Honda៖ លុយពិតជាសំខាន់ តែអ្វីដែលសំខាន់ជាងនេះ គឺការរួមចំណែកពង្រឹងក្រុមកម្ពុជា

កីឡាជាតិ

ជាតិ

Honda៖ លុយពិតជាសំខាន់ តែអ្វីដែលសំខាន់ជាងនេះ គឺការរួមចំណែកពង្រឹងក្រុមកម្ពុជា

18, Nov 2018 , 4:11 pm

រូបភាព

ដោយ: ថ្មីៗ

លោក Keisuke Honda តាមរយៈបណ្តាញសង្គម Twitter ខ្លួន បានបង្ហោះវីដេអូរបស់ខ្លួន ទាក់ទងនឹងការការរួមចំណែករបស់លោកដើម្បីអភិវឌ្ឍន៍វិស័យកីឡាបាល់ទាត់នៅកម្ពុជា ក្នុងនាមតួនាទីជាអ្នកចាត់ការទូទៅក្រុមជម្រើសជាតិដោយមិនយកកំរៃ។

ជាមួយនឹងការបង្ហោះវីដេអូនោះ លោក Keisuke Honda ដែលជាកីឡាករអាជីពរបស់ក្លិប Melbourne Victory របស់អូស្ត្រាលីផងដែរនោះ បានសរសេរថា លុយពិតជាសំខាន់ ប៉ុន្តែអ្វីដែលសំខាន់ជាងនេះ គឺការរួមចំណែករបស់លោកក្នុងការពង្រឹកក្រុមកីឡាបាល់ទាត់ជម្រើសជាតិកម្ពុជា។

លោក Honda បច្ចុប្បន្នកំពុងស្ថិតនៅជាមួយក្រុមជម្រើសជាតិកម្ពុជា សម្រាប់ព្រឹត្តិការណ៍ AFF Suzuki Cup 2018 នោះ បានលើកឡើងក្នុងឃ្លីបវីដេអូថា នៅកម្ពុជា ពលរដ្ឋជាច្រើនរស់នៅក្នុងស្ថានភាពលំបាកលំបិននៅឡើយ។ លោកបានបន្ថែមថា៖ «តាមរយៈបាល់ទាត់ ខ្ញុំសង្ឃឹមផ្តល់ភាពការក្លាហានខ្លះដល់ពួកគេ ក្នុងការពង្រឹងជីវិតរស់នៅ និងផ្តល់ឲ្យពួកគេនូវថាមពលបន្ថែមខ្លះសម្រាប់ការងារថ្ងៃស្អែក»។

ជាមួយគ្នានេះ កីឡាករជម្រើសជាតិដ៏ឆ្នើមរបស់ជប៉ុន រំពឹងថា គម្រោងរបស់ខ្លួនជាមួយក្រុមជម្រើសជាតិកម្ពុជា នឹងក្លាយជាចំណែកមួយដែលជួយដល់កម្ពុជា។