ក្រុមមេធាវីទាំងបួនរូប ដែលការពារសិទ្ធិឲ្យលោក កឹម សុខា មិនអាចបន្តអត់ទ្រាំមើលសម្តេច ហ៊ុន សែន និង លោក សម រង្ស៊ី យកកូនក្តីរបស់ខ្លួន ទៅធ្វើជាល្បែងភ្នាល់យកឈ្នះ-ចាញ់នោះទេ។ ក្រុមមេធាវី បានចេញសេចក្តីថ្លែងការណ៍រួមមួយ ដើម្បីប្រតិកម្មនឹងការភ្នាល់នេះ។
តាមរយៈសេចក្តីថ្លែងការណ៍ ក្រុមមេធាវីទាំងបួនរូប ដែលរួមមានលោក ផែង ហេង លោក ចាន់ ចេន លោក ផាន់ ច័ន្ទសាក់ និង អ្នកស្រី ម៉េង សុភារី បានលើកឡើងថា ការដោះលែង ឬ ការលើកលែងបទចោទប្រកាន់ចំពោះលោក កឹម សុខា គឺជាសមត្ថកិច្ចរបស់តុលាការ មិនមែនស្ថិតក្រោមការភ្នាល់របស់សម្តេច ហ៊ុន សែន និង លោក សម រង្ស៊ី នោះទេ។ ផ្ទុយទៅវិញ ការភ្នាល់របស់អ្នកទាំងពីរ អាចធ្វើឲ្យប៉ះពាល់ដល់នីតិវិធីនៃការស៊ើបសួរ។
ក្រុមមេធាវី បង្ហាញក្តីបារម្ភក្នុងសេចក្តីថ្លែងការណ៍យ៉ាងដូច្នេះថា៖«ការយកលោក កឹម សុខា មកធ្វើជាល្បែងភ្នាល់គ្នារបៀបនេះ គឺនាំជាតិឲ្យបែកបាក់កាន់តែធ្ងន់ធ្ងរ»។ បន្ទាប់មក ពួកគេ ក៏អំពាវនាវឲ្យអ្នកនយោបាយ ប្រកាន់ខ្ជាប់នូវគុណធម៌និងសីលធម៌ សម្រាប់អ្នកជំនាន់ក្រោយ ហើយគប្បីដង្ហែតាមព្រះបរមរតនកោដ្ឋ និងព្រះមហាក្សត្របច្ចុប្បន្ន ដែលមានព្រះរាជឱង្ការឲ្យខ្មែរគ្រប់រូប រួបរួមគ្នា ក្រោមដំបូលរដ្ឋធម្មនុញ្ញតែមួយ។
បើទោះបីជាក្រុមមេធាវី យល់ឃើញថា ការភ្នាល់គ្នានេះ អាចប៉ះពាល់ដល់នីតិវិធីរបស់តុលាការក្តី តែពួកគេ ពន្យល់ថា វា គ្រាន់តែជារឿងបុគ្គលរវាងសម្តេច ហ៊ុន សែន និង លោក សម រង្ស៊ី ប៉ុណ្ណោះ។ ក្រុមមេធាវី បកស្រាយថា បើតុលាការ សម្រេចដោះលែងលោក កឹម សុខា ឲ្យមានសេរីភាពមែន ក៏មិនមានន័យថាសម្តេច ហ៊ុន សែន ចាញ់ដែរ។
ក្រុមមេធាវី លើកហេតុផលថា ការសម្រេចយ៉ាងណានោះ គឺជានីតិវិធី ដែលត្រូវអនុវត្តដោយតុលាការ មិនមែនអាស្រ័យលើសម្តេច ហ៊ុន សែន ឡើយ។ ក្រុមមេធាវី បញ្ជាក់បែបនេះថា៖«គ្មានអ្នកឈ្នះ ហើយក៏គ្មានអ្នកចាញ់ដែរ គឺខ្មែរទាំងអស់គ្នា ជាអ្នកឈ្នះ»។
សារចុងក្រោយរបស់ក្រុមមេធាវីក្នុងសេចក្តីថ្លែងការណ៍ ដែលធ្វើឡើងនៅថ្ងៃទី១០ ខែវិច្ឆិកា ឆ្នាំ២០១៨ គឺស្នើឲ្យប្រជាពលរដ្ឋគ្រប់រូប កុំឲ្យយកការភ្នាល់នេះ ទៅវាយតម្លៃ និងសុំឲ្យសម្តេច ហ៊ុន សែន និង លោក សម រង្ស៊ី កុំអនុវត្តតាមខសន្យានៃការភ្នាល់នេះ។
ពុំមែនតែក្រុមមេធាវីទេ នៅមានមជ្ឈដ្ឋានជាច្រើនទៀត ដោយរួមមានអ្នកនយោបាយនិងមន្ត្រីនៃអតីតគណបក្សប្រឆាំងផងដែរ បាននាំគ្នារិះគន់សម្តេច ហ៊ុន សែន និង លោក សម រង្ស៊ី។ មានអ្នកខ្លះ បានសម្តែងក្តីអាណិតចំពោះលោក កឹម សុខា ដែលក្លាយជាល្បែងសម្រាប់អ្នកទាំងពីរបែបនេះ។
មកដល់ពេលនេះ សម្តេច ហ៊ុន សែន និង លោក សម រង្ស៊ី បានឆ្លើយឆ្លងគ្នាបីលើកហើយ ជុំវិញការដោះលែងលោក កឹម សុខា និង ការមិនដោះលែង។ ហើយអ្នកដែលបបួលភ្នាល់មុនគេ គឺលោក សម រង្ស៊ី។
លោក សម រង្ស៊ី បានសរសេរសារលើទំព័រហ្វេសប៊ុកថា នៅត្រឹមថ្ងៃទី៣ ខែមីនា ឆ្នាំ២០១៩ បើលោក កឹម សុខា មិនត្រូវបានដោះលែងទេ លោក សុខចិត្តត្រឡប់មកកម្ពុជាវិញ ហើយប្រគល់ខ្លួនឲ្យសមត្ថកិច្ចចាប់តែម្តង។ ក្រោយមក សម្តេច ហ៊ុន សែន ក៏ចេញមុខមកប្រកាសលេងល្បែងនេះជាមួយលោក សម រង្ស៊ី។
សម្តេច ហ៊ុន សែន ប្រាប់ហ្វ្រេសញូថា ខ្លួនសុខចិត្តចុះចេញពីតំណែង បើលោក កឹម សុខា ត្រូវបានដោះលែង តែបើអត់ទេ លោក សម រង្ស៊ី ត្រូវគោរពខសន្យា ដោយត្រូវត្រឡប់មកជាប់ពន្ធនាគារនៅកម្ពុជា៕