ជាតិ
លោក William Heidt ជំរុញឲ្យកម្ពុជាបន្តកែលំអស្ថានភាពសិទ្ធិកម្មករ
× ភ្នំពេញ៖ ក្រសួងការងារគួរតែពន្លឿនកំណែទម្រង់សិទ្ធិកម្មករបន្ថែមទៀត ក្នុងការលើកកម្ពស់ទំនាក់ទំនងរវាងថៅកែ-កម្មករ និងរក្សាបាននូវទំនុកចិត្តរបស់អ្នកបញ្ជាទិញអន្តរជាតិ។ នេះជាការលើកឡើងរបស់ លោក William A. Heidt ឯកអគ្គរដ្ឋទូតអាមេរិកប្រចាំកម្ពុជា ដែលបានចូលជួប និងជម្រាបលាលោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃទី៨ខែវិច្ឆិកា។
ឯកអគ្គរដ្ឋទូតអាមេរិក ដែលផុតអាណត្តិរូបនេះ បានស្នើឲ្យ លោករដ្ឋមន្ត្រី បន្តធ្វើការពិគ្រោះយោបល់អោយបានទំលំទូលាយជាមួយផលិតករ សហជីព និងអ្នកពាក់ព័ន្ធដទៃទៀត ដូចជាអង្គការពលកម្មអន្តរជាតិ និងអង្គការមិនមែនរដ្ឋាភិបាលដែលមានការពាក់ព័ន្ធ នៅក្នុងដំណើរការនេះ។ លោក William A. Heidt ក៏បានអបអរសាទរចំពោះជោគជ័យដែលកម្ពុជាសម្រេចបានកន្លងមកក្នុងការពង្រីកវិស័យកម្មន្តសាលរបស់កម្ពុជា និងការកែលំអស្ថានភាពការងារនៅតាមរោងចក្រ។
លោក អ៊ិត សំហេង រដ្ឋមន្ត្រីក្រសួងការងារ បានសម្តែងនូវការវាយតម្លៃខ្ពស់ចំពោះបេសកម្ម របស់លោកអគ្គរដ្ឋទូតដែលបានរួមវិភាគទានដ៏សំខាន់ក្នុងការអភិវឌ្ឍសេដ្ឋកិច្ច-សង្គម នៅកម្ពុជាកន្លងមក។
លោករដ្ឋមន្ត្រីមានប្រសាសន៏ថា៖ «ខ្ញុំពិតជាមានការសប្បាយរីករាយផង និងអាឡោះអាល័យផង នាឱកាសដែលឯកឧត្តមឯកអគ្គរដ្ឋទូត ត្រូវបញ្ចប់បេសកម្មការទូតនៅកម្ពុជា។ ពេលវេលាដូចជាលឿនណាស់ រយៈពេលមួយអាណត្តិរបស់ឯកឧត្តមកន្លងមកនេះ យើងមានទំនាក់ទំនងទៅលើវិស័យពាណិជ្ជកម្ម លក្ខខណ្ឌការងារជាដើម»៕
© រក្សាសិទ្ធិដោយ thmeythmey.com