ភ្នំពេញ៖ សម្តេច ហ៊ុន សែន ស្នើទៅតុលាការឲ្យពន្លឿនការដោះស្រាយលើបញ្ហាបណ្ដឹងរបស់សហជីព ក្រោមបទចោទផ្សេងៗ នៅក្នុងដៃតុលាការ។ សហជីព ដែលរងបណ្ដឹងពីថៅកែរោងចក្រ សាទរចំពោះសំណើរបស់សម្ដេច ហ៊ុន សែន ហើយពួកគេចាត់ទុកថា វាជាឱកាសថ្មីមួយ សម្រាប់ពួកគេបំពេញការងារ ក្រោយដោះស្រាយបណ្ដឹងចប់សព្វគ្រប់។
ប្រធានសហភាពចលនាកម្មករកម្ពុជា លោក ប៉ាវ ស៊ីណា ដែលជាប់បណ្ដឹងពីថៅកែរោងចក្រចំនួន៧ តាំងពីឆ្នាំ២០១២មក មានការរីករាយក្រោយពីឭដំណឹងថា រដ្ឋាភិបាលស្នើទៅតុលាការឲ្យដោះស្រាយបណ្ដឹងខ្លួន។ ដ្បិតមិនទាន់ដឹងថា លទ្ធផលដោះស្រាយបណ្ដឹងនោះ នឹងក្លាយទៅជាយ៉ាងណាក្តី ប៉ុន្តែលោក ស៊ីណា បានលួចសង្ឃឹមថា ការដោះស្រាយខាងមុខ នឹងជាឱកាសថ្មីមួយ សម្រាប់លោកបំពេញការងារឲ្យអស់ពីសមត្ថភាពជាងមុន។
ថ្លែងប្រាប់សារព័ត៌មានថ្មីៗ ប្រធានសហជីពរូបនេះ បាននិយាយដូច្នេះថា៖« ក្នុងនាមខ្ញុំផ្ទាល់ ដែលជាមេដឹកនាំសហជីពមួយរូប ខ្ញុំពិតជារីករាយដែលរដ្ឋាភិបាល បានស្នើឲ្យមានការពិចារណា ឬទម្លាក់ការបទចោទទាំងនេះ ហើយវាជាឱកាសមួយធ្វើឲ្យខ្ញុំបន្តការខិតខំប្រឹងប្រែសកម្មភាពការងារបន្តទៀត។ កន្លងមកបណ្តឹងទាំងនេះ វាជាគំនាបមួយដែលធ្វើឲ្យយើងពិបាកក្នុងការបំពេញការងារជូនវិនិយោជិតបន្តទៀត ដោយសាតែយើងបារម្ភពីសុវត្ថិភាព បារម្ភពីការងាររបស់យើងដែលប្រឈមជាមួយនីតិវិធីតុលាការផ្សេងៗ ដែលបានហាមយើងមិនឲ្យមានការជួបជុំគ្នាដឹកនាំ និងការតវ៉ាផ្សេងៗ ជាមួយកម្មករ»។
មិនខុសពីលោក ប៉ាវ ស៊ីណា ឡើយ លោក អាត់ ធន់ ដែលជាប់បណ្ដឹង៧ តាំងពីឆ្នាំ២០១០ដែរនោះ ក៏រំពឹងថា បើបណ្តឹងទាំងនេះ ត្រូវបានបញ្ចប់ពិតមែន វាមានន័យថារដ្ឋាភិបាលបានចូលរួមចំណែក ក្នុងការជួយដោះស្រាយបញ្ហាសហជីព កុំឲ្យរងអយុត្តិធម៌ពីថៅកែរោងចក្រ និងពីរដ្ឋាភិបាល។
«ការស្នើរបស់ប្រមុខរដ្ឋាភិបាល វាជារឿងល្អសម្រាប់ខ្ញុំ ក៏ដូចមេដឹកនាំសហជីពដទៃទៀត ដែលបានរងនឹងបណ្តឹងជាច្រើនពីថៅកែរោងចក្រ និងមន្ត្រីមានអំណាចមួយចំនួន ដើម្បីដោះស្រាយឲ្យចប់ កុំឲ្យបណ្តឹងទាំងនេះជាសម្ពាធទៅលើសហជីព ក្នុងការជួយកម្មករទៀត»។ នេះជាការលើកឡើងរបស់លោក អាត់ ធន់ ដែលបានបន្ថែមថា បច្ចុប្បន្នមានបណ្តឹងលើមេដឹកនាំសហជីពកម្មករ ជាង៥០ករណី ដែលជាបណ្តឹងស៊ីវិល និងបណ្តឹងព្រហ្មទណ្ឌ ។ បណ្ដឹងទាំងនោះ កើតចេញពីក្រុមហ៊ុន និងរោងចក្រចំនួន២០ ។
