្រឹងប្រែងរបស់មន្ត្រីទាំងឡាយ តែចាប់តាំងពីខែមេសារហូតដល់ខែតុលាឆ្នាំ២០១៨នេះ ខេត្តព្រះសីហនុ រងការរិៈគន់ច្រើនកគួរកត់សម្គាល់។ ដើម្បីឲ្យស្រុកក្រុង-ខេត្តយើងស្អាតមានរបៀបរៀបរយ យើងពិតជាមិនអាចខ្វះបានឡើយនូវការចូលរួមពីអ្នកទាំងអស់គ្នា។ ពីពេលនេះតទៅទោះអ្នកតូច ឬអ្នកធំក៏ដោយបើបំពានច្បាប់ ត្រូវតែចាត់វិធានការណ៍តាមច្បាប់ ដោយគ្មានការយោគយល់ទៀតឡើយ»។
ដោយឡែកអភិបាលស្រុក -ក្រុងទាំងអស់ ត្រូវចាត់វិធានការសម្អាតចិញ្ចើមផ្លូវឲ្យបានស្អាត ដោយមិនអនុញ្ញាតឲ្យអ្នកណាយកចិញ្ចើមផ្លូវធ្វើអាជីវកម្ម នាំឲ្យខូចសណ្តាប់ធ្នាប់ទៀតឡើយ។ ចំពោះនគរបាលចរាចរណ៍និងនគរបាលសណ្តាប់ធ្នាប់ ត្រូវតែមើលការងារទាំងនេះ ។ នេះជាការបញ្ជារបស់លោក យន្ត មីន។
រយៈពេល២ឆ្នាំចុងក្រោយនេះ ខេត្តព្រះសីហនុ ទទួលបានការវិនិយោគយ៉ាងគំហុក ដែលភាគច្រើនជាក្រុមហ៊ុនរបស់ចិន។ អមជាមួយការវិនិយោគនេះ បញ្ហាអនាធិបតេយ្យ និងអសណ្ដាប់ធ្នាប់ ក៏កើតមានច្រើន រហូតដល់រដ្ឋមន្ត្រីក្រសួងមហាផ្ទៃ សម្ដេច ស ខេង បញ្ជូនមន្ត្រីជំនាញ៤អង្គភាពពីក្រសួង ទៅត្រួតពិនិត្យ និងដោះស្រាយបញ្ហាទាំងនោះ។
បញ្ហាដែលសម្ដេច ស ខេង យល់ថា ជារឿងចាំបាច់ដែលត្រូវដោះស្រាយបន្ទាន់ ដើម្បីកុំឲ្យប៉ះពាល់ដល់សណ្ដាប់ធ្នាប់សាធារណៈនោះ គឺការបង្ក្រាបករណីបទល្មើសសម្លាប់ ការប្រើប្រាស់គ្រឿងញៀន រៀបចំបរិស្ថាន និងអនាម័យ នៅតំបន់ទេសចរណ៍ ខេត្តព្រះសីហនុនេះ។ ជាពិសេសការទប់ស្កាត់ កុំឲ្យទឹកសមុទ្រកម្ពុជា ដែលកំពុងទាក់ទាញទេសចរនេះ ប្រែក្លាយទៅជាកខ្វក់ ហើយប្រើប្រាស់លែងបាន។ ចំណែកបញ្ហាជនជាតិចិនរស់នៅ ហើយបង្កអនាធិបតេយ្យនៅទីនោះ ក៏ជារឿងសំខាន់ដែលក្រសួងមហាផ្ទៃ កំពុងយកចិត្តទុកដាក់ទប់ស្កាត់ និងដោះស្រាយដែរ។
ជាក់ស្ដែងកាលពីពេលថ្មីៗនេះ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ លោក ជា សុផារ៉ា ក៏បានបញ្ជាឲ្យមន្ត្រីជំនាញ៦ក្រុម ចុះទៅត្រួតពិនិត្យសំណង់អគារនៅខេត្តព្រះសីហនុ ក្រោយពីសង្ស័យថា មានសំណង់អគារវិនិយោគច្រើន ដែលសាងសង់ខុសច្បាប់ ពោលគឺគ្មានការអនុញ្ញាតត្រឹមត្រូវពីក្រសួងរៀបចំដែនដី៕