ជាតិ
សង្គមជាតិ
យុវសិស្សកម្ពុជា៩រូប យកភាពយន្តខ្នាតខ្លីទៅប្រកួតនៅជប៉ុន ជាមួយយុវជន៥ប្រទេសទៀតពីអាស៊ី
× ភ្នំពេញ៖ យុវសិស្សកម្ពុជាចំនួន៩រូប មកពីវិទ្យាល័យខុសគ្នានៅកម្ពុជា បានជាប់ជ័យលាភីក្នុងការផលិតរឿងភាពយន្តខ្នាតខ្លីដែលរៀបចំដោយសា្ថនទូតជប៉ុនប្រចាំកម្ពុជា។ ពួកគេនឹងត្រូវបន្តទៅចូលរួមវគ្គផ្តាច់ព្រ័ត្រនៅក្នុងប្រទេសជប៉ុន ចាប់ពីថ្ងៃទី១៩ ខែវិច្ឆិកា ដល់ថ្ងៃទី២៨ ខែវិច្ឆិកា ជាមួយយុវសិស្សនៃបណ្តាប្រទេសចំនួន៥ទៀត នៅតំបន់អាស៊ី មានដូចជាទីម័រខាងកើត ចិន តៃវ៉ាន់ ម៉ុងហ្គោល និងកូរ៉េខាងត្បូង។
ក្នុងឱកាសចូលរួមប្រកួតភាពយន្តខ្នាតខ្លីនៅប្រទេសជប៉ុន យុវសិស្សទាំង៩រូប ក៏នឹងចូលរួមក្នុងកម្មវិធីបណ្តាញផ្លាស់ប្តូរសិស្ស និស្សិត និងយុវជនរវាងប្រទេសជប៉ុន និងបណ្តាប្រទេសអាស៊ីខាងកើតដែលហៅកាត់ថា JENESYS 2018 និង កម្មវិធីផ្លាស់ប្តូរគ្នារវាងសាលា និងសាលា និងមានឱកាសចូលរួមដំណើរកម្សាន្តជុំវិញទីក្រុងផងដែរ។
ភាពយន្តដែលជាប់ជ័យលាភី នឹងបន្តប្រកួតនៅជប៉ុននោះមានដូចជា ជ័យលាភី លេខ១ បានទៅលើរឿង« ការផ្លាស់ប្តូរ» មកពីសាលា USA International School សាខាបាត់ដំបង និងវិទ្យាល័យព្រះមុន្នីវង្សខេត្តបាត់ដំបង។ ភាពយន្តដែលជាប់ចំណាប់ថ្នាក់លេខ១ នេះ រៀបរាប់ពីកុមារម្នាក់លេងហ្គេមខ្លាំងពេក មិនបានខិតខំប្រឹងរៀន ទីបំផុតត្រូវបានគេមើលងាយ ដោយសារមិត្តភក្តិមិនចម្លងមេរៀនឲ្យ ចុងបញ្ចប់គេក៏ខិតខំរៀនសូត្រវិញ។
«កំហុសខ្ញុំ» ជាភាពយន្តខ្លីដែលបានជាប់ជ័យលោភីលេខ២ ផលិតដោយសិស្សមកពីសាលា Cambodia Adventist School។ ភាពយន្តខ្ចីនេះ រៀបរាប់អំពីកុមារម្នាក់ប្រព្រឹត្តមិនល្អ ដោយសារស្ថានភាពគ្រួសារក្រីក្រ។ ភាពខ្វះខាតបែបនេះហើយ បានធ្វើឲ្យម្តាយស្លាប់ ដោយសារជំងឺ។ រូបគេចាប់ផ្តើមខឹងនឹងឪពុករបស់ខ្លួន បន្ទាប់មកឪពុកក៏មានជំងឺប្រចាំកាយ រហូតដល់ស្លាប់។ ដូច្នេះទើបកុមារម្នាក់នេះដឹងពីកំហុស និងខិតខំប្រកបមុខរបរដើម្បីចិញ្ចឹមប្អូនស្រី។
ចំណែកជ័យលាភី លេខ៣ បានទៅលើរឿង «កូនប្រុសមិនមានទំនួលខុសត្រូវ» ដែលរៀបរាប់ពីក្មេងប្រុសម្នាក់មិនស្រឡាញ់ម្តាយ និងមិនឲ្យតម្លៃលើការសិក្សាផងដែរ។ ទីបំផុតគេក្លាយជាមនុស្សវង្វេងសតិ ក្រោយពីម្តាយរបស់គេជួបឧបទ្ទវហេតុដោយសាររូបគេ។ ភាពយន្តនេះ ផលិតដោយសមាជិកក្រុម៣សាលាផ្សេងគ្នា ដូចជាសាលាប៊ែលធីអន្តរជាតិ សាលាទី៩ សាលា American Intercon សាខាម៉ៅសេទុង និងវិទ្យាល័យជាស៊ីមសន្ធរម៉ុក៕
Tag:
សិស្ស
ជប៉ុន
ភាគយន្ត
© រក្សាសិទ្ធិដោយ thmeythmey.com