ភ្នំពេញ៖ សិស្សវិទ្យាល័យចំនួន៣រូប បានទទួលអាហារូបករណ៍ Asean Scholarships ទៅសិក្សានៅប្រទេសសិង្ហបុរីរយៈពេល៤ឆ្នាំ។
ក្នុងចំណោមសិស្សកម្ពុជា ២៥នាក់ ដែលបានចូលរួមប្រលងអាហារូបករណ៍ Asean Scholarships មានតែ៣នាក់ប៉ុណ្ណោះ ដែលបានប្រឡងជាប់ទៅសិក្សាទៅប្រទេសសិង្ហបុរី។ អ្នកទាំង៣នាក់នោះមានឈ្មោះ ដូចជា សិស្ស អ៊ឹង កុកឃាំង សិក្សានៅវិទ្យាល័យព្រះមុនីវង្ស ខេត្តបាត់ដំបង, ប៊ិ សុឌីណា រៀននៅ វិទ្យាល័យអូរអំបិល ក្នុងខេត្តបន្ទាយមានជ័យ និងចុងក្រោយ សុគុណ ធីតាភា រៀននៅសាលាឯកជនវ៉េស្ទឡាញន៍។
ទើបតែអាយុ១៦ឆ្នាំ អ៊ឹង កុកឃាំង រៀនថ្នាក់ទី១០ ព្រះមុនិវង្ស ក្នុងខេត្តបាត់ដំបង ដែលបានប្រឡងជាប់អាហារូបករណ៍ បានឲ្យដឹងថា ការប្រលងមាន៤ដំណាក់កាល ដែលផ្តោតលើផ្នែកគណិតវិទ្យា ភាសាអង់គ្លេស ចំណេះដឹងទូទៅ និងចុងក្រោយសម្ភាស។
ម្ចាស់ជ័យលាភីទាំង៣ បានសង្កត់ធ្ងន់ថា ការទទួលបានអាហារូបករណ៍ មិនត្រឹមតែទាមទារឲ្យរៀនពូកែនោះទេ។ ប៉ុន្តែសិស្សទាំងអស់ត្រូវមានភាពជាគំរូក្នុងថ្នាក់ គោរពពេលវេលា និងចូលរួមការងារស្ម័គ្រចិត្តក្នុងសង្គមទៀតផង។ សកម្មភាពទាំងនេះនឹងជួយផ្ដល់ទំនុកចិត្តដល់ម្ចាស់អាហារូបករណ៍ ជឿទុកចិត្តក្នុងការផ្ដល់អាហារូបករណ៍ផងដែរ។
លោក Michael Tan ឯកអគ្គរដ្ឋទូតនៃសាធារណរដ្ឋសឹង្ហបូរីប្រចាំកម្ពុជា បាននិយាយថា សិង្ហបុរីបានផ្ដល់អាហារូបករណ៍ជាច្រើន សម្រាប់ជួយពង្រឹងសមត្ថភាពដល់សិស្ស និស្សិតកម្ពុជា។
ថ្លែងប្រាប់ព័ត៌មានថ្មីៗលោក Michael និយាយថា៖« ជារៀងរាល់ឆ្នាំខ្ញុំកត់សម្កាល់ឃើញថា ចំនួនសិស្សកម្ពុជាដែលជាប់អាហារូបករណ៍មានការកើនឡើង ជាពិសេសឆ្នាំនេះ គឺការអភិវឌ្ឍន៍មានភាពជាវិជ្ជមាន មិនត្រឹមតែសិស្សក្នុងទីប្រជុំជនទេដែលអាចប្រឡងជាប់ ឃើញថាមានសិស្សពីរនាក់មកពីខេត្តដាច់ស្រយាលក៏ជាប់អាហារូបករណ៍នេះដែរ ម្នាក់មកពីបន្ទាយមានជ័យ និងម្នាក់ទៀតមកពីខេត្តបាត់ដំបង ពួកគេមកពីសាលារដ្ឋ មិនមែនមកពីសាលាឯកជនទេ»។
លទ្ធផលទាំងនេះ កើតចេញពីការខិតខំប្រឹងប្រែងរបស់ក្រសួងអប់រំ យុវជននិងកីឡា ដែលបានកំណែទម្រង់ និងពង្រឹងគុណភាពអប់រំកាន់តែល្អប្រសើរ។ នេះជាការលើកឡើងរបស់ឯកអគ្គរដ្ឋទូតសិង្ហបុរីប្រចាំកម្ពុជា។
បច្ចុប្បន្នមានសិស្សកម្ពុជាចំនួន៤៩នាក់បានជាប់អាហារូបករណ៍រ Asean Scholarships របស់ប្រទេសិង្ហបុរីនេះ។ ការប្រលងអាហារូបករណ៍នេះមានការលំបាក និងមានការប្រគួតប្រជែងខ្លាំង។ លោក យក់ ង៉ុយ រដ្ឋលេខាធិការក្រសួងអប់រំ យុវជននិងកីឡា រំពឹងថា សិស្ស និស្សិតកម្ពុជានឹងជួយអភិវឌ្ឍន៍ប្រទេសជាតិក្រោយបញ្ចប់ការសិក្សានៅបរទេស ។
រដ្ឋលេខាធិការក្រសួងអប់រំរូបនេះ លើកឡើងថា៖ « ការការប្រឡងទាំងអស់គឺធ្វើឡើងដោយសិង្ហបុរីផ្ទាស់ យើងមិនដឹងទេ គេជាអ្នកធ្វើទាំងអស់។ កាលណាយើងបានចេញទៅរៀនខាងក្រៅកាន់តែច្រើន គឺកាន់តែល្អ និស្សិតយើងពង្រិចបានទៅចំណេះដឹង ក្នុងសម័យ សកលភាវូបណីយកម្មសត្សវតទី២១ បច្ចេកវិទ្យាទំនើប ដែលអាចជួយស្រុកយើងបានកាន់តែទូលំទូលាយ»។
Asean Scholarships ជាអាហារូបករណ៍សម្រាប់ប្រទេសជាសមាជិកអាស៊ាន ដែលគាំទ្រដោយរដ្ឋាភិបាលសិង្ហបុរី។ សិស្សដែលជាប់អាហារូបករណ៍នេះនឹងទទួលការអភិវឌ្ឍន៍ជំនាញសំខាន់ៗដូចជា ភាពជាអ្នកដឹកនាំ ទំនាក់ទំនង និងបំណិនជីវិតស្ដងដារប្រទេសសិង្ហបុរី ក្នុងរយៈពេល៤ឆ្នាំ៕