អន្តរជាតិ
លោក ស៊ី ជិនភីង៖ គំនិតផ្ដួចផ្ដើមខ្សែក្រវាត់និងវិថី មិនមែនជាអន្ទាក់ដូចគេថាឡើយ រូបភាព AFP
× ប្រធានាធិបតីចិន ស៊ី ជិនភីង នៅថ្ងៃទី១៧ ខែវិច្ឆិកា បាននិយាយការពារគំនិតផ្ដួចផ្ដើមខ្សែក្រវាត់ និងវិថី ដែលជាគម្រោងសាងសង់ហេដ្ឋារចនាសម្ព័ន្ធដ៏ធំដើម្បីតភ្ជាប់អាស៊ី អាហ្វ្រិក និងអឺរ៉ុបជាដើម។ ប៉ុន្តែគម្រោងនេះបានរងការរិះគន់ខ្លាំងពីសំណាក់លោកខាងលិច ដោយចោទចិនថា កំពុងធ្វើឲ្យប្រទេសក្រីក្រដែលទទួលលុយចិន ធ្លាក់ក្នុងអន្ទាក់បំណុល។ លោក ស៊ី បានតបនឹងពាក្យរិះគន់នេះថា គំនិតផ្ដួចផ្ដើមរបស់លោក គ្មានរបៀបវារៈក្រោយខ្នងឡើយ។
ចំពោះមុខអ្នកជំនួញជាច្រើននាជំនួប APEC CEO នៅថ្ងៃទី១៧ ខែវិច្ឆិកា ប្រធានាធិបតីចិន ស៊ី ជិនភីង បានទាត់ចោលពាក្យរិះគន់របស់ប្រទេសខ្លះមកលើគំនិតផ្ដួចផ្ដើមខ្សែក្រវាត់ និងវិថី ដែលលោកជាអ្នកដាក់ចេញផ្ទាល់កាលពីឆ្នាំ២០១៣ ។ ពាក្យរិះគន់ច្រើនកើតចេញពីបស្ចិមលោក ដោយអាមេរិកជាអ្នកចេញមុខវាយប្រហារខ្លាំងជាងគេរហូតប្រើពាក្យថា ចិនធ្វើឲ្យប្រទេសខ្ចីលុយខ្លួនធ្លាក់ចូលក្នុងបំណុល និងបាត់បង់ដែនអធិបតេយ្យភាពទៀត។
ថ្លែងពីកម្មវិធីនៅប៉ាពួអាស៊ីនូវែលហ្គីណេដែលជាម្ចាស់ផ្ទះ APEC ឆ្នាំ២០១៨ លោក ស៊ី និយាយថា គំនិតផ្ដួចផ្ដើមរបស់ចិន មិនមែនបង្កើតដើម្បីប្រើរបៀបវារៈនយោបាយលាក់បាំងអ្វីទេ និងក៏មិនសំដៅនរណាម្នាក់ ឬមិនឲ្យនរណាម្នាក់ចូលរួមដែរ ហើយរឹតតែមិនមែនជាអន្ទាក់ដូចដែលអ្នកខ្លះនិយាយដែរ។ នេះបើតាមការផ្សាយរបស់ទីភ្នាក់ងារព័ត៌មាន AFP ។
មិនត្រឹមការពារគម្រោងផ្លូវសូត្ររបស់ខ្លួនឡើយ មេដឹកនាំចិនក៏ឆ្លៀតវាយប្រហារនយោបាយគាំពារនិយម និងការគិតតែប្រយោជន៍ផ្ទាល់ខ្លួនទៅវិញ។ ទោះជាមិនបញ្ចេញឈ្មោះ គេដឹងថា លោក ស៊ី ពិតជាចង់រិះគន់រដ្ឋបាលប្រធានាធិបតីអាមេរិក ដូណាល់ ត្រាំ ដែលកំពុងអនុវត្តនយោបាយទាំងនេះ។ លោក ស៊ី និយាយដោយត្រង់ៗថា យើងគួរនិយាយទេ! ចំពោះនយោបាយគាំពារនិយម និងគំនិតឯកតោភាគីនិយម។
ឯរឿងជម្លោះពាណិជ្ជកម្មវិញ លោក ស៊ី នៅតែនិយាយបញ្ច្រាស់អាមេរិកបន្តទៀត។ ក្នុងជំនួបដែលធ្វើនៅរដ្ឋធានីព័រម៉ូរ៉េសប៊ី ប្រធានាធិបតីចិនរូបនេះបញ្ជាក់ថា គ្មាននរណាឈ្នះ មិនថាសង្គ្រាមពាណិជ្ជកម្ម សង្គ្រាមត្រជាក់ ឬសង្គ្រាមក្ដៅឡើយ។ លោកបន្តថា ការប៉ុនប៉ងបង្កើតរបាំងពន្ធ និងការកាត់ផ្ដាច់ទំនាក់ទំនងសេដ្ឋកិច្ចជាការដើរផ្ទុយពីច្បាប់សេដ្ឋកិច្ច និងទំនោរប្រវត្តិសាស្ត្រ ដែលវាជាវិធីសាស្ត្ររយៈពេលខ្លី និងរងបរាជ័យនៅពេលខាងមុខ។
ប្រធានបទពាណិជ្ជកម្មអន្តរជាតិ ទំនងជាគ្របដណ្ដប់កិច្ចប្រជុំ APEC ឆ្នាំនេះ ខណៈប្រធានាធិបតីអាមេរិកមិនបានចូលរួមឡើយ។ អវត្តមានមេដឹកនាំអាមេរិកក្នុងកិច្ចប្រជុំដែលជាវេទិកាអន្តររដ្ឋាភិបាល មានសមាជិកសរុប ២១ មិនខុសពីផ្តល់ឱកាសល្អដល់មេដឹកនាំចិនក្នុងពង្រឹងឥទ្ធិពល និងពង្រីកកិច្ចសហប្រតិបត្តិការជាមួយប្រទេសនានាក្នុងតំបន់ ចំពេលដែលភាពតានតឹងពាណិជ្ជកម្ម និងគោលនយោបាយគាំពារនិយមឡើយ៕
Tag:
ចិន
អាមេរិក
BRI
ស៊ី ជិនភីង
© រក្សាសិទ្ធិដោយ thmeythmey.com