ជាតិ
បុណ្យអុំទូក
សុខភាព
ស្រោមអនាម័យ៣ម៉ឺន ត្រៀមចែកឲ្យពលរដ្ឋ ក្នុងពិធីបុណ្យអុំទូក
× អាជ្ញាធរជាតិប្រយុទ្ធប្រឆាំងជំងឺអេដស៍ (NAA) នឹងរៀបចំយុទ្ធនាការអប់រំផ្សព្វផ្សាយ និងត្រៀមស្រោមអនាម័យចំនួន៣ម៉ឺន សម្រាប់ចែកជូនប្រជាពលរដ្ឋ ដើម្បីទប់ស្កាត់ការឆ្លងជំងឺអេដស៍ ក្នុងព្រះរាជពិធីបុណ្យអំទូក ដែលនឹងប្រព្រឹត្តទៅពីថ្ងៃទី២១ ដល់ថ្ងៃទី២៣ ខែវិច្ឆិកា ឆ្នាំ២០១៨ ខាងមុខ។
ក្រុមការងារបាន ត្រៀមរៀបចំយុទ្ធនាការអប់រំផ្សព្វផ្សាយ នឹងរៀបចំក្រុមឡានចល័ត ដើម្បីចុះផ្សព្វផ្សាយអប់រំ និងត្រៀមចែកស្រោមអនាម័យ៣ម៉ឺនស្រោម ដោយឥតគិតថ្លៃ នៅតាមទីប្រជុំជន សួនច្បារ តំបន់កោះពេជ្រ កន្លែងក្រុមកីឡាករអុំទូកស្នាក់នៅ និងតំបន់មាត់ទន្លេត្រើយខាងលិច ដែលមានមនុស្សច្រើនកុះករ មកលេងកម្សាន្ដច្រើន ដើម្បីផ្ដល់សារអប់រំខ្លីៗ អំពីមេរោគអេដស៍។ នេះបើតាមលោក តែង គន្ធី អគ្គលេខាធិការនៃអាជ្ញាធរជាតិប្រយុទ្ធប្រឆាំងជំងឺអេដស៍ បានផ្ដល់បទសម្ភាសដល់វិទ្យុជាតិ។
លោក លើកឡើងថា ក្នុងពិធីបុណ្យអុំទូកខាងមុខ ក៏មានការរៀបចំកន្លែងធ្វើតេស្តឈាម សម្រាប់ធ្វើតេស្តឈាមស្វែងរកមេរោគអេដស៏ដោយឥតគិតថ្លៃ និងណែនាំដើម្បីទទួលបានថ្នាំពីក្រសួងសុខាភិបាល ដែលនៅជិតផ្ទះរបស់ពួកគេ។ លោក បន្តថា អាជ្ញាធរជាតិប្រយុទ្ធប្រឆាំងជំងឺអេដស៍ បានសហការជាមួយតារាចម្រៀង តារាសម្តែង និងតារាកំប្លែង ដែលនឹងត្រូវសម្តែងសិល្បៈកម្សាន្ត ហើយផ្តល់ជាសារអប់រំ ដល់ប្រជាពលរដ្ឋ ដែលមកទស្សនាផងដែរ ដើម្បីធ្វើយ៉ាងណាឲ្យពួកគេ ចេះការពារខ្លួនពីជំងឺអេដស៍ ។
យោងតាមរបាយការណ៍របស់អាជ្ញាធរជាតិប្រយុទ្ធនឹងជំងឺអេដស៍ អត្រាឆ្លងជំងឺអេដស៍ថ្មីនៅកម្ពុជា បានថយចុះពី១០០នាក់នៅឆ្នាំ១៩៩៨ មកនៅត្រឹម៣នាក់ នៅឆ្នាំ២០១០ និងបន្តថយចុះនៅសល់ ២នាក់ នៅឆ្នាំ២០១៦។ ទោះបីយ៉ាងណាក្ដី តាមការប៉ាន់ស្មាន បច្ចុប្បន្ននេះ មានអ្នករស់នៅជាមួយមេរោគអេដស៍ ចំនួន៧២០០០នាក់ ដោយក្នុងនោះ បានទទួលព្យាបាលដោយឱសថប្រឆាំងនឹងមេរោគអេដស៍ចំនួន៥៧០០០នាក់ ស្មើនឹង៧៥ភាគរយ៕
© រក្សាសិទ្ធិដោយ thmeythmey.com