កម្ពុជារកចំណូលបានជាង៦លានដុល្លារ ពីដីសម្បទានសេដ្ឋកិច្ច

ជាតិ

សេដ្ឋកិច្ច

កម្ពុជារកចំណូលបានជាង៦លានដុល្លារ ពីដីសម្បទានសេដ្ឋកិច្ច

06, Nov 2018 , 9:59 pm

រូបភាព

រូបពីហ្វេសប៊ុកក្រសួងកសិកម្ម រុក្ខប្រមាញ់ និងនេសាទ

ដោយ: ភួង វ៉ាន់ថា

ភ្នំពេញ៖កម្ពុជាប្រមូលចំណូលពីដីសម្បទានសេដ្ឋកិច្ចបាន ៦ ,៦៣៦, ៧២០ ដុល្លារសហរដ្ឋអាមេរិក ពីក្រុមហ៊ុនចំនួន ២២៩ ដែលទទួលបានសិទ្ធិវិនិយោគពីរដ្ឋាភិបាល។ នេះបើយោងតាមរបាយការណ៍របស់រដ្ឋមន្ត្រីក្រសួងកសិកម្ម រុក្ខាប្រមាញ់និង នេសាទ ប្រាប់លោកស្រី រ៉ូណាល់ ស្មីត អ្នករាយការណ៍ពិសេសរបស់អង្គការសហប្រជាជាតិ កាលពីថ្ងៃទី៥ វិច្ឆិកា។

ក្នុងរបាយការណ៍បានបង្ហាញថា បច្ចុប្បន្នមានក្រុមហ៊ុនចំនួន ២២៩ ត្រូវបានរាជរដ្ឋាភិបាលសម្រេចឲ្យបន្តសុពលភាពលើផ្ទៃដី ១ ,១៧៨ ,៦៤៦ ហិកតា ដែលស្ថិតក្នុង១៩ខេត្ត នៃប្រទេសកម្ពុជា។ ក្រុមហ៊ុនទាំងនោះ បានឈូសឆាយលើដីចំនួន ៥១៥, ៧០១ ហិកតា, បង្កើនការដាំដុះបានចំនួន ៤៣៨, ២៥០ ហិកតា និងបានកសាងប្រព័ន្ធផ្លូវចំនួន ១៧, ៦២៤ គីឡូម៉ែត្រ។

របាយការណ៍បង្ហាញថា៖ «ក្នុងចំណោមក្រុមហ៊ុនទាំង ២២៩ មានក្រុមហ៊ុនចំនួន ០៣ បានចុះកិច្ចសន្យាថ្មី, ក្រុមហ៊ុន៤៨ បានចុះកិច្ចសន្យាកែសម្រួលថ្មី, ១១៤ ក្រុមហ៊ុនបានចុះបញ្ជីដីរដ្ឋរួចរាល់, ១១៥ ក្រុមហ៊ុនមិនទានបានចុះបញ្ជីដីរដ្ឋ, ១៣៤ ក្រុមហ៊ុន បានធ្វើអនុបយោគរួចរាល់, ៩៥ មិនទាន់បានធ្វើអនុបយោគ»។

កន្លងមករាជរដ្ឋាភិបាលបានផ្តល់ដីសម្បទានសេដ្ឋកិច្ចដល់ក្រុមហ៊ុនចំនួន៣៣០ ក្រុមហ៊ុន។ ប៉ុន្តែរដ្ឋាភិបាលបានសម្រេចនិរាករណ៍លើក្រុមហ៊ុនចំនួន ១០១ និងដកហូតដីបានចំនួន ៧៤៨ ០៦៤ ហិកតា ក្រោយពិនិត្យរកឃើញនូវភាពអសកម្មមួយចំនួន នៃការអនុវត្តគម្រោងវិនិយោគរបស់ក្រុមហ៊ុនទាំងនោះ។

របាយការណ៍ឲ្យដឹងថា៖ « ក្រសួងកសិកម្មបាននិរាករណ៍គម្រោងចំនួន ៥៥ ក្រុមហ៊ុន ដកហូតដីបានចំនួន ៣១០ ៧២៦ ហិកតា។ គណៈកម្មការអន្តរក្រសួង( ក្រសួងកសិកម្ម និង ក្រសួងបរិស្ថាន) បាននិរាករណ៍គម្រោងចំនួន ៤៦ ក្រុមហ៊ុន ដកហូតដីបានចំនួន ៤៣៧ ៣៣៨ ហិកតា»។

ចំណែករបាយការណ៍របស់អង្គការលីកាដូក្នុងឆ្នាំ២០១៨ «ដីសម្បទានក្នុងប្រទេស» បានបង្ហាញថា មានក្រុមហ៊ុនចំនួន ២៧៥ បានទទួលដីសម្បទានពីរដ្ឋាភិបាលចំនួន ២ ,១២៧ ,៥៨៨ ហិកតា។ ក្រុមហ៊ុនកម្ពុជា វិនិយោគលើផ្ទៃដី ៩២៣, ៦៩៦ ហិកតា, ក្រុមហ៊ុនរៀតណាម វិនិយោគលើផ្ទៃដី ៣៤៣ ,៦៩០ ហិកតា, ក្រុមហ៊ុនចិន វិនិយោគលើផ្ទៃដី ៣៧៣ ,៣៤៣ ហិកតា, ក្រុមហ៊ុនម៉ាឡេ វិនិយោគលើផ្ទៃដី ៩០, ៨៤៤ ហិកតា, ក្រុមថៃ វិនិយោគលើផ្ទៃដី ៥៩ ,៦៦៣ ហិកតា, ក្រុមហ៊ុនកូរ៉េ វិនិយោគលើផ្ទៃដី ៩០ ,៥៤៨ ហិកតា, ក្រុមហ៊ុនសិង្ហបុរី ១៣៧ ,៨១៥ ហិកតា, ក្រុមហ៊ុនមិនស្គាល់ ៣៣ ,៨៦៦ ហិកតា, និងផ្សេងៗ វិនិយោគលើផ្ទៃដី ៩៤ ,១២៣ ហិកតា។ ក្រុមហ៊ុនទាំងនោះភាគច្រើនវិនិយោគលើវិស័យកសិកម្ម ដូចជា កៅស៊ូ ដំឡូងមី ដូងប្រេង ស្ករអំពៅ៕