ជាតិ
លោក ថោង ខុន ហាមម្ចាស់សេវាកម្មស្នាក់នៅ និងម្ហូបអាហារ ដំឡើងថ្លៃក្នុងឱកាសបុណ្យសមុទ្រ
× លោក ថោង ខុន រដ្ឋមន្ត្រីក្រសួងទេសចរណ៍ ហាមម្ចាស់សណ្ឋាគារ ផ្ទះសំណាក់ និងកន្លែងលក់អាហារ ដំឡើងថ្លៃ ក្នុងពិធីបុណ្យសមុទ្រ ដែលនឹងប្រារព្ធ នៅថ្ងៃទី១៤-១៦ ខែធ្នូ ឆ្នាំ២០១៨ ខាងមុខនេះ។ ការអំពាវនាវរបស់លោក ថោង ខុន បែបនេះ ធ្វើឡើងនៅក្នុងជំនួបអភិបាលខេត្តកោះកុងលោកស្រី មិថុនា ភូថង កន្លងមក។
លោក ថោង ខុន បានបញ្ជាក់ថា ក្រុមការងារកំពុងដោះស្រាយបញ្ហាសេវាស្នាក់នៅ ម្ហូបអាហារ និងសេវាតម្រូវការនានា ជូនភ្ញៀវទេសចរក្នុងឱកាសបុណ្យសមុទ្រនេះ។ រដ្ឋមន្ត្រីក្រសួងទេសចរណ៍ បាននិយាយដូច្នេះថា៖« សេវាកម្មស្នាក់នៅ-ម្ហូបអាហារ និងសេវាតម្រូវការនានា នឹងរៀបរយស្រេចបាច់មុនព្រឹត្តិការណ៍ទេសចរណ៍ដ៏ធំនេះ ឈានចូលមកដល់»។
បច្ចុប្បន្ននេះក្រុមការងាររបស់ក្រសួងសាធារណការ និងដឹកជញ្ជូន និងរដ្ឋបាលខេត្តកោះកុង កំពុងពន្លឿនការងារស្ថាបនាផ្លូវ និងហេដ្ឋារចនាសម្ព័ន្ធជារៀងរាល់ថ្ងៃ ដើម្បីកុំឲ្យប្រជាពលរដ្ឋព្រួយបារម្ភពីបញ្ហាផ្លូវ ធ្វើដំណើរទៅទស្សនាពិធីបុណ្យសមុទ្រ ។ នេះបើតាមលោកស្រី មិថុនា ភូថង អភិបាលខេត្តកោះកុង។
លោកស្រី មិថុនា ភូថង បាននិយាយថា ក្រៅពីទៅលេងបុណ្យសមុទ្រនេះ ភ្ញៀវទេសចរកម្ពុជា ក៏អាចឆ្លងទៅទស្សនា និងស្នាក់នៅខេត្តត្រាច ប្រទេសថៃផងដែរ។ « ក្រុមការងារខាងភាគីកម្ពុជា ក៏បានសម្របសម្រួលជាមួយភាគីថៃ ដើម្បីអនុញ្ញាតឱ្យភ្ញៀវទេសចរពីកម្ពុជាដែលមកទស្សនាបុណ្យសមុទ្រនៅខេត្តកោះកុង អាចឆ្លងទៅទស្សនានៅខេត្តត្រាច ប្រទេសថៃ និងស្នាក់នៅទីនោះបានផងដែរ»។ នេះបើតាមអភិបាលខេត្តកោះកុង។
គួរបញ្ជាក់ថា បុណ្យសមុទ្រនឹងប្រារព្វធ្វើឡើង រយៈពេល៣ថ្ងៃ ចាប់ពីថ្ងៃទី១៤-១៦ ខែធ្នូ ខាងមុខ ៕
© រក្សាសិទ្ធិដោយ thmeythmey.com