កីឡាជាតិ
ជាតិ
កែវ រំចង់ អាចនឹងប៉ះ Saen Satharn ក្នុងការប្រកួតដណ្តើមខ្សែក្រវាត់ Thai Fight នៅខែវិច្ឆិកានេះ
×![]()
អ្នកលេងគុនខ្មែរ កែវ រំចង់ នឹងបង្ហាញមុខលើសង្វៀន Thai Fight សាជាថ្មីនៅខែវិច្ឆិកានេះ ក្រោយបាត់មុខលើសង្វៀនដ៏ធំមួយនេះប្រមាណជា១ឆ្នាំ។ ការចូលរួមលើកនេះ ខុសប្លែកពីលើកមុន គឺ រំចង់ ត្រូវប្រជែងជាមួយកីឡាករថៃ សែន ស្ថាន និងបរទេស២ផ្សេងទៀត ដើម្បីដណ្តើមខ្សែក្រវាត់ទម្ងន់៧០គីឡូក្រាម។ នេះបើតាមលោក កែវ សំអាង គ្រូបង្វឹកកីឡាករ កែវ រំចង់។
ក្រោយបាត់មុខមួយរយៈបន្ទាប់ពីយកឈ្នះកីឡាករ Iquezang ក្នុងព្រឹត្តិការណ៍ Thai Fight កាលពីអំឡុងខែវិច្ឆិកា ឆ្នាំ២០១៧ អ្នកលេងគុនខ្មែរចិត្តសឿង កែវ រំចង់ ត្រូវបានគណៈកម្មការរៀបចំព្រឹត្តិការណ៍នេះ ដាក់ឲ្យប្រកួតដណ្តើមខ្សែក្រវាត់នៅថ្ងៃទី២៤ ខែវិច្ឆិកា ឆ្នាំ២០១៨ ខាងមុខ។ រំចង់ ត្រូវប្រកួតវិលជុំជាមួយកីឡាករបរទេស៣រូបផ្សេងទៀត ក្នុងទម្ងន់៧០គីឡូក្រាម។
លោក កែវ សំអាង គ្រូបង្វឹកនិងជាឪពុកបង្កើតកីឡាករ កែវ រំចង់ បានបញ្ចាក់ថា៖«ពិតមែនហើយ កែវ រំចង់ ត្រូវបានគេដាក់ឲ្យប្រកួតវិលជុំដណ្តើមខ្សែក្រវាត់ក្នុងព្រឹត្តិការណ៍ Thai Fight ជាមួយកីឡាករបរទេស៣រូបដូចជាកីឡាករ សែន ស្ថាន និងកីឡាករមកពីអឺរ៉ុបពីររូបទៀត»។
គ្រូបង្វឹករូបនេះបានអះអាងថា កូនប្រុសរបស់លោកអាចប៉ះជាកីឡាករថៃ សែន ស្ថាន នៅវគ្គផ្តាច់ព្រ័ត្រ បើសិនអាចយកឈ្នះក្នុងការប្រកួតដំបូង។ ព្រោះក្នុងការប្រកួតនេះ កែវ រំចង់ និង សែន ស្ថាន ត្រូវបានគណៈកម្មការផ្គូផ្គងឲ្យជួបជាមួយកីឡាករមកពីអឺរ៉ុបដូចគ្នាក្នុងជំនួបបើកឆាក។ ក្នុងករណីពួកគេអាចយកឈ្នះគូប្រកួត នោះពួកគេនឹងជួបគ្នានៅវគ្គផ្តាច់ព្រ័ត្រ តែបើមានអ្នកណាម្នាក់ចាញ់នោះពួកគេមិនជួបគ្នានោះទេ។
គ្រូបង្វឹកមកពីខេត្តបាត់ដំបងរូបនេះ ហាក់មានការព្រួយបារម្ភសម្រាប់ការចូលរួមលើកនេះ ទោះបីខាង Thai Fight បានប្រាប់មុនជាង១ខែ ដើម្បីហ្វឹកហាត់ត្រៀមក៏ដោយ។ ការព្រួយបារម្ភ ក៏ដោយសារ រំចង់ ដែលមានទម្ងន់៧៨គីឡូក្រាម ត្រូវសម្រកទម្ងន់៨គីឡូក្រាម ដើម្បីចូលរួមព្រឹត្តិការណ៍នេះ។ តែយ៉ាងណា លោកនៅតែជឿជាក់ថា រំចង់ នឹងធ្វើបានល្អក្នុងការប្រកួតនេះ។
កីឡាករ កែវ រំចង់ នឹងចាកចេញពីកម្ពុជានៅថ្ងៃទី២១ ខែវិច្ឆិកា ឆ្នាំ២០១៨ ដើម្បីត្រៀមចូលរួមប្រកួតក្នុងព្រឹត្តិការណ៍ Thai Fight ដែលរៀបចំនៅទីក្រុងបាងកក ប្រទេសថៃ នាថ្ងៃទី២៤ ខែវិច្ឆិកា ឆ្នាំ២០១៨៕
Tag:
កែវ រំចង់
កែវ សំអាង
Thai Fight
© រក្សាសិទ្ធិដោយ thmeythmey.com