មិនត្រឹមតែមេដឹកនាំសហជីពទេ ដែលសាទរចំពោះទង្វើរបស់រដ្ឋាភិបាលពេលនេះ សូម្បីតែមន្រី្តជាន់ខ្ពស់ផ្នែកអង្កេតនៃអង្គការការពារសិទ្ធមនុស្សអង្គការលីកាដូ ក៏យល់ឃើញថា សកម្មភាពរបស់រដ្ឋាភិបាលនេះ កំពុងជួយសម្រួលដល់ស្ថានភាពសិទ្ធិមនុស្ស និងការអនុវត្តការងាររបស់ក្រុមសហជីព ដែលតស៊ូមតិ ដើម្បីកម្មករដែរ។ ប៉ុន្តែលោក អំ សំអាត មិនចង់ឲ្យរដ្ឋាភិបាលអើពើតែលើករណីសហជីពប៉ុណ្ណោះទេ ពោលគឺត្រូវជួយគិតគូដោះស្រាយដល់មន្ត្រីសហជីព និងអង្គការសង្គមស៊ីវិលផង។
លោក សំអាត បាននិយាយដូច្នេះ« បើរដ្ឋាភិបាលបានគិតគូទៅលើមេដឹកនាំសហជីពហើយ គួរណាស់ក៏គិតគូទៅដល់មន្ត្រីសហជីព ឬអង្គការសង្គមស៊ីវិលផ្សេងទៀត បានធ្វើការតស៊ូមតិជាមួយមេដឹកនាំទាំងនោះ ដែលកំពុងទទួលរងនូវបណ្តឹងពីថៅកែរោងចក្រដែរ»។
បើតាមមន្ត្រីជាន់ខ្ពស់អង្គការលីកាដូរូបនេះ បច្ចុប្បន្នមានមេដឹកនាំសហជីព មិនក្រោម៦នាក់ឡើយ ដែលរងនូវពាក្យបណ្តឹងលើករណីផ្សេងៗគ្នា ក្នុងគ្រាដែលតវ៉ាទាមទារផលប្រយោជន៍សម្រាប់កម្មករ។
កន្លងមកសហជីព ធ្លាប់បានស្នើទៅក្រសួងការងារ និងក្រសួងយុត្តិធម៌ ជាពិសេសតុលាការ ដើម្បីឲ្យពន្លឿនការដោះស្រាយលើបណ្តឹងខ្លួនដែរ។ ប៉ុន្តែបណ្តឹងទាំងនេះ មិនបានដោះស្រាយឡើយ ពោលគឺនៅរក្សាទុកចោលជាច្រើនឆ្នាំ។ បណ្តឹងភាគច្រើនរបស់សហជីព ក៏មិនបានស៊ើបអង្កេតឲ្យត្រឹមត្រូវពីក្រសួងការងារ និងក្រសួងយុត្តិធម៌ឡើយ។ នេះជាអះអាងរបស់ អាត់ ធន់ ប្រាប់សារព័ត៌មានថ្មីៗ ។
សូមបញ្ជាក់ថា សម្តេច ហ៊ុន សែន បានស្នើទៅតុលាការឲ្យពន្លឿនដោះស្រាយបញ្ហាបណ្ដឹងរបស់សហជីព ថា គួរតែមានចំណាត់ការ ឬគួរតម្កល់ទុកមិនចាត់ការ។ មូលហេតុដែលសម្ដេច ហ៊ុន សែន ចង់ឲ្យតុលាការធ្វើសេចក្តីសម្រេចលើសហជីព ដែលរងបណ្ដឹងឲ្យចប់ស្ថាពរ ដើម្បីឲ្យពួកគេបំពេញការងារឲ្យបានពេញសមត្ថភាព ពោលគឺកុំឲ្យសហជីពទាំងនោះ ធ្វើការក្រោមគំនាបពាក្យបណ្ដឹងឡើយ។ ថ្លែងក្នុងពិធីសំណេះសំណាលជាមួយកម្មកររោងចក្រខេត្តតាកែវ នៅព្រឹកនេះ ប្រមុខរដ្ឋាភិបាល ប្រាប់ឲ្យរដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លោក អ៊ិត សំហេង និងលោក អង្គ វង្ស វឌ្ឍនា រដ្ឋមន្ត្រីក្រសួងយុតិ្តធម៌ ពិនិត្យជុំវិញបណ្តឹងលើមេដឹកនាំសហជីព ដើម្បីយកទៅពិភាក្សាគ្នាជាមួយតុលាការ៕