ចិន និងសិង្ហបុរី នៅថ្ងៃទី១៤ ខែវិច្ឆិកា បានយល់ព្រមពង្រីកកិច្ចសហប្រតិបត្តិការរវាងកងទ័ពសិង្ហបុរី (SAF) និងកងទ័ពរំដោះប្រជាជនចិន (PLA) ដោយភាគីទាំងពីរយល់ព្រមធ្វើសមយុទ្ធយោធាទ្វេភាគីមួយក្នុងឆ្នាំ២០១៩ខាងមុខ។
ការសម្រេចរបស់ប្រទេសទាំងពីរនេះត្រូវបានលើកឡើង នៅក្នុងសេចក្តីប្រកាសព័ត៌មានរួមគ្នាមួយ កាលពីថ្ងៃពុធ ក្រោយពីនាយករដ្ឋមន្ត្រីចិន លោក លី ខឹឈាំង បានជួបពិភាក្សាជាមួយសមភាគីសិង្ហបុរី លី សៀនឡុង និងប្រធានាធិបតី លោកស្រី Halimah Yacob អំឡុងទស្សនកិច្ចរបស់លោកក្នុងសិង្ហបុរី។
ជាមួយគ្នានេះ ចិន និងសិង្ហបុរីក៏បានរម្លឹកឡើងវិញពីស្មារតីដ៏មោះមត់របស់ពួកគេ ក្នុងការពង្រឹងកិច្ចសហប្រតិបត្តិការយោធាអាស៊ាន-ចិន ព្រមទាំងបន្តការធ្វើសមយុទ្ធដែនសមុទ្ររវាងអាស៊ាន និងចិនថែមទៀតផង។ នេះបើតាមទូរទស្សន៍សិង្ហបុរី Channel NewsAsia។
ក្រៅពីបញ្ហាយោធា ប្រទេសទាំងពីរនេះ ក៏សង្កត់ធ្ងន់ពីសារៈសំខាន់នៃពាណិជ្ជកម្មសេរី និងការធ្វើឲ្យសកលភាវូនីយកម្មសេដ្ឋកិច្ចកាន់តែបើកទូលាយបន្ថែមទៀតផងដែរ។ លើសពីនេះ សិង្ហបុរី និងចិនក៏បានចុះហត្ថលេខាកិច្ចព្រមព្រៀងសេដ្ឋកិច្ចមួយចំនួនផងដែរ ក្នុងនោះរួមមាន កិច្ចព្រមព្រៀងពាណិជ្ឋកម្មសេរីសិង្ហបុរី-ចិន (CSFTA) កម្រិតខ្ពស់ជាដើម ដែលមានគោលដៅជួយដល់ការធ្វើជំនួញកាន់តែងាយស្រួល ដើម្បីចូលទៅកាន់ទីផ្សារចិន។
បន្ថែមពីកិច្ចព្រមព្រៀងពាណិជ្ជកម្ម ចិន និងសិង្ហបុរី ក៏បានកត់សម្គាល់ផងដែរពីភាពជឿនលឿនក្នុងកិច្ចសហប្រតិបត្តិការគតិយុទ្ធ និងក្របខណ្ឌច្បាប់ ដោយភាគីទាំងពីរបានយល់ព្រមពង្រឹងកិច្ចសហប្រតិបត្តិការអនុវត្តច្បាប់ រួមមានដូចជា ការប្រយុទ្ធប្រឆាំងនឹងឧក្រិដ្ឋកម្មឆ្លងដែន, អំពើពុករលួយ, ការលាងលុយកង្វក់, ឧក្រិដ្ឋកម្មបច្ចេកវិទ្យា និងគ្រឿងញៀនជាដើម។
នៅក្នុងសេចក្តីប្រកាសដដែល សិង្ហបុរីក៏បានអបអរដល់ក្រុងប៉េកាំងសម្រាប់សមិទ្ធផលដែលចិនទទួលបាន បន្ទាប់ពីការធ្វើកំណែទម្រង់ និងបើកចំហសេដ្ឋកិច្ចអស់រយៈពេល៤០ឆ្នាំកន្លងទៅនេះ និងបានជូនពរដល់ប្រជាជនចិនថែមទៀតផង។
ចិនវិញ ក៏បានបង្ហាញការពេញចិត្តចំពោះវិភាគទានរបស់សិង្ហបុរីដល់ការធ្វើកំណែទម្រង់ និងបើកចំហសេដ្ឋកិច្ចរបស់ចិន និងបង្ហាញការគាំទ្រដល់សន្ទុះកំណើនសេដ្ឋកិច្ច, ការអភិវឌ្ឍ និងវឌ្ឍនភាពរបស់សិង្ហបុរី។ ក្រុងប៉េកាំងបានកត់សម្គាល់ថា ទំនាក់ទំនងរវាងអាស៊ាន និងចិន កំពុងឆ្ពោះទៅមុខយ៉ាងល្អប្រសើរ ហើយខ្លួនក៏ពេញចិត្តនឹងកិច្ចខិតខំប្រឹងប្រែងរបស់សិង្ហបុរីក្នុងនាមជាអ្នកសម្របសម្រួលសម្រាប់កិច្ចសន្ទនាអាស៊ាន-ចិនផងដែរ៕