ស្ករត្នោតGI កំពង់ស្ពឺ មានតម្រូវការច្រើន តែខ្វះកម្លាំងពលកម្មផលិត

ជាតិ

បទយកការណ៍ / បទសម្ភាសន៍

សេដ្ឋកិច្ច

ស្ករត្នោតGI កំពង់ស្ពឺ មានតម្រូវការច្រើន តែខ្វះកម្លាំងពលកម្មផលិត

12, Nov 2018 , 10:19 pm

រូបភាព

ដោយ:

កំពង់ស្ពឺ៖ ស្ករត្នោតកំពង់ស្ពឺ ទទួលបានឋានៈជាផលិតផលសម្គាល់ភូមិសាស្ត្រ ឬហៅកាត់ថាជាស្ករត្នោត GI ចាប់តាំងពីឆ្នាំ២០១០ មកម្លេះ។ ហើយផលិតផលនេះ ទទួលការគាំទ្រខ្លាំង គឺចាប់ពីឆ្នាំ២០១៥ ដែលធ្វើឲ្យកសិករអ្នកឡើងត្នោត ទទួលបានផលកម្រៃកាន់តែប្រើសើរពីមុខរបររបស់ខ្លួន។ ដោយសារភាពល្បីល្បាញ ការបញ្ជាទិញស្ករត្នោត GI ក៏កាន់តែកើនឡើង ដែលមួយឆ្នាំប្រមាណ ៣០០តោន តែការផ្គត់ផ្គង់បានចំនួន ២៥០តោនប៉ុណ្ណោះ។ ការផលិតស្ករត្នោត GI របស់កម្ពុជា ប្រឈមនឹងកង្វះកម្លាំងពលកម្ម ពិសេសកម្លាំងពលកម្មក្មេងៗ។

សូមស្ដាប់កិច្ចសម្ភាសរវាងលោក ញ៉ុង ហេង នៃសារព័ត៌មានថ្មីៗ និងលោក សំ សារឿន ប្រធានសមាគមលើកកម្ពស់ស្ករត្នោតកំពង់ស្ពឺ ដូចតទៅនេះ៖

បើតាមលោក សំ សារឿន អ្នកផលិតស្ករត្នោតGI សព្វថ្ងៃមានចំនួន ១៧៨គ្រួសារ ដែលសុទ្ធសឹងតែជាកម្លាំងពលកម្មចាស់ៗចាប់ពីអាយុ ៤០ឆ្នាំឡើងទៅ។ កម្លាំពលកម្មយុវជន ហាក់មិនចាប់អារម្មណ៍នឹងមុខរបរឡើងត្នោតនេះទេ ដែលចោទជាក្ដីបារម្ភចំពោះការបង្កើនបរមាណផលិតឲ្យទាន់ទីផ្សារ។ លោក សារឿន ប្រាប់ថា ក្នុងមួយឆ្នាំកសិករឡើងត្នោតរកចំណូលបានប្រមាណ ២៥០០ដុល្លារ ទៅជាង ៤០០០ដុល្លារ។ ក្នុងមួយឆ្នាំសម្រាប់ស្ករត្នោតGI គឺកសិករប្រមូលផលពីខែធ្នូ រហូតដល់ខែឧសភា។ កសិករអាចលក់ស្ករប្រភេទនេះក្នុងមួយគីឡូក្រាមជាង ៥០០០រៀល ធៀបនឹងស្ករត្នោតធម្មតាថ្លៃត្រឹម ៣០០០រៀល។

លោក សំ សារឿន លើកឡើងថា បញ្ហាកម្លាំងពលកម្មនេះ ប្រឈមទី១គឺកសិករ ចាស់ៗមិនបង្កើនសន្ទុះផលិតឲ្យខ្លាំង និងទី២កង្វះពលកម្មក្មេងៗ។ លោក សំ សារឿន អះអាងថា សមាគមកំពុងព្យាយាមបញ្ចុះបញ្ចូលក្រុមហ៊ុនដែលទទួលទិញ ឲ្យដំឡើងថ្លៃបន្តិចទៀត និងរកវិធិកាត់បន្ថយថ្លៃដើមផលិតរបស់កសិករ ដើម្បីធ្វើឲ្យមានការចាប់អារម្មណ៍កាន់តែច្រើនក្នុងមុខរបរមួយនេះ។ សមាគមបាន សហការជាមួយអង្គការនានាធ្វើចង្ក្រានដែលប្រើប្រាស់អុសតិចជូនកសិករ ៕