កីឡាជាតិ
ជាតិ
AFF Suzuki Cup៖ កម្ពុជាចាញ់ម្ចាស់ផ្ទះមីយ៉ាន់ម៉ា ៤-១
× ក្រុមកីឡាបាល់ទាត់ជម្រើសជាតិកម្ពុជា បានប្រកួតចាញ់ម្ចាស់ផ្ទះមីយ៉ាន់ម៉ា ៤-១ សម្រាប់ការប្រកួតលើកទីពីរនៅក្នុងពូល A នៃព្រឹត្តិការណ៍ AFF Suzuki Cup ឆ្នាំ២០១៨ នៅកីឡដ្ឋាន Mandalarthiri នាល្ងាចថ្ងៃចន្ទ ទី១២ ខែវិច្ឆិកា នេះ។
គ្រាប់បាល់នាំមុខរបស់កម្ពុជា កើតឡើងក្រោយការបញ្ជូនពីចម្ងាយរបស់ សឿយ វិសាល ទៅកាន់ រ៉ឹង ប៊ុនហៀង។ បន្ទាប់មក សុះ ស៊ូហាណា ទទួលបានបាល់បន្តពី ប៊ុនហៀង ហើយបញ្ជូនទៅឲ្យ ចាន់ វឌ្ឍនាកា ដើម្បីស៊ុតបាល់បញ្ចូលទីនាំមុខម្ចាស់ផ្ទះនៅនាទី២៣។
ក្រុមម្ចាស់ផ្ទះ វាយបកតាមស្មើវិញនៅនាទី ៦០ ដោយ Win Thein Than បញ្ជូនទៅឲ្យ Bo Bo Hlaing ស៊ុតបញ្ចូលទី។ ៧នាទីក្រោយមក អាជ្ញាកណ្តាលហ្វីលីពីន Clifford Postanes Daypuyat បានផ្តល់បាល់ពិន័យ១១ម៉ែត្រ បន្ទាប់ពីប្រធានក្រុម សឿយ វិសាល បង្កកំហុសនៅតំបន់គ្រោះថ្នាក់ ប៉ុន្តែការទាត់របស់ Thu Aung ត្រូវបានរារាំងដោយអ្នកចាំទី កែវ សុខសិលា។
ទោះបីជាយ៉ាង មីយ៉ាន់ម៉ានៅមានឱកាសនាំមុខ ២-១ ដោយនៅនាទី៧០ ដោយ Aung Than Htet បានឆក់ឱកាសបាល់ដែលផ្លាតចេញពីដៃរបស់ សុខសិលា ហើយប្រើជើងស្តាំស៊ុតបញ្ចូលទីបានសម្រេច។
នៅនាទី៨៧ Aung Si Thu បានស៊ុតបាល់បញ្ចូលទីដើម្បីបង្កើនការនាំមុខសម្រាប់ម្ចាស់ផ្ទះ បន្ទាប់ពីសុខសិលា បានចាប់បាល់ផ្លាតសារជាថ្មី។ ឈានដល់វិនាទីចុងក្រោយទៅហើយ Bo Bo បន្ថែមបាន១គ្រាប់ទៀត ដែលធ្វើឲ្យការប្រកួតបញ្ចប់ក្នុងលទ្ធផល ៤-១។
ជម្រើស១១នាក់របស់កម្ពុជា៖ កែវ សុខសិលា, សាត រ៉ស៊ីប, សឿយ វិសាល, ហុង ផេង, សារ៉េត គ្រីយ៉ា, ប្រាក់ ធីវ៉ា (កែវ សុខផេង ៧៣), ប៊ិន ចន្ថាធារី, គួច សុគម្ភៈ, សុះ ស៊ូហាណា (ប្រាក់ មុនីឧត្តម ៦១), ចាន់ វឌ្ឍនាកា (ឈិន ឈឿន ៤៦), រ៉ឹង ប៊ុនហៀង។
ជម្រើស១១នាក់របស់មីយ៉ាន់ម៉ា៖ Kyaw Zin Htet, Zaw Min Tun, Thein Than Win, David Htan, Pyae Pyo Zaw, Hlaing Bo Bo, Lwin Moe Aung, Yan Naing Oo (Aung Thu ៤៦), Si Thu Aung, Mg Mg Lwin, Zin Min Tun៕
© រក្សាសិទ្ធិដោយ thmeythmey.com